AtuartigukStarlink pillugu oqallinnermut atatillugu oqaaseqaatit
Nassiussisuuvoq: Ineqarnermut Attaveqaasersuutinuullu NaalakkersuisoqarfikNittartakkatigut aviisi Sermitsiaq/AG, pingasunngornermi februaarip 14-iani ilanngutassiaqarpoq “Pasitsaassineq: Qaammataasiatigut attaveqaatit unioqqutitsilluni atorneqartut”, taannalu oqallisigineqangaatsiarluni. Tusass-ip akuersissutaata saniatigut qaammataasatigut attaveqaatit, soorlu Starlinki akuerineqassasoq pingaartumik kissaatigineqarpoq.
Tassunga tunngatillugu Ineqarnermut Attaveqaasersuutinullu Naalakkersuisoq Hans Peter Poulsen ima oqaaseqarpoq:
”Kalaallit Nunaanni illoqarfinnut, nunaqarfinnullu tamanut internetseqartitsisumik, oqarasuaateqartitsisumillu nalunaarasuartaatitigut attaveqaateqareerpugut. Nunatsinni nunatigut, silatigullu unammillernartut eqqarsaatigalugit tamanna ajalusoornaqaaq.
Suli pitsaanerulissasoq kissaatigineqarmat paasilluarsinnaavara. Taamaattumik Tusass pitsaanerulersitsiumalluni suliniuteqartarmat nuannaarutigaara. Ilaatigut Tusass-ip Starlink isumaqatigiissusiorfiginiarsarivaa. Paasivara Starlink isumaqatigiissusiornissamut soqutiginnilersissallugu unammillernartoq, neriuppungali Tusass-ip ilungersorluni suliniuteqarnera Kalaallit Nunaannut iluaqutaasussanngorlugu iluatsikkumaartoq.
Killuanik iluaqutigeriikkagut eqqornerlukkusunngilakka. Pilersuinermik qulakkeerinermut, nalunaarasuartaatitigullu attaveqaateqarnitsinni tamarmiusumi aningaasaqarnermut eqquinerlussinnaasumik unammilleqatigiilersitsinissarput mianersuutissavarput. Taakkua eqqorneqassappata sullissinerit ilaat, matumani oqarasuaateqarneq ilanngullugu, annaassavagut. Taassumap aamma kingunerisaanik nalunaarasuartaatitigut attaveqarnigut nunani allani soqutigisaqaqatigiinnit nakkutigineqalissapput. Namminneq soqutigisatik aallaavigalugit nalunaarasuartaatitigut attaveqaat suna sumi atorsinnaassaneripput, qanoq akigititaqassanersoq, qanorlu sivisutigisumik atorsinnaassaneripput aalajangissavaat. Taamaalilluni pilersuinermik qulakkeerinermut tamanna eqquissaaq.
Taamaattumik taamatut aalajangertigata eqqarsarluaqqaartariaqarpugut. Aalajangiineq kingunerlussappat, aalajangeereernerup kingorna allanngortinneqarsinnaassanngilaq.”
Ineqarnermut Attaveqaasersuutinullu Naalakkersuisoqarfiup erseqqissaatigissavaa, Tusass-ip akuersissutaa Kalaallit Nunaanni tamarmi atuummat, imaappoq aamma illoqarfiit nunaqarfiillu avataanni.
Qaammataasatigut attaveqaatinik neqerooruteqartartuni nutaani periarfissat, aarlerinartullu pillugit Naalakkersuisoqarfik nassuiaasiuleruttorpoq. Nassuiaat Inatsisartut upernaakkut ataatsimiinnerini Inatsisartunut nassiunneqassasoq pilersaarutaavoq.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl