Greenland Minerals A/S-imut suliassami isumaqatigiissitsiniarnermut eqqartuussivimmut akissut Namminersorlutik Oqartussat tunniuppaat

Isumaqatigiissitsiniarnermut suliassami, Greenland Minerals A/S-ip Namminersorlutik Oqartussat aamma danskit naalagaaffiat suliakkiissutigalugit suliassiissutigisaani, Namminersorlutik Oqartussat akissutissaat ullumi  Eqqartuussissuserisut suliffeqarfiata Poul Schmith-ip tunniuppaa. Ingerlatseqatigiiffik Kuannersuarni piiaanissamut akuersissummik tunineqarnissamik pisinnaatitaanersoq isummerfigeqqullugu, Greenland Minerals A/S-ip isumaqatigiissitsiniarnermut eqqartuussivik piumaffigaa. 

Isumaqatigiissitsiniarnermut eqqartuussivik suliassami aalajangiinissamut piginnaatitaanngitsoq, taamaattumillu suliassaq itigartinneqassasoq, Namminersorlutik Oqartussat aallaqqaammullu aalajangiusimaannarpaat. 

Piiaanissamut akuersissummik tunniussineq aatsitassanut ikummatissanullu inatsit malillugu pisussaavoq. Aatsitassanut ikummatissanullu inatsit tunngavigalugu Naalakkersuisut aalajangiinerat pillugu isumaqatigiinngissuteqarneq, inatsit malillugu eqqartuussivinni suliarineqartussaavoq aammalu isumaqatigiissitsiniarnermut eqqartuussivimmi suliarineqartussaanani. Tamanna aatsitassanut ikummatissanullu inatsimmi aammalu atugassarititaasuni nalinginnaasuni, Greenland Minerals A/S-imut aatsitassarsiorluni misissuinissamut akuersissummut atasuni, ersarissumik allassimavoq. Taamaattumik isumaqatigiissitsiniarnermut eqqartuussiviup piginnaatitaanera pillugu aallaqqaammut aalajangeeqqullugu, Naalakkersuisut isumaqatigiissitsiniarnermut eqqartuussivik qinnuigaat. 

Pissusiviusut:
Isumaqatigiissitsiniarnermut eqqartuussivik tassaavoq eqqartuussivik namminersorlutik ingerlatsisunit pilersinneqartoq, illuatungeriit marluk akornanni isumaqatigiissutigineqarsimasussaq. Illuatungeriit tamarmik immikkut isumaqatigiissitsiniarnermut eqqartuussisunik toqqaanissamut periarfissaqarput. Isumaqatigiissitsiniarnermut eqqartuussivik pingaartumik suliassanut niuernermuinnaq tunngavilinnut naleqquppoq, tassani eqqartuussisut suliassaqarfimmi suliassamut tunngassutilimmut tassungarpiaq immikkut paasisimasaqartut pisariaqartinneqarlutik. Isumaqatigiissitsiniarnermut eqqartuussiviup eqqartuussummik aalajangiinera suliassanngorteqqillugu ingerlateqqinneqarsinnaanngilaq. 

Pissusiviusut:
Aatsitassanut ikummatissanullu inatsimmi §§ 3 d, imm. 1, aamma 16, imm. 1, naapertorluigit Naalakkersuisut piiaanissamut akuersissummik tunniussinissaq pillugu aalajangiisussaapput, aammalu Naalakkersuisut aalajangiinerat inatsimmi pineqartunut ilaasoq, taamaallaat eqqartuussivinnut suliassanngortinneqarsinnaavoq.

GMAS-imut aatsitassarsiorluni misissuinissamut akuersissummut atugassarititaasuni nalinginnaasuni aalajangersarneqarpoq: 
”2001. Aalajangiinerit akuersissutip imarisai malillugit Naalakkersuisut imaluunniit Aatsitassanut Ikummatissanullu Pisortaqarfiup naliliinera imaluunniit aalajangersagaq tunngavigalugu pisussat, isumaqatigiissitsiniarnermiitinneqartussaanngillat.

Aalajangersakkami tassani Danmarkimi eqqartuussivinni nalinginnaasumik misiliinissaq mattunneqanngilaq.

2002. Pisuni allani tamaginni Naalakkersuisut aamma pisinnaatitsissummik pigisaqartup akornanni aaqqiagiinngissutaasut, akuersissummit pisut, immikkoortut 2003-2006 naapertorlugit eqqartuussivimmit isumaqatigiissitsiniartartumit inaarutaasumik aalajangiiffigineqassapput.” 

Attaveqarfissaq: Jørgen T. Hammeken-Holm, joeh@nanoq.gl, +299 34 68 46