AtuartigukSuliassiissummik akuersissuteqarneq ingerlatseqatigiiffinnut, naatsorsuutinut, kukkunersiuisarnermullu suliassaqarfimmik tigunissamik suliamik aallartisitsisoq
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Ingerlatseqatigiiffinnut, naatsorsuutinut, kukkunersiuisarnermullu suliassaqarfimmik Kalaallit Nunaata tigusinissaminik kissaateqarnera pillugu, Naalakkersuisut siulittaasuata Múte B. Egedep siornatigut statsminister Mette Frederiksenimut nalunaarutigisaanut nangitsinertut suliaq aallartinneqassasoq, Naalakkersuisut 2024-mi februaarimi ataatsimiinnerminni akuersissutigaat.
Suliap ingerlateqqinneqarnissaanut suliassiissummik akuersissuteqarnikkut, suliassaqarfimmik tigusinermi kingunissanik, pisariaqartitassanik, iluaqutissanik, ajoqutissanillu erseqqissaasumik nassuiaasiortussamik, Naalakkersuisut suleqatigiissitamik pilersitsipput.
Inuutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen ima oqaaseqarpoq:
”Suliassaqarfinnik tigusinissamik suliaqarnermi alloriartoqaqqimmat Naalakkersuisut nuannaarutigaat, taavalu ingerlatseqatigiiffinnut, naatsorsuutinut, kukkunersiuisarnermullu suliassaqarfimmik tigusinissamut periusissanik suleqatigiissitap innersuussutissai, siunnersuutissailu qilanaaralugit”.
Naalakkersuisut Inatsisartullu aalajangiinissaannut misissuineq tunngavissiillualersitsissaaq, soorluttaaq suliassaqarfimmi Erhvervsstyrelsip massakkut suliai, oqartussanillu suleqateqateqarnera nassuiaatigineqassasut. Kalaallit Nunaanni nalunaarsuiveqarsinnaanermi (CVR-inut nalunaarsuiffik) periarfissaasinnaasuni kingunissanik nalilersuinissaq kiisalu inatsimmik nutarterisariaqarnissamik pisariaqartitsinermik aamma nakkutilliinermut, nunallu tamalaat akornanni pisussaaffinnut atatillugu siunissami suleqatigiinnissamik misissuinissaq suliaqarnermi aamma ilanngunneqassapput.
Danmarkimi ministeriaqarfinnit, aqutsisoqarfinniillu sinniisut suliaqarnermi peqataassapput, suliarlu 2025-p aallartinnerani naammassissangatinneqarluni.
Paasissutissanik annertunerusunik pissarsiniarnermi Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik isiin@nanoq.gl-imut attavigiuk.