AtuartigukIlulissani terianniaq perlerorsorineqartoq
Nassiussisuuvoq: Aalisarnermut Piniarnermullu Naalakkersuisoqarfik
Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik ilisimatinneqarsimavoq illoqarfimmi Ilulissani terianniaq pissusissarinngisaminik pissuseqartoq takuneqarsimasoq. Terianniap perlerornermik aattortissimanissaa pasineqarpoq. Terianniaq tallimanngornermi ullaakkut marsip aallaqqaataani 2024-mi toqunneqarpoq.
Perlerorneq virusimik nappaataavoq Kalaallillu Nunaanni terianniat akornanni nappaatigineqakkajuttoq. Terianniat qimminut qitsunnullu toqqaannarlugu attuisimagunik nappaammik tunillaasinnaapput, taakkualu inunnik tunillaasinnaallutik. Perlerornermik nappaateqalersimagaanni tamatigut toqumik kinguneqartarpoq, taamaattumillu pingaaruteqartorujussuuvoq pitsaaliuinermi malittarisassat malinneqarnissaat.
Uumasoq perlerulersimaguni qisimigut viruseqalersarpoq, taannalu kiisinermigut tunillaasinnaavoq imaluunniit assaat ikeqarpata attuunnerisigut tunillaasinnaalluni. Uumasoq tunillatsissimasoq perlerornermik nappaammik ersiuteqanngikkaluarluni sapaatip akunneri arlallit tunillaassuisinnaavoq.
Inuk terianniamik kiitissimaguni, piaarnerpaamik imermik qaqorsaaserlugu salinneqassaaq erngiinnarlu peqqinnissaqarfik attavigineqassalluni.
Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik ilisimatinneqarpoq sumiiffimmi terianniap toqunneqarfiani arlalinnik qimuttunik qimmeqartoq, taakkualu terianniamik paannissimasut.
Qimminik teriannianik ulluni qaninnerni paannittunik takunnittoqarsimaguni imaluunniit qimmit teriannianut attaveqarsimaneranik pasitsaassisoqarsimaguni ingerlaannartumik Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik attavigineqassaaq, taamaalilluni Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik iliuuseqarsinnaalissalluni.
Qimmeq perlerornermik nappaateqalersimasutut pasitsaanneqassaaq, ima iliuuseqalersimappat:
- tassanngaannaq kamassarissisarpat
- sakkortuumik kumittarpat
- nuakoorpat
- kamassarissusia allanngorarpat
- saassusserusuppat
- iisiniarnermik ajornartorsiuteqarpat
- pissusissamisuunngitsumik eqqissiviippat
- takusorisaminut kiiseriartarpat
- nujuarpat
- tamakkiisumik ilaannakortumilluunniit nukillaartalersimappat pingaartumik alleqqumigut uppatimigullu
- niaqquni pissusissarinngisaminik inissittarpagu
Kalaallit Nunaanni Uumasunut Nakorsaqarfik Inuussutissalerinermullu Oqartussaqarfiup kommune suleqatigalugu terianniamik takunniffimmi nunaminertamik assiaqutsiisimavoq qimmeqarfiusumi, pineqartumi nalunaaqutsersuisimalluni.
Nunaminertamut angallanneq killilersorneqassaaq qimmiutillit nerukkaaniartut qimminillu nakkutiginninniartut kisimik isersinnaalerlutik. Nunaminertami qimmit pituussaaqqasut tiguneqassapput pitunneqarlutillu.
Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik (UNIO) oqarasuaatikkut +299 34 50 00 imaluunniit mailikkut uumasut@nanoq.gl attavigineqassaaq.