AtuartigukUtoqqalinersiallit amerlanerpaat aningaasanik amerlanerusunik pissarsissapput
Nassiussisuuvoq: Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik
Utoqqalinersialinnut pilersuisussaaqatigiinnerup atorunnaarsinneqarnerani pineqartut tassaapput aappariit aamma kisermaat pineqanngillat, amerlanerpaanullu aningaasanik tigoriaannarnik amerlanerusunik pissarsissasut isumaqarluni.
Pilersuisussaaqatigiinnerup atorunnaarsinneqarnera pillugu tusagassiutini inuillu oqallittarfiini nalornissutaangaatsiarpoq.
Inatsisartut 2023-mi ukiakkut ataatsimiinnerminni utoqqalinersialinnut siusinaartumillu pensionisialinnut pensionimik naatsorsuinermi pilersuisussaaqatigiinneq atorunnaarsinniarlugu aalajangerput.
Tamanna isumaqarpoq, utoqqalinersiallit utoqqalinersianut tapiinik naatsorsuinermi aappaqarsimappata isertitaannut attuumassuteqarunnaartut. Utoqqalinersianut tapinik naatsorsuinermi utoqqalinersiallip nammineq isertitai kisiisa tunngavigineqartassapput, toqqammaviusumik aningaasartat assingalugit. Utoqqalinersiallit aappaqarpata inooqateqarpataluunniit isertitaat naatsorsuinerit ikiorsiissutillu annertussusaannut attuumassuteqarunnaarsinneqassapput, kisianni utoqqalinersialinnut kisermaanut aamma utoqqalinersialinnut aappaqartunut akigititat annertussusaat qaffasinnerpaat allannguiffiginagit.
Utoqqalinersialik aappaqartoq utoqqalinersiuteqarnani isertitaqartumut utoqqalinersianut tapeq ilanngarneqassanngilaq. Ilanngaat amigaataasoq, pilersuisussaaqatigiinnerup atorunnaarsinneqarnera pissutigalugu, ilaqutariinnut amerlanerpaanut utoqqalinersianik qaffasinnerusunik pissarsissutaassaaq.
Kisianni tamanna aamma isumaqarpoq, utoqqalinersiallit, aappaasup utoqqalinersiutinik pisartagaqannginnera pissutigalugu, siornatigut ”kisermaatut” isigineqartut, maannakkut utoqqalinersialittut aappaqartutut isigineqalissammata. Taamaalilluni tamanna isumaqarpoq, utoqqalinersiallit ilaat ”kisermaatut” isigineqartut aappaqartutut isigineqalissasut. Tamanna isumaqarpoq, utoqqalinersianut tapeq 85.642 kr-iniit 47.604 kr-inut ikileriassasut.
Utoqqalinersiat ajorseriarnerannik isigineqarsinnaavoq. Taamaattoq pingaaruteqarpoq erseqqissassallugu, pilersuisussaaqatigiinnerup atorunnaarsinneqarnerata kingunerisaanik, ilaqutariit amerlanerpaat aningaasanik tigoriaannarnik amerlanerusunik pissarsisalernissaat. Tamanna pissuteqarpoq, utoqqalinersianut tapeq aapparisap isertitai tunngavigalugit appariartuaartinneqassanngimmat. Ilaqutariit aningaasatigut isertitaat nikerarmata, ilaqutariit assigiinngitsut siunnersuutip sunniutai allanngorartumik misigissavaat.
