Misilitsinnermut malittarisassat allanngortut

Augustip aallaqqaataa aallarnerfigalugu ilinniartut ingerlaqqiffiusumik ilinniartut oqaatsinik unamminartorsiortut misilitsinnerminni ikiortissinnaalissapput.

Soraarummeernermi oqaatsinik atuinermut tunngatillugu nalunaarummi nutaasumi erseqqissarneqarpoq pisariaqarpat soraarummeertoq oqaluttariarsorluni soraarummeernermi oqaatsitigut ikiorneqarnissamik neqeroorfigineqassasoq, soraarummeertussap soraarummeernermi oqaaserineqartussatut qinnuteqaataa itigartinneqarsimappat.

Ilinniartitaanermut, Kultureqarnermut, Timersornermut Ilageeqarnermullu Naalakkersuisup Aqqaluaq B. Egedep allannguutit qilanaarai:

- Ingerlaqqiffiusumik ilinniarfinni ilinniartut oqaatitsigut ikiorserneqarsinnaalernissaat nuannaarutigaara. Naalakkersuisut ilinniartut periarfissaanik pitsanngorsaanissartik anguniarpaat nalunaarummilu nutaami ilaatigut oqaatsitigut ikiorneqarsinnaanermik, ilinniartunut timimikkut tarnimikkulluunniit piginnaasakillisimasunut immikkut ittunik misilitsinnermi atugassarititaasunik malittarisassanik imaqartup amerlanerusut ilinniakkaminnik naammassinnittarnissaanik aqqutissiuussissasoq, Naalakkersuisoq oqarpoq.

Malittarisassat eqqaaneqareertut saniatigut nalunaarummi allannguutit ukuupput:

• Misilitsinnermi misiliinerit amerlassusaat allanngortinneqarput. Ilinniartoq misilitsinnermi nalilersuinermiluunniit allami angusinissaminut suli pingasoriarluni misiliisinnaavoq, aalajangersagarli allanngortinneqarpoq ilinniarfik pisuni immikkut ittuni misileeqqittoqarnissaanik akuersisinnaammat.
• Misilitsinnissamut nalunaaruteqartarneq pillugu aalajangersagaq allanngortinneqarmat. Aalajangersagaq allanngortinneqarpoq, taamaalillunilu ilinniartoq ilinniartitsissummut imaluunniit ilinniartitsissutip ilaanut ataatsimik arlalinnilluunniit misilitsiffiusussanut nalunaarsorsimagunik misilitsinnissamut imaluunniit misilitsinnissanut ingerlaannartumik nalunaarsorneqartalerluni. Ilinniartoq misilitsinnermut peqataanngippat nalunaarsorsimajunnaartoqarsinnaanngilaq misilitsinnertullu atortinneqassalluni. Ilinniarfeqarfilli immikkut ittunik pissutissaqarpat, tassunga ilanngullugit erninermut atatillugu atuanngiffeqartoqarpat, napparsimasoqarpat, qaniginerpaasani napparsimasoqarpat toqusoqarsimappalluunniit il.il. immikkut ittumik akuersissuteqarsinnaavoq.
• Censori misilitsitsisorlu naliliinerup nalaani saqqummiineq karakteeriliinerlu pillugit, naammagittaalliuuteqartoqassagaluarpat naammagittaalliuutip suliarinissaanut atugassanik allattuissasut, allattukkallu minnerpaamik ukiumi ataatsimi imaluunniit naammagittaalliuut pillugu suliap naammassineqareernissaata tungaanut toqqortaatigineqassasut aalajangersarneqarpoq.

Ulloq 1. august aallarnerfigalugu ilinniarfinni ingerlaqqiffiusuni misilitsinneq censoreqartarnerlu pillugit malittarisassat nutaat. Namminersorlutik Oqartussat inatsisinut nittartagaani nalunaarut saqqummiunneqassaaq: Ilinniarfinni ingerlaqqiffiusuni misilitsittarneq censoreqartarnerlu pillugit Namminersorlutik Oqartussat nalunaarutaat nr. 1, 11. januaari 2024-meersoq.

Nalunaarutip Ilisimatusarfimmi ilinniagaqarnerit soraarummeertarnerillu pillugit Namminersornerullutik Oqartussat nalunaarutaat 1995-imeersoq aamma Ilisimatusarfimmi nalileeqataasoqartarnissaa pillugu Namminersornerullutik Oqartussat nalunaarutaat 1990-imeersoq taarsissavai. Nalunaarutit atuuttut qangarnisanngorneri peqqutaallutik nutaamik nalunaarusiortoqarpoq.

Tusagassiuutinut nalunaarut pillugu apeqqutissaqartoqarpat naalakkersuisup allataanut, Rosa Thorsenimut uunga 34 57 02 aamma rose@nanoq.gl-imut saaffiginnittoqarsinnaavoq.