Tusagassiortut kalaallisut oqaasillit pillugit Naalakkersuisut KNR-illu suleqatigiinnerat pillugu

KNR-ip nutaarsiassiinermut immikkoortortaqarfiani tusagassiortut kalaallisut oqaasillit atorfeqaannartinnissaat unammilligassaqartoq Naalakkersuisut KNR-illu siulersuisuisa arajutsinaveersaarpaat. Inatsisit naapertorlugit aamma akisussaaffiit sumi inissinneqarnerat naapertorlugit unammilligassat susassaqarfinni assigiinngitsuni inissisimapput. Taamaattumik unammilligassat assigiinngisitaartut susassaqarfinni eqqortuni suliarineqarnissaat isumaqatigiissutigineqarpoq.

Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Aqqaluaq B. Egede aamma KNR-ip siulersuisuinut siulittaasoq Mette Steenholdt juni 2023-imi ataatsimiipput, tassanilu isummiunneqarpoq KNR-ip tamanna nammineq pisariaqartutut nalileruniuk nammineerluni suleqatigiissitamik pilersitsisinnaasoq. Siulersuisut oktobarip 27-ani 2023-imi nalunaarput suleqatigiissitaliornermut taarsiullugu suliffeqarfimmut anguniagassaliornermi ajornartorsiutip aaqqiivigineqarnissaa ilanngunneqarpat tulluartinnerutikkitsik, tassanilu tusagassiortut kalallisut oqaasillit atorfeqaannarnissaannut atorfinitsinneqartarnissaannullu apeqqut aamma KNR-ip illutai ilaatigut ilaatinneqassapput.

Nutaarsiassiinermut immikkoortortaqarfimmi tusagassiortut atorfeqaannarnerat atorfinitsinneqartarnerallu:
Sulisut suliffimminni naammagisimaarinninnerannik misissuinermi angusat tunngavigalugit immikkoortortani tamani suliffimmi isumannaallisaanikkut pissutsit pitsanngorsarniarlugit sulineq KNR-ip pisortaasa 2023-mi ukiakkut aallartippaat. Misissuinermi angusat tunngavigalugit sulisut atorfeqaannarnissaat siunertaralugu nutaarsiassiinermut immikkoortortaqarfimmi sulinermi atukkat pitsanngorsarniarlugit sulisullu suliffimminni naammagisimaarinninnerat qaffatsinniarlugu immikkoortortaqarfiup iliuusissatut pilersaarutit inerisarpai. Ukiunimi kingullerni marlunni tusagassiortut 15-it nutaarsiassiinermut immikkoortortaqarfimmi atorfinitsinneqarput, atorfinikkaluartulli amerlanerpaat atorfitik qimareerpaat. Suliamut aallartinneqartumut piffissaq atorneqaqqaartariaqarpoq, tamannalu ilorraap tungaanut aallariarneruvoq.

Sulisut 97-it KNR-ip atorfeqartitarimmagit puigorneqassanngilaq, taakkuninngalu tusagassiortut kalaallisut oqaasillit 13-iupput, KNR-ip aallakaatitsiviini arlalinnut agguataarsimallutik, KNR-illu sinnerani sulisut suliffimminnik naammagisimaarinninnerat qaffasinneruvoq, tamannalu siunissami suliaqarnissami aallaavissatsialaavoq.

Sulisussaaleqinerup nalaani nutaarsiassiinermut immikkoortortaqarfimmi nutaarsiassiisarneq unittoortikkumanagu sulisut suleruluttarput. Suliamik pimoorussineq taamaattoq nersorniarneqartariaqarpoq. Tamanna ilutigalugu KNR-ip pisortaasa sulisuisalu aaqqiissutissat suliniutillu nutaat ingerlaavartumik suliaraat, tamannalu ilutigalugu KNR-imi atorfinitsitsinissaq siunertaralugu ingerlaavartumik allagarsiisoqartarpoq.

Naak tusagassiortunik kalaallisut oqaasilinnik kajungerinnittunngortitsiniaaneq ilungersunarlunilu sivisuumik suliassaagaluartoq, suliffeqarfiillu namminersortut pisortallu suliffeqarfiisa angisuut akissarsiaqartitsinerannut qaffasissumut KNR-i unammillersinnaanngikkaluartoq, nutaarsiassiisarneq pissarsinartutut pissanganartutullu tusagassiortutut sulinikkut KNR-ip anguniagaraa.

Ukiunut sisamanut suliffeqarfimmut periusissiap ilusilerneqarnissaa KNR-imi pisortat sulisullu maannakkorpiaq suliaraat, qulequttallu taaneqartut qitiutillugit ukkanneqartussat tassaniissapput.

KNR-ip ilumini suliassaasa saniatigut immikkut soqutigisaqartut pingaaruteqartut patajaatsumik suleqatigalugit pitsaanngitsumit pitsaasup tungaanut inerisaanissaq pisariaqarpoq. Allannguinissamut Naalakkersuisut ataavartumik pimoorussinerat soqutiginninnerallu KNR-ip immikkut pingaartippaa.

Akissarsiat:
Tusagassiortut teknikerillu Namminersorlutik Oqartussani kommuninilu atorfeqartut isumaqatigiissutaat atuuttoq marsip 31-ani 2024-mi naassaaq. Isumaqatigiissummi tassani Namminersorlutik Oqartussani kommuninilu 2022-mi atorfiit 16-it missaat inuttaqarput. KNR-imi inuit 44-t missaat atorfeqarput. Isumaqatigiissut taanna malillugu atorfeqartut akissarsiaasa misissornerisigut kommunini atorfeqartut qaammammut 3.500 kr.-nik KNR-imi atorfeqartunut naleqqiullutik akissarsiakinnerupput. Namminersorlutik Oqartussani sulisoq qaammammut 2.300 kr.-nik KNR-imi sulisumit akissarsiaqarneruvoq. Naleqqiussinermi atorfeqarnerup sivisussusia ilanngunneqanngimmat erseqqissaassutigineqassaaq. KNR-imi sulisoq Namminersorlutik Oqartussani sulisumit atorfeqarsimanermigut sivikinnerusumik sulisimasoq Namminersorlutik Oqartussaniittumut atorfimmut nuukkuni qulaani taaneqartup angeqqataanik qaffaavigineqarnavianngilaq.

Qulaani isumaqatigiissutit isumaqatigiinniutigineqarneranni immikkoortut isumaqatigiissummik atuisuusut sulisitsisut akissarsianut piumasaqaatissaannut tunngatillugu tusarniarneqartarnerat nalinginnaasuuvoq. Tamatumani KNR tusarniaanermi oqaaseqaateqartussat pingaartortaraat, aamma KNR Aningaasaqarnermut Sulisoqarnermullu Aqutsisoqarfiup isumaqatigiinniarnerani issiaqataasarpoq Tusagassiortut Peqatigiiffiat (TP) illuatungeralugu.

Taamatullu sulisut kattuffiisa ilaasortatik isumaqatigiinniarnermi piumasaqaatissanik siunnersuusiortittarpaat. Pisortat isumaqatigiinniarneranni politikkikkut piumasaqaateqartarneq nunatsinni isumaqatigiinniarnerni ileqquunngilaq – akerlianilli tamanna sulisitsisut sulisullu akornanni aaqqinniarneqartarpoq. Isumaqatigiinniarnerni isumaqatigiinniarnerit tusagassiuutitigut ingerlanneqaratik illuatungeriit akornganni ingerlanneqartarnerat aamma ileqquuvoq. Sulisut kattuffiisa KNR-illu kiisalu sulisitsisut allat sulisunillu isumaqatigiissut pineqartoq malillugu atorfinitsitsisarneq atorfeqartunillu atorfeqaannartitsisinnaaneq immikkut ukkatarineqassasut Naalakkersuisut naatsorsuutigaat. Nunatsinni tusagassiortunngorniarluni ilinniakkamik naammassisaqartartut amerlanngeqisut procentiisa qaffannissaat isumaqatigiinniarnerit toqqaannartumik sunniiffigisinnaanngilaat; Aningaasaqarnermut Sulisoqarnermullu Aqutsisoqarfimmut ajornartorsiutip tamatuma pingaaruteqarnera Tusagassiortut Peqatigiiffiata nalunaarutigisimavaa.

Tusagassiortunngorniarluni ilinniagaq mikisuuvoq, ukiullu tallimani (2026-2022) bachelorit 25-t ilinniakkaminnik naammassinnissimapput. Maannakkut tusagassiortunngorniartut 13-iupput. 2020-mi nutaatut ingerlatitseqqiinermik tusagassiornermilu masteritut ilinniagaq pilersinneqarpoq. Ilinniagaq ukiumik ataatsimik sivisussuseqarpoq suliutigalunilu aamma ilinniarneqarsinnaalluni. Ilisimasaqarfiit akimorlugit ilinniartussarsiornikkut inuit ilisimatusarnermik ilinniagaqartut aamma ingerlatitseqqiinermik tusagassiornermillu soqutigisaqartut ilinniakkami aallaartissinnaanerat qulakkeerniarneqarpoq. Ilinniakkami assigiinngitsunik tunuliaquteqartut ilinniartussarsiarinerisigut tusagassiortunik ingerlatitseqqiisinnaasunillu pisariaqartitsineq ikiorserniarneqarpoq, inuimmi allanik ilinniagaqarsimasut ilinniakkamut qinnuteqarsinnaatitaammata. Pingasut ilinniagaq taanna naammassisimavaat, maannakkullu ilinniartut arfiniullutik.

Kiisalu KNR-ip sulisumi akissarsiaannik namminersornerulluni aalajangersuisinnaanerata pitsaaqutaanik ajoqutaanillu nalilersuinermik suliaq maannakkut ingerlammat Naalakkersuisut ilisimatitsissutigisinnaavaat. Tassunga atatillugu inatsisitigut, aningaasaqarnikkut unammilleqatigiinnermullu tunngasut eqqarsaatigineqassapput.

Illutassaq:
KNR-i illutassaminik nutaamik pisariaqartitsivoq, ukiullu ingerlanerini tusagassiorfiit illutassaannik nutaamik sanaartornissaq qanoq akeqassanersoq pillugu misissueqqissaarnerit naatsorsuinerillu suliarineqartarsimapput. Tusagassiorfiit illutassaata nutaap suliffiit pilerinartut sulinermilu atugassarititaasut pitsaanerusut pilersissavai. Ilisimasanik avitseqatigiinnikkut sunneeqatigiinnikkullu sunniutinik immikkoortut kisimiillutik pilersissinnaasaannik annertunerusunik pilersitsisinnaaneq tusagassiorfiit illutassaata nutaap nukittorsassavaa, taamatullu suliffiit suliffeqarfiillu akimorlugit suleqatigiinneq, tusagassiornerup qaffannissaa isornartorsiuillunilu aamma itisilerilluni tusagassiineq nukittorsassallugu.

Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq KNR-ilu illutassaq nutaaq pillugu ataatsimiittarsimapput. KNR-ip nutaamik illutaqalernissaa qulakkeerniarlugu sulinissaq suli qulakkeerniarneqartoq isumaqatigiissutigineqarpoq. Sanaartornissamut pilersaarut 2016-imeersoq pigineqarpoq, taassumalu ullumikkut pisariaqartinneqartunut naleqqussarneqarluni nutarterneqarnissaa pisariaqarpoq, aamma naatsorsuinerit akinillu missingersuutit naleqqussartariaqarput. Sanaartugassatut pilersaarutip pisariaqartinneqaqqissaartunut naleqqussarneqarnissaata pisariaqarnera isumaqatigiissutigineqarpoq. Tusagassiorfiit illutassaata nutaap sanaartorneqarnissaanut periarfissat misissorneqarnissaat Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisup KNR-illu taamaalillutik misissorpaat.

Inussiarnersumik


Kalaallit Nunaata Radioa – KNR,
Siulersuisunut siulittaasoq Mette Steenholdt
Ilinniartitaanermut, Kultureqarnermut,
Timersornermut Ilageeqarnermullu Naalakkersuisoq
Aqqaluaq B. Egede


KNR-ip pisortaa Annga Lynge
Toqq/direkte 36 15 00
aly@knr.gl

Paasisaqarnerorusukkuit attavigisinnaavat Rosa Thorsen, allatsi Toqq. 34 57 02 rose@nanoq.gl