Naalakkersuisut isumaginninnermut suliniutaasa ilaattut sukkunut akitsuutit atorunnaarsinneqarput aamma ineqarnermut tapiissuteqartarneq pitsanngorsarneqarpoq

November 2023-mi Naalakkersuisut angusaqarluarniarlutik ilaqutariit meerartalinnut isumaginninnermut tunngasumik ataatsimut suliniummik aallartitsipput. Isumaginninnermut suliaq tamanna, piffissami amerlasuut aningaasaqarnikkut ajornartorsiorneranni, ilaqutariit meerartalinnut inuunerinnissaannut aamma iluaqutsernissaannut siunertaavoq.

Isumaginninnermut suliniutip siullersaa juullilertinnagu pereerpoq, tamatumani december 2023-mi isertitat tunngavigalugit meeqqamut ataatsimut immikkut ittumik meeqqanut 1000 kr.-nik tapiissuteqarneq akuerineqarluni. Isumaginninnermut suliniutip aappassaa juullilertinnagu aamma Naalakkersuisunit akuerineqarpoq. Tamatuma akuerineqarnissaa ukioq qaangiunneranut utaqqisariaqarsimavoq, Aningaasaqarnermut Akileraartarnermullu Ataatsimiititaliap ukioq aningaasanut inatsisiliorfiusumi piginnaasanik amigaateqarmat, taamaammallu ukioq manna nutaami aatsaat suliniutit akuerisinnaallugit.

Taamaammat Naalakkersuisut sinnerlugit nuannaarutigalugu ilisimatitsissutigisinnaavara, 1. januar 2024-mit sukkunut akitsuutit atorunnaarsinneqarnissaat aamma ineqarnermut tapiissuteqarnermi appariartuaartitsinermut killiliussat qaffanneqarnissaat Aningaasaqarnermut Ataatsimiititaliamit 11. januar 2024-mi akuerineqartut. Taamaasilluni Naalakkersuisut isumaginninnermut suliniutaattut aappassaat atulersinneqarpoq. Suliniutip aappassaani uku imarineqarput:

Sukkunut akitsuutit ukiorpaalunni politikikut oqallisigineqarput, Naalakkersuisullu naatsorsuutigaat, akitsuutit atorunnaarsinneqarnerani innuttaasut ulluinnarni inuunerannut pitsaasumik kinguneqassasoq. Taamatut aalajangiineq innuttaasutta ulluinnarni inuunerannik pitsannguinissamut aamma aningaasaqarnikkut periarfissaannik pitsannguinissamut alloriarneruvoq. Tamatumanili aamma niuertarfiit akinik aaqqiinissaat tunngavigineqarpoq.

Ineqarnermut tapiissutit attartuinerup ilaattut tapiissutaapput, attartuinerup ilaannik ineqarnermut tapiissutitut akilersuutaasartut, inoqutigiit katillugit isertitai akileraaruserneqanngitsut tunngavigalugit appariartuaartinneqartartut. Ineqarnermut tapiissutit annertussusai aamma inoqutigiit meeraqarnersut apeqqutaatillugit qaffasissuseqarput. Aningaasaqarnermut Akileraartarnermullu Ataatsimiititaliap akuersinera tunngavigalugu, appariartuaartitsinermut killigititat atuuttut 1. januar 2023-mi killigititat atuuttunit 10.000 kr.-nik qaffanneqarput. Ineqarnermut tapiissutit qaffanneqarnerani aningaasartuutit kommuninit isumagineqassapput. Kommunit aningaasartuutinut taakkununnga taarsiiffigineqassapput. Akisussaaffik Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfimmit isumagineqassaaq.

Naalakkersuisut Inatsisartuni Aningaasaqarnermut Akileraartarnermullu Ataatsimiititaliaq tamatuminnga suliaqarneranut qujarusupput.

Aningaasaqarnermut Akileraartarnermullu Naalakkersuisoq ima oqaaseqarpoq: ”Taamatut aalajangiineq atugarissaarnerunissamik aamma nunatsinni kikkut tamarmik inuunerinnerunissaannik anguniakkatsinnut pingaaruteqarpoq. Taamatut suliaqarnerput suliassaqarfinnut tamanut ingerlateqqissavarput. Neriutigaara, akileraartarnermut aaqqissuussinermi aamma tamanna ingerlaqqissasoq.

Ataatsimut isumaginninnermut suliniutinut aningaasartuutissat missingersuutaasut katillugit 24,5 mio. kr.-upput.

Inussiarnersumik inuulluaqqusillunga

Erik Jensen







Attavigisassaq:

Nikolai S. Christensen
Toqq/direkte 346675
nsch@nanoq.gl