AtuartigukUKIOQ NUTAAQ AALLARTIPPAT TARNIKKUT NAKUUSERFIGINEQARNEQ PINERLUUTINNGORTINNEQASSAAQ
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Kalaallit Nunaanni tarnikkut nakuuserfigineqarnerup pinerluutinngortinneqarnera pillugu aalajangersagaq Folketing-ip ulloq 14. decembari akuersissutigaa. Inatsisartut aalajangernerannik siunnersuut tunuliaquteqarpoq. Tassanilu siunnersuut atituumik tapersersorneqarpoq.
”Tarnikkut nakuuserfigineqarnerup pinerluutinngortinneqarnera pillugu siunnersuutip massakkut akuersissutigineqarnera nakuusernerup akiorneqarneranut patajaallisaataavoq. Nakuusernerup tilluusarnerinnaasannginnera, kisianni aamma tarnikkut ikiliisarnera tamatuma ersersippaa. Nakuusernerit ilusaat tamarmiullutik inuup kiffaanngissuseqarneranut aamma eqqissisimanermik misigisimaneranut annertuumik kinguneqartarput.” Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen oqarpoq.
”Tarnikkut nakuuserfigineqarneq eqqugaasunik qajannarsisitsisarpoq aamma tarnikkut itisuumik ikilerneqaataasinnaalluni. Tarnikkut nakuuserfigineqarnerup pinerluutinngortinneqarneratigut, eqqugaasut misigisartagaat aamma naapertuilluartumik pineqarnerup anguneqarnissaanut tunngatillugu eqqugaasut pitsaanerusumik inissinneqarnerat, taamaalilluni inuiaqatigiinnit inatsisitigut akuersissutigineqarpoq.”
Tarnikkut nakuuserfigineqarneq pillugu piviusut
Tarnikkut nakuuserfigineqarneq periaatsit assigiinngitsut atorlugit malugitinneqartarpoq. Nikanarsarneqarneq, kanngunarsagaaneq, innarlerneqarneq, uukapaatinneqarneq, qunusaarneqarneq imaluunniit immikkoortinneqarneq malugineqartarpoq. Tarnikkut nakuuserfigineqarnermi eqqugaasup inuunerata killilersorneqarnissaa imaluunniit nakkutigineqarnissaa nakuusertumit siunertarineqartarpoq. Inuit nakuuserfigineqarsimasut tamangajammik, nakuusernernik assigiinngitsunik ilusilinnik arlalinnik nakuuserfigineqartarput. Qanigisariinni timikkut nakuuserfigineqarneq assersuutigalugu tarnikkut nakuuserfigineqarnertaqanngitsoq qaqutigorujussuaq pisarpoq. Nakuuserneq aamma iliuusiusinnaavoq allanik ilaqanngitsoq, aamma naak tarnikkut nakuuserfigineqarneq amerlanertigut saqquminnginnerusumik pisaraluartoq, nakuusernermut ilutsit taamaattut timikkut nakuuserfigineqarnertut ajoqutaatigisarput.
Ulloq 1. januaari 2024 aallarnerfigalugu tarnikkut nakuuserfigineqarneq politiinut nalunaarutigineqarsinnaalissaaq.
Naalakkersuisup allattaanut Jeanette L. Petersen-imut saaffiginnittoqarsinnaavoq.