Naalagaaffinngornissamut Nunanullu Allanut Naalakkersuisup Vivian Motzfeldtip, oqaluttuarisaanermik qulaajaaneq nunanilu avannarlerni suleqatigiinnermik naliliineq danskit Ilinniartitaanermut Ilisimatusarnermullu ministerialu Nunanilu Avannarlerni suleqatigiinnermut ministerialu oqaloqatigiissutigai

Naalakkersuisoq Vivian Motzfeldt sammen med Minister Christina Egelund tekst: GL Naalagaaffinngornissamut Nunanullu Allanut Naalakkersuisoq Vivian Motzfeld danskit Ilinniartitaanermut Ilisimatusarnermullu ministeriat Christina Egelund peqatigalugu

Naalagaaffinngornissamut Nunanullu allanut Naalakkersuisoq Vivian Motzfeldt danskit Illoqarfinnut Nunallu immikkoortuinut oqaluffinnut, Nunanilu avannarlerni suleqatigiinnermut Ministeri Morten Dahlin kiisalu Ilinniartitaanermut ilisimatusarnermullu Ministeri Christina Egelund ataatsimeeqatigissallugit Københavnimiippoq.

Naalakkersuisup Vivian Motzfeldtip ulloq 26. januar danskit Ilinniartitaanermut ilisimatusarnermullu ministeriat Christina Egelund oqaluttuarisaanermik qulaajaaneq kiisalu ilisimatusarneq pillugu nalinginnaasumik suleqatigiinneq pillugu ataatsimeeqatigaa.

Naalakkersuisut qallunaallu naalakkersuisuisa ulloq 9. juni 2022 oqaluttuarisaanermik qulaajaanissaq pillugu ataatsimut oqaaseqaat atsiorpaat, kingornalu suliakkiissut pillugu isumaqatigiissut ulloq 22. juni 2023 Naalakkersuisut siulittaasuata Ilinniartitaanermut ilisimatusarnermullu ministerilu Christina Egelundip isumaqatigiissutigaat.

Oqaluttuarisaanermik qulaajaanissaq Naalakkersuisut qallunaallu naalakkersuisuisa 2022-mi juunimi isumaqatigiissutaat, sorsuunnersuaq kingulliup kingorna Kalaallit Nunaata Danmarkillu attaveqatigiinnerannik qulaajaanissamik siunertaqarpoq. Ilisimatusarnermik suliniut Ilisimatusarfimmut aallaaveqartinneqartoq politikikkut aalajangikkanik pisunillu pingaarutilinnik Kalaallit Nunaata ineriartorneranut sunniuteqartunik, Kalaallit Nunaata Danmarkillu attaveqatigiinnerannik imaluunniit kalaallinut innuttaasunut sunniuteqartunik tunngassalluni.

Ataatsimiinnermi qulaajaanissamut ilisimatusarnermi siulersuisussanik toqqaanissamik suliniarnerup killiffia oqaloqatigiissutigineqarpoq, tassanilu Naalakkersuisup Vivian Motzfeldip ilisimatusarnermi siulersuisussat annertuumik Kalaallit Nunaannut attuumassuteqarnissaata pingaarutaa erseqqissarpaa, taamaalilluni oqaluttuarisaanerup Kalaallillu Nunaata Danmarkillu akornanni oqaluttuarisaanerup attaveqarnerullu kingunerinik annertuumik misigisaqarsimanissap pingaarutaa.

Naalakkersuisoq ima oqarpoq:
”Ilisimatusarnermi siulersuisussat ilisimatusartullu inunnik nunatsinni pissutsinut oqaluttuarisaanermillu attuumassuteqarlutillu paasinnissimanissaat pingaaruteqarpoq, taamaalilluni innuttaasut oqaluttuaat misigisaallu oqaluttuarineqarlutillu innuttaasut nammineq pineqartutut misigitillugit ingerlateqqinneqarsinnaaqqullugit.”

Ilisimatusarnermi pisortamik toqqaaneq Naalakkersuisut danskillu naalakkersuisuisa qanimut oqaloqatigiinnerisigut pissaaq, Vivian Motzfeldillu Christina Egelundillu qulaajaanerup piaarnerpaamik aallartinneqarnissaata pingaarutaa, taamaattoq ilisimatusarnermi pisortat eqqortut toqqarneqarnissaasa pingaartuunera peqqissaarunneqarnissaalu isumaqatigiissutigaat.

Taamattaaq Naalagaaffinngornissamut Nunanullu allanut Naalakkersuisup Vivian Motzfeldtip Danmarkip Nunani Avannarlerni Suleqatigiinnermut ministeria Morten Dahlin ataatsimeeqatigaa, tassanilu ilaatigut Naalakkersuisut Kalaallit Nunaata Nunani Avannarlerni suleqatigiinnermut peqataanerannik nalilersuinissaat ilisimatitsissutigaa.

Naalakkersuisoq ima oqarpoq:
”Ukiarmi Kalaallit Nunaata siunissami qanoq ililluni Nunat Avannarliit Siunnersuisooqatigiivini Nordisk Ministerrådimilu iluaquteqarnerusinnaanera pillugu Inatsisisartut apeqquteqaat aallaavigalugu oqallisissiaq suliaraat. Naalakkersuisut nunani avannarlerni suleqatigiinnermi sulinermik nalilersuinermik aallartitsinissaat Inatsisartuni partiit tamarmiusut isumaqatigiissutigaat, tassani Nordisk Ministerrådimi Nordisk Rådimilu immikkoortut sorliit pingaarnerutinneqarnissaannik kaammattuutinik saqqummiussinissaat ilanngullugu”.


Paasissutissat erseqqinnerusut naalakkersuisup allattaanut Naasunnguaq Beck Kristensenimut e-mail nabk@nanoq.gl saaffiginninnikkut pissarsiarineqarsinnaapput.

Naalagaaffinngornissamut Nunanullu Allanut Naalakkersuisoq Vivian Motzfeld danskit Illoqarfinnut Nunap Immikkoortuinut Ilagiinnut Nunanilu avannarlerni Suleqatigiinnermut ministeriat Morten Dahlin peqatigalugu