Naalakkersuisut tusarniutigineqartumut piffissaritinneqartoq aalajangiussimavaat

Naalakkersuisut aalisarneq pillugu inatsisissatut siunnersuutaat nutaaq maannakkut sapaatit akunnerini arfinilinni tusarniutigineqalerpoq, Sermitsiamilu januaarip 11-anni 2024-mi saqqummersumi taanna pillugu allaaserinnittoqarnera pillugu oqaaseqarfigerusuppara.

Tusarniaanermi piffissarititap sivitsornissaanik kissaateqartoqarpoq. Tamanna pillugu oqaatigiinnarneqassaaq siunnersuut UPA2024-mi suliarineqassasoq Naalakkersuisut aalajangersimavaat, nalinginnaasumillu sapaatit akunnerini sisamani tusarniaasoqartaraluartoq.

- Naalakkersuisulli ataatsimiinnerup aallartinnissaanut piffissaq sivikingaatsiaraluartoq sapaatit akunnerinik arfineq pingasunik piffissaliisoqarnissaanik Naalakkersuisut aalajangiipput. Tassa tusarniaanermi piffissarititap nalinginnaasup marloriaataanik sivisuneruvoq – juullikkunnilu sulinngiffiit ullut pingasut ilanngullugit, Kim Kielsen oqarpoq.

Kattuffiit - pingaartumik Sulisitsisut – inatsit siunnersuutigineqartutut isikkoqartillugu akuerineqarpat annertuunik kinguneqartussaanera inuussutissarsiummiillu kingunissaasa taakku isummerfiginnissaannut piffissaqarluartariaqarneq tunngavilersuutigalugit tusarniaanermi piffissarititap sivitsorneqarnissaa kissaatigaat.

Kattuffiit inatsisissatut siunnersuut sioqqullugu misissueqqissaarnermi oqallinnernilu annertuumik akuupput. Assersuutigalugu Sulisitsisut Aalisarneq pillugu Ataatsimiititaliarsuarmi 2019 sioqqullugu ilaasortaatitaqarput. Tassani immikkoortut amerlanersaat siunnersuummi maannakkut ilanngunneqartut misissorneqaqqissaarneqarput oqallisigineqarlutillu.

Ataatsimiititaliarsuup isumaliutissiissutaa septembarimi 2021-mi saqqummiunneqarpoq, tassa ukiut marluk sinnerlugit matuma siorna, soqutigisaqartullu tamarmik ataatsimiititaliarsuup sulinerani tamassumalu kingorna suliniutaasinnaasunik namminneq naatsorsuinissamut periarfissaqarput. Naalakkersuisut tamassuma kingorna aalisarneq pillugu inatsisissaq nutaaq pillugu Ilulissani Nuummilu aalisarneq pillugu isumasioqatigiissitsipput, nunami tamarmi innuttaasunik ataatsimiititsillutik soqutigisaqartunillu tamanik ataatsimeeqateqartarput. Isummat tassunga atatillugu saqqummiunneqartut inatsisissatut siunnersuutip suliarinerani aamma ilanngunneqartarlutik.

Sulisitsisut oqaaseqaateqarfineqartariaqartunik isummanik saqqummiipput:

Oqaatigineqarpoq naalakkersuisoqarfiup siunnersuummi naatsorsuinernik allagaatinik takunnissinnaanermik qinnuteqaat itigartikkaa. Piviusoq tassaavoq siunnersuummi tunngaviit arlalissuit inatsisissatut siunnersuummut nassuiaatini takuneqarsinnaammata, naalakkersuisoqarfillu atortunik amerlanerusumik Sulisitsisunut nassiussaqartoq. Kisianni pisortat ingerlatsinerat pillugu Inatsisartut inatsisaat malillugu inatsimmik piareersaaneq, uani pineqartoq, allagaatinik takunnissinnaatitaanermi ilaanngilaq.
Sulisitsisut tamassuma saniatigut oqaatigaat, ”raajanik aalisakkanillu pisuussutit piginnittunut amerlanernut siammarnerisigut amerlinavianngitsut”. Sulisitsisut tassani ilumoorput, tamannali siunnersuummi pineqanngilaq.

Avataasiorluni aalisarnermi pisuussutinik piginnittuunerup amerlanernut siammarneqarnissaa Naalakkersuisut kissaatigaat, tamannali isumaqanngilaq aalisariutit amerlanerusut aalisalersinneqassasut. Akerlianik aalisariutinik piginnittut amerlanerulissapput.

Pisuussutinik piginnittut siammarnissaat aamma pitsaasumik aningaasaqarnissaq atugarissaarnitsinnut annertuumik tapersiinissamut pisariaqartoq siunnersuutikkut angussavagut.Taakku tamaasa Sulisitsisut ilisimavaat

Aalisakkanik pisuussutit inuiaqatigiit pigaat, siunnersuullu taamaammat inuiaqatigiinni tamanut tusarniutigineqarpoq taamaalilluni akerliussutaasinnaasut siunnersuutillu siunnersuummik pitsannguisinnaasut ilanngunneqarsinnaapput. Taamaaliornikkut inaarutaasumik siunnersuummi siunertap annertunerpaamik eqqortinneqarnissaa qulakkiissavarput, tassa ataatsimut pisuussutitsinnik pitsaanerpaamik aqutsinermut sinaakkusiinissaq, Kim Kielsen naggasiivoq.

Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfik attavigineqassaaq, e-mail: apn@nanoq.gl