Sumiiffinnut 2024-mi pisassiissutit

Qalerallit
Aalisarnermut Piniarnermullu Naalakkersuisoq Naalakkersuisunit piginnaatinneqarpoq nunatta kitaata avataani 2024-mi qaleralittassat aalajangissagai. Aalisarnermut Piniarnermullu Naalakkersuisoq aalajangiivoq qaleralinnut TAC 16.502,5 tonsiussasoq. 

Avataani qaleralinnik pisassiissutigineqartussatut siunnersuutigineqartut ikiliartorput mianersornissarlu tunngavigalugu pisassanik siunnersuineq tunngaveqarpoq, aalisagaqatigiit pineqartut ilisimatuussutsikkut misissuiffigineqarsimanngimmata. 

Kalaallit Nunaat Canadalu pisassiissutigineqartussat pillugit qanimut oqaloqatigiittarsimapput, aalisaqatigiit marluullutik aalisartussaavaat. TAC-iliinermi pisassiissutigineqartut amerlassusaat aalajangerneqarput kitaani qalerallit pillugit aqutsinissamut pilersaarummi periusissiarineqartut naapertorlugit, aamma Aalisarneq pillugu siunnersuisooqatigiit tusarniaavigineqarsimallutik. 

Saarulliit
Tunup avataani saarulliit pillugit aqutsinissamut pilersaarut naapertorlugu Naalakkersuisut saarulliit TAC aalajangerpaat, 32.900 tonsit aalisarneqarsinnaassallutik. Taakku aqutsiveqarfinnut marlunnut avinneqassapput, ilai 25.000 tonsit Dohm Bankemi aalisarneqarsinnaasunngorlugit 7.900 tonsit Tunup kujataani aalisaarneqarsinnaassallutik.

Sinerissap qanittuani kitaani saarullittassat TAC-at Naalakkersuisut aamma aalajangerpaat, 21.000 tonsit aalisarneqarsinnaassallutik. Nutaatut oqaatigineqarsinnaavoq Tunu avissaartillugu nammineerluni aqutsiveqarfeqalermat, taamanilu killeqanngitsumik aalisartoqarsinnaalluni. 

Saattuat
2024-mut saattuanik pisassiisoqarpoq aqutsinermut pilersaarutip ingerlatsinermut maleruagassai tunngavigalugit aamma Aalisarneq pillugu siunnersuisooqatigiinnut tusarniaasoqareersoq.

Sumiiffinnut 2024-mi pisassiissutit

Nuuk-Paamiut sineriaasa qanittuanni pisassiissutigineqartut TAC-at 15 procentinik ikilineqarpoq pisassiinermut siunnersuutigineqartut ikiliartorneri tunngavigalugit. Aamma Upernaviup sineriaata qanittuani aamma Narsaq-Qaqortoq sineriaasa qanittuanni  pisassiissutigineqartut TAC-at ikilisinneqarpoq aqutsinermut pilersaarutip ingerlatsinermut maleruagassai naapertorlugu, pisarineqartartut ikilisimaneri tunngavigalugit.  

Kissavaasat
Kissavaasat pisassiissutigineqartut 2.520 toniussasut aalajangerneqarpoq, taakku nunatta sineriaa tamakkerlugu pisassiissutaapput. Taama amerlatigisut aamma 2023-mi pisassiissutaapput. Aqutsiveqarfinni pisassiissutaaneri 2023-mitut ipput. 

Pisassiissutigineqartut aamma TAC-it Naalakkersuisut.gl-imi atuarneqarsinnaapput.

Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl