Naalagaaffiup, Naalakkersuisut aamma KommuneKreditip nunatsinni kommuninut naalagaaffimmit qularnaveeqqut pillugu isumaqatigiissutaat
Nassiussisuuvoq: Aningaasaqarnermut Akileraartarnermullu Naalakkersuisoqarfik![](/-/media/billeder/natur/land/natur.jpg?cx=0.5&cy=0.5&cw=975&ch=415&hash=0250FC9262B7AFE01D5F3210EA9BE1A3)
Danskit naalagaaffiat, Namminersorlutik Oqartussat aamma KommuneKredit, danskit naalagaaffianit aamma Namminersorlutik Oqartussanit qularnaveeqqut tunngavigalugu nunatsinni kommunit KommuneKreditimit taarsigassarsisinnaanissaannut isumaqatigiissuteqarput.
Nunatsinni kommunit pisortatigut sanaartornernut, inissialerinernut aamma attaveqaasersuuteqarnernut kiisalu inuussutissarsiornernut aningaasaliinissamut maanna periarfissaqarnerulissapput.
Tamatumani Namminersorlutik Oqartussat, KommuneKredit aamma naalagaaffiup isumaqatigiissutaat tunngaviuvoq, tamatumanilu naalagaaffik aamma Namminersorlutik Oqartussat 4,0 mia. kr.-t tungaannut taarsigassarsinissamut qularnaveeqqusiinerat tunngavigalugu, nunatsinni kommunit KommuneKreditimut taarsigassarsinissamut qinnuteqarsinnaalissapput. Isumaqatigiissutitigut nunatsinni kommunit akikinnerusumik aningaasalersuinissamut periarfissinneqarput, KommuneKreditimi naalagaaffimmit qularnaveeqquteqarnani danskit kommuniinut aamma nunap ilaanut taamatut aamma periarfissiisarmat.
Finansministeri Nicolai Wammen ima oqarpoq:
”Naalagaaffik kalaallillu Naalakkersuisui Kalaallit Nunaanni suliassat ineriartornerisa siuarsarnissai pillugit suleqatigiinnissaq kissaatigaat. Taamaammat, kalaallit kommuniisa KommuneKredit aqqutigalugu inissianut nutaanut taarsigassarsisinnaanngornerat nuannaarutigaara”
Aningaasaqarnermut Akileraartarnermullu Naalakkersuisoq Erik Jensen ima oqarpoq:
”Kommunit suliniutinut najukkami ineriartortitsisunut nutaanik aamma pitsaanerusunik periarfissartaanerat nuannaarutigaara. Naalakkersuisut, danskit naalagaaffiat aamma KommuneKredit ilagalugit isumaqatigiissummi, qularnaveeqqusiineq Kalaallit Nunaata aamma Danmarkip naligiimmik akisussaaffigimmagu aamma nuannaarutigaat.”
KommuneKreditmit taarsigassarsiat naalagaaffimmit qularnaveeqqutillit 2024-2031-mi pissarsiarineqarsinnaapput. Taarsigassarsiat sivisunerpaamik ukiut 30-nut killeqarput.
Isumaqatigiissut tamaat uani atuaruk
Annertunerusumik paasisaqarusunnermi saaffigineqarsinnaavoq Aningaasaqarnermut Akileraartarnermullu Naalakkersuisoqarfimmi, Immikkut siunnersorti Jeppe Købke Ørum, mail jepk@nanoq.gl, oqa. +299 34 50 00