Pisunik naliliineq pingasunngornermi ulloq 6. december 2023-meersoq

Uummannap Sulluani annertunerusunik qaqqanik sisoortoqarnissaa imaluunniit tamatuma kingorna sumiiffinni inoqartuni navianartunik mallerujussuarnissaa qanittumi navianaateqartoq takuneqarsinnaanngitsoq, maannakkut nakkutiginninnermiit paasissutissat nalunaarsukkat tunngavigalugit paasissutissiissutigineqarsinnaavoq. Taamaattoq qaqqat qajannartortaqartut eqqaanni pisariaqanngitsumik angalaarnissaq sunaluunniit suli inassutiginngilarput, qaqqanit sisoornerit annikitsut peratarsinnaammata.

Umiammakku Nunaanni aamma Kangerluarsummi qaqqat qajannartortaqartut ilaanni millimeterialunniit centimeteri tikillugu nikikkiartortoqartuaannartoq, nakkutiginninnerup takutippaa.

Nikikkiartuaarnerit takuneqartut taakkua matuma kinguliani nunap assingini sumiiffiit qalipaatilerlugit takutinneqarput: Sumiiffinni tungujortuni aalasoqarneranik nalunaarsuiffiusut takutinneqarput, aappaluttumik qalipaatilinni sumiiffiit 2023-mi novembarip ingerlanerani ujaqqanik sisoortunik arlalinnik nalunaarsuiffiusimasut nalunaaqutserneqarlutik. Sumiiffik qajannartortalik ataatsimik arlalinnilluunniit ataqatigiissunik sisoortoqartarpoq, assigiinngitsunik sukkassusilinnik ingerlaartunik.

Novembarimi 'Umiammakku Nunaat 1'-imi sisoortuni allerni sukkasuumik nikikkiartuaarnerit aammalu ujaqqat nakkaasut arlallit takuneqarput. Assiliivitsinniit piffissani tulleriiaani aalasut taakkua takussutissiarineqarput, takuuk matuma kingulianiittoq assilisaq.

2023-mi novembarimi agguaqatigiissillugu silaannaap kissassusaa qerinartumiissimavoq. Piffissami nakkutiginninnermi assilisat takutippaat ”Umiammakku 1”-ip appasinnerusortaaniit imermik suli seerisoqartoq. Qaleriiaani pisoqarfiusuni nuna suli qerisimanngitsoq tamanna tikkuussivoq. Erngup quppaniittup qerinerani qulloornerit allisinnaapput, sermip imermiit imaqqortunerunera pissutaalluni.Taamaannerani nunap iluata qerinera ujaqqat sisoornerulernerannik malitseqarsinnaavoq.

Umiammakku Nunaat 1-imi ujaqqat sisoortut takuneqartut, sisoorfiusuni allerni sisoortoqalernissaanut takussutissaasinnaapput. Taamaattumik qaqqat qajannartortallit taakkua qanitaanni angalaarnissaq navianarsinnaavoq, aammalu sumiiffinni kalluarneqartuni tamaginni pisariaqanngitsumik angalaarnissaq tamarmi inassutigineqanngilaq. Qajannartoqarfiilli taakku sisuussagunik inoqarfinni ulorianaatilimmik tassaartitsinissaannut annikippallaarput.

Kangerluarsummi qaqqani qajannartortalinni suli nikikkiartuaartunik aalasoqartuaannarpoq. Nikinnerit annersai qaqqat innartaasa qajannartortallit appasinnerusortaani takuneqarsinnaapput.

Tullianik nalilersuinissaq pingasunngorneq ulloq 3. januar 2024 tamanut saqqummiunneqassaaq. Pisariaqalissappat, siusinnerusukkut paasissutissiissaagut.

Ilusiliaq 1. Aalasunik takussutissiorneq manna ”Umiammakku Nunaat 1”-imi nakkutiginninnermi assilisat, 2023-mi novembarip aallartinneraniilli assilineqartut, atorlugit suliarineqarpoq. Aalasut sukkanerpaat ”Umiammakku Nunaat 1”-ip appasinnerusortaaniipput. Tamatuma saniatigut matumani portussutsini assigiinngitsuni imermik seerisoqartoq malunnartoq takuneqarsinnaavoq. ”Umiammakku Nunaat 1” 2017-imi qaqqap sisoortup kitaani 1 km missaanni ungasissusilimmiippoq.

Ilusiliaq 2. 2023-mi novembarip aallartinneraniit Umiammakku Nunaanni aalasoqarnerinik ujaqqallu nakkaanerinik nalunaarsuinernut nunap assinga takussutissiaq.

Ilusiliaq 3. 2023-mi novembarip aallartinneraniit Kangerluarsummi aalasoqarnerinik ujaqqallu nakkaanerinik nalunaarsuinernut nunap assinga takussutissiaq.