Brugsenip aamma Pisiffiup immikkut ittumik akuersissummik qinnuteqaataat puukunik utertitsisarnermut nutaaq Naalakkersuisunit itigartitsissutigineqarpoq

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup Brugsenip aamma Pisiffiup immikkut ittumik akuersissummik qinnuteqaataat suliarisimavaat. Immikkut ittumik akuersissummik qinnuteqaat Naalakkersuisunit itigartinneqassasoq aalajangertoqarpoq, taamaattumik utertitseriaatsip nutaap ulloq 1. januar 2024 atuutilernissaa nikisinneqanngilaq.

Qinnuteqaatip suliarinerani Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik utertitseriaatsimut nutaamut susassaqartut allat oqaloqatigisimavaat, taakkualu naatsorsuuteqarput 1. januar 2024 aallarnerfigalugu maskiinat imaluunniit assaat atorlugit aaqqiissuteqarnikkut piareersimasinnaassallutik. Tamannalu tunuliaqutaralugu Naalakkersuisunit nalilerneqarpoq niuertarfiit utertitseriaatsip nutaap atuutsilerneqarnissaanut piareersarnissaminnut piffissaqarluarsimasut, taamaattumillu aamma periarfissaqartut qangatut utertitseriaaseq atornissaanut, puukunik utertitseriaasissap nutaajusup atornissaata tungaanut aaqqissuteqarnermikkut taamaammat immikkut ittumik akuersissummik qinnuteqaat itigartissutigineqarpoq.

Puukunik utertitseriaatsip nutaasup atuutilernissaanut periarfissat arlallit atorneqarsinnaapput
Niuertarfiit utertitseriaatsimut nutaamut ikaarsaarnissaminnut assigiinngitsunik periarfissaqarput. Tamanna nammineq kisitsinikkut pisinnaavoq. Niuertarfiit utertitsinermut maskiinat puukunik suliaqarsinnaasut pisiarisinnaavaat imaluunniit atuisuniit puukunik nammineerlutik tigooraasinnaapput.

Niuertarfiit namminneq aalajangissavaat 1. januar 2024 aallarnerfigalugu imeruarsaatit sorliit nioqqutigerusunnerlugit, kisiannili utertitseriaatsimut ilaanissaat apeqqutaaginnassaaq. Tamanna isumaqarpoq 1. Januar 2024 aallarnerfigalugu piffiit ilaanni nioqqutissat nutaat amerlanerusut atuisunit pisiarineqarsinnaalissapput, kisiannili aamma piffiit ilaanni puiaasat nunatsinni ilisimarisimaneqarluartut kisimik pisiarineqarsinnaassapput..

Atuisut qanoq ilillutik puukunik utertitsisinnaanersut piffimmiik piffimmut aamma illoqarfimmiik nunaqarfimmut allanngorassasoq naatsorsuutigineqarpoq. Tassani pisiniarfiit ataasiakkaat qanoq aaqqiissuteqarumaarnerata alajangissavaat.

Nuna tamakkerlugu qitiusumik utertitsisarfiit 1. Januar 2024 piariissapput
Utertitsisarfeqarluni ingerlasussanik piareersaanermut aaqqiinissaq , ataasiakkaanik nioqquteqartartut puukut atuisartuniit tigoreerunikku ingerlateqqissinnaanissaannik qulakkeerisussaq, 1. januar 2024 aallarnerfigalugu piareeriissaaq. Tamatuma kingunerisaanik ataasiakkaanik nioqquteqartartut puukuutitik tigooqqaasarfimmut tunniussisinnaanissamut aammalu utertitassartaasa tigunissaanut periarfissaqassapput,. Ataasiakkaanik nioqquteqartartut aalajangissavaat tunisassiat sorliit ilisivimminniitsikkusunnerlugit nammineerlutik aalajangissavaat.


Paasissutissanik annertunerusunik pissarsiniaraanni attavigisassaq, Naalakkersuisup allattaa Manasse Berthelsen oqarasuaatikkut 34 56 03/ 54 88 68 iamaluunniit emailimut pan@nanoq.gl-imut.