AtuartigukUkioq manna inuit pisinnaatitaaffiinut nersornaat
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
"Ataasinngorneq februaarip 26-ani Nauja Lyberth aammalu suleqatigiissitaliaq suleqatigiiffigisaat ukioq manna inuit pisinnaatitaaffiinut nersornaatisipput, Danmarkimi inuit pisinnaatitaaffiinut sullissivimmit tunniunneqartumik. Arnat spiralilersuisimanerup eqqumaffigineqalernissaanik sulissutiginninnerminnut ataqqinaatitut nersornaaserneqartussaapput. Nersornaat nuanninngitsunik tunngavilimmut tunniunneqartussaavoq. Spiralilersuisimaneq arnanut ataasiakkaanut, taakkua aappaannut inuiaqatigiinnullu pingaaruteqartorujussuusimavoq.
“Arnat taama nuanninngitsigisumik tunngavilimmik nersornaaserneqarmata pilluaqqunissaat nuanniitsutut misinnangajassinnaavoq, kisianni arnat suliamik ajornakusoortumik, tamatsinnut, kisiannili pingaartumik taakkununnga, sunneerujussuarsimasutut nalunngisatsinnik, qaqitsisimanerannut, Naalakkersuisut qutsavigerusuppaat. Tamatumani nukittunissaq sapiissuseqarnissarlu pisariaqarpoq” oqarpoq Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, Naalakkersuisut sinnerlugit. Naalakkersuisut sapaatip akunnerani kingusinnerusukkut spiralilersuisimaneq pillugu suliaqarnermi nutaarsiassanik saqqummiissapput, kisianni ullumi ulloq Nauja Lyberthip arnallu ulloraat.