Naalakkersuinermik ingerlatallit Ilulissani katersuupput

Naalakkersuinikkut Ataqatigiissaarisoqatigiit ukiumi ataatsimiinneq siulleq Ilulissani ulluni 21. aamma 22. februar ingerlatissavaat.

Naalakkersuinikkut Ataqatigiissaarisoqatigiit, Naalakkersuisunik borgmesterinillu tamanit inuttaqartoq, aallaaviatigut ukiumut marloriarlutik ataatsimiittarput. Ataatsimiinnerit siunertaraat Naalakkersuisut borgmesterillu pisortat ataatsimoorussaannik sammisanik naalakkersuinikkut oqaloqatigiittarfeqarnissaat.

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane, ataatsimiinnermi aqutsisuuvoq.

- Assut pingaartippara, imatut isikkulimmik oqaloqatigiittarfeqarnerput, sammisat kommuninut aamma Namminersorlutik Oqartussanut tunngasut pillugit naalakkersuinikkut oqaloqatigiissutigisinnaallugit. Pingaaruteqarpoq, nunami innuttaasut sapinngisamik pitsaanerpaamik sullinniarlugit pisortat suleqatigiinnissaat, Jess Svane oqarpoq.

Naalakkersuinikkut Ataqatigiissaarisoqatigiit ulloq 21. februar sammisaqarlutik ataatsimiissapput, tamatumalu kingorna naalakkersuinikkut ataqatigiissaarisoqatigiit ataatsimiinnerat ulloq 22. februar ingerlanneqassalluni.

Sammisaqarlutik ataatsimiinnermi ullormi oqaluuserisassani immikkoortut pingasuupput: utoqqarnut suliassaqarfik, inuit innarluutilinnut suliassaqarfik aamma kommunikredit. Naalakkersuinikkut

Ataqatigiissaarisoqatigiinni ullormut oqaluuserisassani ilanngullugu maanna pisut aallaavigalugit sammisanik amerlasuunik imaqassaaq, peqqissutsimut isumaqatigiissut 2023-meersumiit tunisassiornermut assingusumik atuarfiup piviusunngortinneqarnissaanut.

Naalakkersuisoq Jess Svane itisiliivoq:

- Pissanganartunik amerlasuunik sammisassaqarpugut Ilulissani naalakkersuinikkut ingerlatsisut ataatsimiinneranni oqallisigineqartussanik. Tamatta eqqumaffigaarput, kommunit pillugit aaqqissuussaaneq pillugu inuiaqatigiinni eqqartorneqangaatsiartoq. Sammisaq tamanna pillugu borgmesterillu oqaloqatigiissutiginissaa qilanaaraara aamma kommunit pillugit aaqqissuussaanermut tunngatillugu suleqatigiissitap inassuteqaatai aamma pisortat ataatsimoorussamik isumaginninnermut immikkoortortamik pilersitsinissaat pillugit oqaloqatigiinnissat.

Ukioq kingulleq naalakkersuinikkut ataqatigiissaarisoqatigiit suleqatigiissitamik pilersitsipput, kommunit pillugit aaqqissuussaanermut, kommuninut suliassanik nuussineq, innuttaasunik sullissineq pillugit inassuteqaatinik suliaqartussaq, kiisalu inatsit nutaaq akuersissutigineqarpat Namminersorlutik Oqartussat kommuninik qanoq ililluni ikorfartuissanersut. Suleqatigiissitaq naalakkersuinikkut ataqatigiissaarisoqatigiinnut ingerlaavartumik nalunaarusiortarpoq.

Annertunerusumik paasisaqassaguit, attaveqarfigiuk: Naalakkersuisup allattaa, Helene S. Pedersen på hspd@nanoq.gl