AtuartigukTakornariaqarneq pillugu ikaarsaarnermi periusissiaq 2023-2024
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Naalakkersuisut Nuna tamakkerlugu Takornariaqarnermut periusissiaq ”Takornariaqarneq pillugu ikaarsaarnermi periusissiaq 2023-2024”-mik qulequtserlugu saqqummerseqqammerpaat.
Periusissiami 2025-p tungaanut iliuusissat 11-t allaaserineqarsimapput, taakkualu takornarialerinermii sinaakkutinik pitsanngorsaasuussapput. Ikaarsaarnermi periusissiaq takornariaqarnerup iluani suliaqartut arlallit peqatigalugit suliarineqarsimavoq. Naalakkersuisunillu peqataasut tamarmik qutsavigineqarput, taakkuami iliuuserineqartussat pillugit pisariaqartitanik takutitsimmata.
”Naalakkersuisut mittarfittaarnikkut anguniagaraat, iluaqutissat tamanut sunniuteqarnissaat. Takornariaqarneq pillugu periusissiami anguniagaq tamanna anguniarneqarpoq. Takornariaqarnerulernissaanut naatsorsuutit isertitsiffiunerullutillu suliffissaqartitsinerussapput. Oqimaaqatigiinnissaallu qulakkeertariaqarparput, tassami takornariaqarneq pinngortitatsinnut ajortumik sunniinissaa aammalu sumiiffinni inuiaqatigiit nammassinnaasaat sipporneqannginnissaat anguniarneqartariaqarmat. Taamaattumik periusissiami piujuartitsineq pisariaqartumillu killilersuineq aamma ukkatarineqarput. Naalakkersuisut periusissiami iliuuserineqartussanut suliaq aallartereerpaat, imarisaalu pillugit suliassaqarfimmi inuussutissarsiutillit innuttaasullu oqaloqatiginissaat qilanaaraara.” Naaja H. Nathanielsen oqarpoq.
”Takornariaqarneq pillugu ikaarsaanermi periusissiaq 2023-2024” naalakkersuisoqarfiup naalakkersuisut.gl -imi quppernerat aqqutigalugu saqqummersippaat.
Sukumiinerusumik paasissutissanik perusuttunut attavissaq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik. Email: isiin@nanoq.gl, oqarasuaat +299 34 50 00.
Siunnersortaaneq Salik Hard, e-mail: sard@nanoq.gl
Naalakkersuisoqarfimmi pisortaq Jørgen T. Hammeken, e-mail: joeh@nanoq.gl