Nunatsinni Ilisimatusarnermik Siunnersuisoqatigiinni ilaasortassanik Naalakkersuisut toqqaasut

Naalagaaffinngornissamut Nunanullu Allanut Naalakkersuisup Vivian Motzfeldtip Naalakkersuisut sinnerlugit nalunaarutigaa, inuit tulliuttumi pineqartut Nunatsinni Ilisimatusarnermik Siunnersuisoqatigiinni/Greenland Reseach Councilimi ilaasortassatut toqqarneqarsimasut.

Siulittaasoq / Formand:

• Mitdlarak Evelyn Lennert, siunnersorti namminersortoq Ilisimatusarfimmilu avataaneersutut ilinniartitsisoq

Ilaasortat / Medlemmer:

• Rasmus Leander Nielsen, Ilisimatusarfimmi lektori centerimilu pisortaq
• Vivi Ane Sofie Noahsen, Nunatta Katersugaasiviani Allagaateqarfianilu Allagaatinut aqutsisoq
• Kirsty Langley, ASIAMI ilisimatooq
• Gert Mulvad, Nunatsinni Peqqinnissaqarfiup ataani nunap immikkoortuani nakorsaq
• Sofie Louise Sandberg Sørensen, DTU Spacemi ilisimatooq
• Inoqut Kristensen, Nalik Ventures A/S-imi investment manageri analystilu
• Lorenz Meire, Pinngortitaleriffiup Silap Pissusianik Ilisimatusarfiani ilisimatooq
  
  

Inatsimmi allassimavoq, toqqaaneq kalaallit ilisimatusarnikkut suliffeqarfiutaannit, ilisimatusarnikkut qitiusumik sammisaqarfiinit, ilisimatusarnikkut suliaqartunit kiisalu aallarnisaasutut nutaaliornikkullu suliaqartunit inassuteqartitsinikkut pissasoq.

Naalagaaffinngornissamut Nunanullu allanut Naalakkersuisoq Vivian Motzfeldt oqarpoq:
Ilisimatusarnermut siunnersuisarneq ilisimatusarnermullu aningaasaliisarneq pillugit inatsisip nunatsinnit inuiaqatigiinnillu iluaqutissanngortinnissaa ineriartortinneqarnissaalu eqqarsaatigalugit Nunatsinni Ilisimatusarnermut Siunnersuisoqatigiit 2014-imiilli pingaarutilimmik inissisimanikuupput. Siunnersuisoqatigiinnit tunuartut suleqataasimanerinik qujaffigiutigalugit siunnersuisoqatigiinni ilaasortanngortut nutaat tikilluaqquakka. Ilisimatusarnermik Siunnersuisoqatigiit Naalakkersuisut Naalakkersuisoqarfiillu ilisimatusarnikkut siunnersussallugit suliassaraat. Ilaasortanngortut nutaat suleqatigissallugit qilanaaraara tamatuma saniatigut ilinniarfiit suliffeqarfiillu inassuteqarsimanerinut qujaffigaakka".

Ilaasortanngortut nutaat piffissami 1. februar 2024 – 31. december 2026 atuuttussatut toqqagaapput.

Ilisimatusarnermut siunnersuisarneq ilisimatusarnermullu aningaasaliisarneq pillugit Inatsisartut inatsisaat nr. 5, 29. november 2013-imeersoq innersuussutigalugu Nunatsinni Ilisimatusarnermik Siunnersuisoqatigiinni ilaasortassanik nutaanik maanna toqqaasoqarpoq.

Nunatsinni Ilisimatusarnermik Siunnersuisoqatigiit inatsit naapertorlugu suliassaraat kalaallinut inuiaqatigiinnut iluaqutaasussamik Nunatsinni aallaaveqartumik kalaallit ilisimatusarnerisa siuarsarnissaat nukittorsarnissaallu.

Paasissutissat sukumiinerusut pillugit attavigineqassaaq:
Naasunnguaq Beck Kristensen, naalakkersuisup allattaa
e-mail nabk@nanoq.gl
oqarasuaat +299 345682