Frelsens Hærip ukiuunerani angerlarsimaffeqanngitsunut neqerooruteqarnera Naalakkersuisut tapiissuteqarlutik tapersersorpaat

Frelsens Hærip ukiuunerani atugarliortunut angerlarsimaffeqanngitsunullu neqerooruteqarnera Naalakkersuisut tapersersorniarlugu toqqarpaat. Tapersersuinerup qulakkeerpaa, Frelsens Hærip Williams Cafeata ammasarfiisa sivitsorneqarnerat, taamaalillutik atugarliortut ulluunerani ornigassaqalerlutik. Tapersersuinerup peqatigalugu qulakkeerpaa, cafe ammarsarfinni sivitsorneqartuni nerisassanik neqerooruteqarsinnaalernera.

Issinnerata nalaani inersimasunut atugarliortut angerlarsimaffeqanngitsullu inuuneranni atugassarititanut immikkut annertuumik sunniuteqartarpoq. Ukiuunerani angerlarsimaffeqanngitsut illup iluaniinnissaminnut pisariaqartitsisarput. Taamaattumik Williams Cafemi neqeroorutit pilersinneqareersut Nuummi Frelsens Hærip neqeroorutigisai Naalakkersuisut tapersersorpaat.

”Ukiuunerani qaammatini angerlarsimaffeqanngitsut ullormut napaniarneri maluginiaqqissaarpakka. Angerlarsimaffeqanngitsut ukiup sinnerani, ukiuunerani – ataasinngornermiit tallimanngornermut ulluunerani angerlarsimaffeqanngitsut ornittagaqarnissaat, Naalakkersuisut aningaasaliissuteqarnermikkut qulakkeerpaat.” Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane oqaaseqarpoq, nangillunilu:

”Peqatigalugu aamma pingaaruteqarpoq erseqqissassallugu, cafemut tapersersuineq angerlarsimaffeqannginneq pillugu ajornartorsiummik aaqqiissutaanngimmat. Angerlarsimaffeqannginneq inuiaqatigiinni ajornartorsiutaavoq, aaqqiiviginiarlugu suliniutinik imminnut ataqatigiittunik amerlasuunik piumasaqaateqartoq. Naalakkersuisut kissaatigaat, Wiliams Cafemut tapersersuineq angerlarsimaffeqanngitsut ullup pitsaanerusumik ingerlanissaanut tapertaassasoq, neqeroorutit suliniutillu allat nukittorsarneri peqatigalugit.”

Naalakkersuisut ammasarfinnut tapiissutaat piffissami 27. februar 2024-miit 1. april 2024-p tungaanut, kiisalu piffissami 1. oktober 2024-miit 31. december 2024-ip tungaanut atuutissaapput. Williams Cafep ammarsarfini sivitsorpai. Taamaalilluni piffissami isumaqatigiissuteqarfiusumi ataasinngornerit talliamanngornerillu tamaasa nal. 11-16.30 immikkut ittumik ammasassalluni. Ulluni taakkunani ullup-qeqqanut kissartunik sassaallertoqartassaaq.

Williams Cafemi ammasarfik marlunngornermiit sisamanngornermut ullormut nalunaaquttap akunneranik ataatsimik sivitsorneqassaaq, taamaalilluni piffissami isumaqatigiiffiusumi ammarsarneq nal. 9.00 – 15.00-inngorluni.

Ammanerup nalaani nerisassat kiisalu kaffi tiilu saniatigut, internetimik atuineq akeqanngitsoq, uffarnissamut, atisanik errorsineq panersiinerlu, inuit akornanni katerisimaarneq (amerlasuutigut nallukattarneq) periarfissaapput. Tamatuma saniatigut inuit pisariaqartissinnaasaat pillugit qulaajaanermut ikiorsiiviginissaannullu atatillugu oqaloqatiginninnerit neqeroorutigineqarput.

Attaveqarfissaq

Erseqqinnerusumik paasisaqarusukkuit attaveqarit naalakkersuisup allattaanut Helene S. Pedersenimut e-mailikkut: hspd@nanoq.gl imaluunniit oqarasuaatikkut + 299 34 56 11