Spiralilersuisimaneq pillugu suliami inuit pisinnaatitaaffii pillugit Naalakkersuisut qulaajaasitsillutik aallartitsissapput

”Spiralilersuisimaneq” pillugu oqaluttuaq ilisimaneqalerneraniit ukiut marlunngulerput. Spiralilersuineq pisortatigoortumik 1966-imi suliniutitut aallartinneqarpoq, tassanilu spiralinik naartunaveersaatinillu allanik Kalaallit Nunaanni atuineq annertusaaffigineqarpoq. Spiralilersuisimaneq suliniutillu allat arnanut eqqorneqartunut, aapparisaannut nunalu tamakkerlugu annertuunik kingunerluuteqarsimapput.

Spiralilersuisoqarnerata kingunerisaanik kalaallit arnat niviarsiaqqallu ernisinnaasut amerlasoorujussuit 1960-ikkunniit ukiut tulliuttut ilanngullugit spiralilersorneqarsimapput. Spiralilersuineq inunngortartut amerlassusaannut assut sunniuteqarpoq, tassani 1960-ikkunniit 1970-ikkut qiteqqunnissaata tungaanut inunngortartut affaannanngorsimallutik. Taamaallaalli spiralilersuineq arnanut naartunaaveersaateqarusuttunuinnaq tunniunneqartarsimanngilaq. Aammali arnanut akuersissuteqarsimanngitsunut tunniunneqartarsimavoq, ilaannikkullu ilisimanngisaminnik spiralilertissimasarlutik. Tamatuma saniatigut arnat eqqorneqartut inuusungaatsiarput.

Tamatuma kingorna saqqummerpoq aamma ukiuni kingulliunerusuni, tassalu peqqinnissaqarfiup 1. januaari 1992-imi Namminersornerullutik Oqartussanut tunniunneqarnerata kingorna arnanik akuersititseqqaarani spiralilersuisoqartarsimasoq, allanilluunniit naartunaveersaasersuisoqartarsimasoq.

Taamaattumik Naalakkersuisut 2022-mi decembarimi aalajangerput Nunatsinni Nakorsaaneqarfik 1992-imiit siumut suliat pillugit nalunaarutinik tigooqqaassasoq. Nunatsinni Nakorsaaneqarfik 2022-mi maajimili 1992 sioqqullugu pisimasunut nalunaarutinik, kingusinnerusukkut ilisimatusartunut tunniussinissaq siunertaralugu tigooqqaalluni suliamik ingerlatsivoq.

Nunatsinni Nakorsaaneqarfiup arnat saaffiginnittut nalunaarutaannit tiguneqartunit paasissutissat tulleriiaarlugit suliarereerpai, aammalu suliap inerneri tamarmiusut pillugit allakkiaq ullumikkumiit nun.gl aqqutigalugu tamanit takuneqarsinnaalerpoq.

Peqqissutsimut Naalakkersuisoq Agathe Fontain oqarpoq:
”Arlaannaanilluunniit attuumassuteqanngitsunit qulaajaaneq ukiumi ataasinngulersumi ingerlareerpoq. Suli ilisimannittuniit nalunaarutinik katersuineq ingerlavoq, aammalu misissuinerup naammassinissaata tungaanut suli ukioq ataaseq sinnerlugu ingerlanissaa naatsorsuutigaarput. Kisianni ullumikkut arnarpassuit saqqummernissamut qunusuitsut peqqutaallutik oqaluttuap annersaa ilisimalereerparput. Taamaattumik isumaqarpunga ilisimasagut tunngavigalugit iliuuseqarnissarput aallartereertariaqaripput.”

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen oqarpoq:
”Ilisimatuuni sulineq Naalakkersuisunit iluarisimaarneqarpoq, massakkulli spiralilersuisimaneq pillugu qulaajaanermi alloriartoqarnissaa pisariaqartinneqarpoq.
Tamanna pissutigalugu Naalakkersuisuniit suliap inuit pisinnaatitaaffiinut tunngasortaanik qulaajaanissaq aallartinniarpaat. Arnat kannguttaatsuliorfigineqarsimanerat Naalakkersuisunit qularutigineqanngilaq, tamannalu arnanut ataasiakkaanut nunamullu tamarmiusunut kingunerluuteqarpoq. Qulaajaanermi nunani tamalaani isumaqatigiissutinik unioqqutitsinerit ersarissisinneqassapput”.

Tunuliaquttat pillugit paasissutissat
Spiralilersuisimanermik sulineq Naalakkersuisoqarfinni arlalinni ingerlanneqarpoq. Tamanna tunngavigalugu Naalakkersuisut Siulittaasuata ataqatigiissaarinermi suliassat Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisumut tunniuppaa, paasissutissanik avitseqatigiittarnissaq suliallu siumut ingerlanissaa qulakkeerniarlugu.

Attaveqarfissanut paasissutissat
Paasissutissanik sukumiinerusunik pissarserusunnermi naalakkersuisup allattaa Jeanette L. Petersen email: jalp@nanoq.gl aqqutigalugu imaluunniit tlf: +299 26 54 76-imut sianerfigalugu pissarsiarineqarsinnaapput.