Kalistat Lund COP28-mi: Nunap inuii silap pissusianut aningaasaliissutinik pissarsisinnaasariaqarput

Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund COP28-mut, Dubai-mi ingerlanneqartumut peqataareerluni Kalaallit Nunaannut uteqqammerpoq. 

Naalakkersuisup Kalaallit Nunaat Parisimi isumaqatigiissummut ilaalissasoq nalunaarutigimmagu peqataasut assatik pattaappaat. 

Kisiannili 14. novembari 2023-mi Kalaallit Nunaata Parisimi isumaqatigiissummut ilaalernissaata Inatsisartuni aalajangiunneqarnera kisiat Kalistat Lundip oqariartuutiginngilaa:

”Silap pissusianut aningaasaliissutiniit nunarsuatsinni nunat inuii pissarsisinnaasariaqarput – tassanilu aamma Kalaallit Nunaanni nunap inuii pineqarput. Ullumikkut taamaattoqanngilaq. Kisianni aamma silap pissusianut aningaasaliissutit pisuni, nunap inuiisa silap pissusianik peqquteqartumik annaasaqarnerinut ajoqusernernullu, imaluunniit silap pissusiata allannguutaanut akiuiniarluta suliniuteqarnitsinnut aningaasaliisarnermut atorsinnaasariaqarput.”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Oqariartuut taanna Kalistat Lundip COP28-mi oqalliffinni assigiinngitsuni arlaleriarluni saqqummiuppaa. Kalistat Lundip COP28-mut peqataanermini ilaatigut nunat inuiisa suliniaqatigiiffii, savalimmiormiut avatangiisinut ministeriat Ingilín D. Strøm aammalu danskit ineriartortitsinermi suleqatigiinnermut nunarsuarmilu silap pissusianut politikkimut ministeriat Dan Jørgensen ataatsimeeqatigai, kiisalu nunani tamalaani tusagassiorfinnit apersorneqarluni. 

”Parisimi isumaqatigiissummut ilaalernitsigut silap pissusia pillugu isumaqatiginninniarnerni nunarsuatsinni siuttuusut oqaloqatigisinnaalerpagut. Taamaattumik Kalaallit Nunaata siunissami silap pissusia pillugu isumaqatiginninniarnerni soqutigisaanik qulakkeeriniarluta sulisinnaanerput pitsaanerujussuanngussaaq. Kalaallit Nunaat silap pissusiata allannguutaanut akiuiniarnermi suleqataassaaq. Tamannalu ingerlatilerutsigu suleriaatsit, Silap Pissusia pillugu isumaqatigiissutip ataani pilersinneqarsimasut iluaqutigissavagut”, Naalakkersuisoq Kalistat Lund naggasiivoq.

Tunngavigisaq
Ukiut tamaasa FN-imi Silap Pissusia pillugu Isumaqatigiissummi, 1992-imi pilersinneqartumi suleqataasunut Conference of the Parties (COP) ingerlanneqartarpoq. Ukioq manna COP28 30. novembarimiit 13. decembarimut Dubai-mi ingerlanneqarpoq. COP-p ingerlanneqarnerani nunarsuarmi silap pissusianut ministerit, siunissami silap pissusiata allannguutai killilersorniarlugit, aammalu allannguutinut ingerlareersunut piareersarniarluni qanoq iliortoqarsinnaanersoq isumaqatiginninniutigisarpaat. Ukioq manna COP28-mi immikkut sammineqartut tassaapput:

• Siunissaq nunap iluaneersunik ikummatissaqanngitsoq, aammalu mingutsitsinngitsunik nukissiutilik
• Silap pissusia peqqutigalugu annaasanut ajoqusernernullu aningaasaateqarfimmik pilersitsinissaq
• Silap pissusiata allannguutaanut naleqqussaaneq
• Silap pissusianut aningaasaliisarneq
• Nunarsuarmi silap pissusiata allannguutaanut akiuiniarluni suliniutini killiffiinut naatsorsukkat

Paasissutissat
Issittumi silap pissusiata allannguutai nunarsuarmi agguaqatigiissitsinermut naleqqiullugu sisamariaat tikillugu sukkanerusumik ingerlapput. Parisimi isumaqatigiissummi anguniagaq ataaseq tassaavoq, nunarsuup kissakkiartornerani suliffissuaqalernissaa sioqqullugu agguaqatigiissitsinermut naleqqiullugu 2 grader celsius inorlugit, ajornanngippallu 1,5 grader celsius killiliunneqassasoq. 2023-mi nunarsuarmi silap kissakkiartornerata qaffaatai 1,1 grader celsiusinik annertussuseqarput.

Kalaallit Nunaat Parisimi isumaqatigiissummut ilaalermat, Kalaallit Nunaat nunami namminermi silap pissusianut periusissiamik, Kalaallit Nunaata nunami namminermi silap pissusianut suliniutinik FN-imut tapersiinissaanut (aammattaaq Nationally Determined Contributions-imik imaluunniit NDC-mik ilisimaneqartumik) suliaqarsinnaalissaaq. Taanna Kalaallit Nunaata gassinik silap pissusianut kissakkiartortitsisunik annikillisaanissamut anguniagaanik imaqassaaq.

Attaveqarfissat
Annertunerusumik paasisaqarusunnermi Naalakkersuisup allattaa Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqassaaq.