Nalunaq kuultisiorfissaq: Tusarniaalluni ataatsimiititsinerit naammassipput. Tusarniaaneq 1. marts 2024 tungaanut ingerlaannarpoq

Naalakkersuisunut ilaasortat, Naaja H. Nathanielsen aamma Kalistat Lund, ulluni 29. januar – 1. februar 2024 Kalaallit Nunaata Kujataani tamanut ammasumik tusarniaalluni ataatsimiititsinerni peqataapput.

Nalunaq kuultisiorfissaq pillugu VVM-imut aamma VSB-imut nassuiaatinut missingiutit tamanut ammasumik tusarniaassutigineqarnerat pissutigalugu tamanna ingerlanneqarpoq. Tusarniaalluni ataatsimiititsinernut siunertaavoq, ingerlatseqatigiiffiup najoqqutassaminik saqqummiussisinnaanissaa aammalu innuttaasut suliassamut apeqquteqarnissamut oqaaseqaatiminnillu saqqummiinissamut periarfissinneqarnissaat.

Narsarsuarmi, Tasiusami aamma Qaqortumi tusarniaalluni ataatsimiititsinerit ingerlanneqarput. Aamma Alluitsup Paani Nanortalimmilu tusarniaalluni ataatsimiititsinissat pilersaarutigineqarsimagaluarput, kisianni ulloq 31. januar sila pissutaalluni Qaqortumiit angallassinissaq ajornarluinnarsimavoq.

Taamaattumik Alluitsup Paani tusarniaalluni ataatsimiititsineq Qaqortumiit Alluitsup Paani kommunip allaffianut persuarsiorfiunngitsumik videukkut oqaloqatigiinnertut ingerlanneqarpoq. Nanortalimmi ulloq taanna kingusinnerusukkut tusarniaalluni ataatsimiititsineq qarasaasiatigoortumik isigaluni ataatsimiititsinertut ingerlanneqarpoq.

Ataatsimiititsinerit tamarmik immiunneqarput. Nipit immiunneqartut allattorneqassapput, nutserneqarlutik aammalu Naalakkersuisut tusarniaanermut nittartagaanni tamanut saqqummiunneqassallutik. Tusarniaanermut akissuteqaatit tiguneqartut nutserneqassapput aammalu tusarniaanermut nittartakkami ingerlaavartumik tamanut saqqummiunneqartassallutik. Tusarniaaneq pillugu annertunerusut atuakkat aammalu tusarniaanermut nittartakkami tusarniaanermut najoqqutassat aallugit.

Tusarniaalluni ataatsimiititsinerit naammassereeraluartut, tusarniaaneq ingerlaannarpoq. Tusarniaanermut akissuteqaammik nassiussinissamut killigitinneqarpoq 1. marts 2024.

Naaja H. Nathanielsen, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq oqarpoq:
“Ataatsimiititsinerni peqataalluni aammalu innuttaasunit apeqquterpassuit pitsaasut tusarlugit pissarsiaqarnarpoq. Suliffissanut periarfissat alapernaaffigalugit apeqqarissaartorpassuunerat pingaartumik nuannaajallaatigaara. Maannakkut tusarniaanerup ingerlanera naammassilluni ingerlassaaq aammalu neriuutigaarput amerlasuut tusarniaanermut akissuteqarnissaq piffissaqarfigiumaaraat”.

Kalistat Lund, Nunalerinermut, Imminut Pilersornermut, Nukissiutinut Avatangiisinullu Naalakkersuisoq oqarpoq:
”Avatangiisinut suliassaqarfimmut Naalakkersuisutut Kalaallit Nunaata kujataani innuttaasut Nalunaq kuultisiorfissaq pillugu innuttaasunik ataatsimiititsinernut peqataanissaminnik soqutiginninnerat takullugu nuannaarutigaara. Innuttaasut akuutinneqarnissaat pingaaruteqartunut ilaavoq, pingaartumik nunap iluani piiaasoqassatillugu taamatut suliamik ingerlatitsinermi. Narsarsuarmi, Tasiusami, Alluitsup Paani, Nanortalimmi Qaqortumilu innuttaasut pitsaasunik pilersitsiviulluartunillu apeqquteqarput qisuariaateqarlutillu.”

Attaveqarfissaq
Tusagassiortunit saaffiginninnerit: Naalakkersuisoqarfimmi pisortaaneq, Jørgen T. Hammeken-Holm oqarasuaat 346800 imaluunniit Naalakkersuisup allattaa Manasse Berthelsen oqarasuaat 548868
Saaffiginninnerit allat: Aatsitassanut Ikummatissanullu Aqutsisoqarfik, mlsa@nanoq.gl