AtuartigukUlloq unnuarlu neqerooruteqarfiup arlaannaanulluunniit attuumassuteqanngitsumik misissorneqarnera inassutitalimmik naammassineqarpoq
Nassiussisuuvoq: Meeqqanut, Inuusuttunut Naalakkersuisoqarfik
Nalunaarusiani nutaani pingasuni ulloq unnuarlu najugaqarfissatut neqeroorutini atugassarititaasut, kinguaassiuutinut tunngasut aamma kinguaassiuutitigut innarliinissamik aamma kannguttaatsuliorfiginninnissamik pitsaaliuineq, aamma ulloq unnuarlu najugaqarfissatut neqeroorutini najugaqartut isaannit isiginninnerat erseqqissarneqarput.
Ulloq unnuarlu neqerooruteqarfik pillugu nalunaarusiat pingasut ullumi Meeqqanut Inuusuttunullu Naalakkersuisup saqqummiutissavai, taakku tamarmik immikkut qulequtaqarput:
Inunnut innarluutilinnut najugaqarfissatut neqeroorutini atugassarititaasut nalinginnaasut, Inunnut innarluutilinnut najugaqarfissatut neqeroorutini kinguaassiuutinut tunngasutigut pissutsit, aamma kinguaassiuutitigut innarliisarnerit aamma Inunnut innarluutilinnut ulloq unnuarlu najugaqarfissatut neqeroorutit najugaqartut isaannit isigalugit.
2022-p naanerani Innuttaasut Peqqissusiannik Sullissivimmit Ilisimatusarfiullu issittumi atugarissaarneq pillugu ilisimatusarfianit ulloq unnuarlu neqerooruteqarfimmik arlaannaanulluunniit attuumassuteqanngitsumik misissuinerat tunngavigalugu nalunaarusiat inassutinik arlalinnik imaqarput.
- Naalakkersuisut innarluutilinnut suliassaqarfiup pitsanngortinnissaanut tunngatillugu annertuumik ukkataqarput. Arlaannaanulluunniit attuumassuteqanngitsumik misissuinerit inunnut innarluutilinnut ulloq unnuarlu neqeroorutini suut allanngortittariaqassanersut pillugit akissutinik pisariaqartitatsinnik tunissavaatigut, Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede, oqarpoq.
Nalunaarusiaq siulleq, Inunnut innarluutilinnut najugaqarfissatut neqeroorutini atugassarititaasut nalinginnaasut, tallimanik inassuteqarpoq, ulloq unnuarlu neqeroorutini qanigisaasunik qanoq suleqateqarsinnaanerulernissaq pillugu inassutinut ilaavoq. Tamatuma saniatigut allannguinissat siunertaralugit najugaqarfissatut neqeroorutit timitamikkut avatangiisiinik misissuinissaq inassutigineqarpoq.
Najugaqartut atoqateqarnissamik pisariaqartitaat pissusilersornerallu, kinguaassiuutitigut kannguttaatsuliornernik pitsaaliuineq, malittarisassat najoqqutassallu kiisalu kinguaassiuutitigut kannguttaatsuliornerit atornerluinerillu pillugit qulaajaaneq tunngavigalugu nalunaarusiami Inunnut innarluutilinnut najugaqarfissatut neqeroorutini kinguaassiuutinut tunngasutigut pissutsit, aamma kinguaassiuutitigut innarliisarnerit inassutit arfineq-pingasut eqikkarneqarput. Nalunaarusiami ilaatigut kinguaassiuutinut tunngasutigut politikkeqalernissaq, kinguaassiuutinut tunngasut pillugit sulisunik ilinniartitsisalernissaq aamma pasinapiluttumik kalerriisoqarsinnaaneranik aaqqiissut (Whistleblowerordning)-imik atoqatigiinnermut tunngasunik ulloq unnuarlu neqeroorutini pisussaanngitsunik pasitsaassaqarnermi kalerriissuteqalernissaq inassutigineqarput.
Nalunaarusiaq Inunnut innarluutilinnut ulloq unnuarlu najugaqarfissatut neqeroorutit najugaqartut isaannit isigalugit pingasunik inassuteqarpoq qulequttallu tullinnguuttut qulaajarneqarlutik; inuunerup pitsaassusaa, atassuteqarnermut tunngatillugu pissutsit aamma atoqateqarnermut tunngatillugu pissutsit. Ulloq unnuarlu neqeroorutini assigiinngitsuni arfineq-marlunni najugallit nalunaarusiamit tusaaneqarsinnaanngorlugit nipilerneqarput. Najugaqartut ulluinnarminni suut pingaartinnerlugit oqaluttuarput:
Suna sammissallugu nuannarinerlugu, sumut aalajangeeqataasinnaanertik pillugu, qanigisaminni kina attaveqaqatigisarnerlugu aamma atoqateqarnermut tunngatillugu periarfissatik suunersut pillugit taavalu timiminnut tunngatillugu killiliisinnaanertik pillugu.
Nalunaarusiat linkini iserfigineqarsinnaasuni atuarneqarsinnaapput:
Inunnut innarluutilinnut najugaqarfissatut neqeroorutini atugassarititaasut nalinginnaasut
Attavissaq
Sukumiisumik paasisaqarusukkuit naalakkersuisup allattaa Lars Salik H. Kielsen e-mailikkut salik@nanoq.gl imaluunniit oqarasuaatikkut: +299 34 50 00 attavigiuk.