Naalagaaffiit Peqatigiit nunarsuaq tamakkerlugu innarluutilinnut ullorititaa: Innarluut naapinnagu inuk naapissavarput

Decembarip pingajuani inuit pisinnaasakinnerulersimasut nunatsinni nunarsuullu sinnerani qitiutinneqarput.

Inuit innarluutillit inuiaqatigiinni timikkut ersinngitsutigullu aporfeqartarput, taamaattoqarnerata allatuulli ulluinnarminni peqataanissaraluat pinngitsoortittarpaa.

Naalagaaffiit Peqatigiit nunarsuaq tamakkerlugu innarluutilinnut ullorititaanut atatillugu inuit innarluutillit peqataatinneqartarnissaat pillugu oqariartuut Naalakkersuisut ullormi tassani malunnartippaat.

• Inuiaqatigiinni inuk pisinnaasakinnerulersimasoq allatuulli inuiaqatigiinni peqataaniarnermini akimmiffimmik nalaatsigaangat innarluut pilersarpoq. Innarluut naapinnagu inuk naapissavarput, inuk innarluutilik immikkoortinneqartutut, nikanarsarneqartutut kanngunarsaarneqartutulluunniit pineqartoq akuerissanngilarput, Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede taama oqarpoq nangillunilu:
• Inuiaqatitsinni tamatta naligiippugut. Ataatsimoorluta inunnut innarluutilinnut tapersersuinerput takutinnissaa eqqaamassavarput, innarluutilinnut ullorititaq kisiat pinnagu, ullulli tamaasa.

Piffissami matumani Naalakkersuisut “Inuit Innarluutillit pillugit Naalagaaffiit Peqatigiit isumaqatigiissutaata malinneqarnissaanut iliuusissatut pilersaarut 2024-2034” suliarileruttorpaat, taanna Innarluutillit pillugi t nassuiaammit 2022-meersumit aallaaveqarpoq.

Inunnut pisinnaasakinnerulersimasunut inuiaqatigiinnik timikkut akimmiffeqanngitsunik pilersitsinissaq innarluutilinnut tunngatillugu naalakkersuinikkut iliuusissatut pilersaarusiornerup ilaatigut siunertaraa, tamanna innuttaasunut tamanut assigiissitsinermut iluaqutissalimmik arlalitsigut iliuuseqarfiginninnikkut anguniarneqarpoq.

Sukumiisumik paasisaqarusukkuit naalakkersuisup allattaa Lars Salik H. Kielsen e-mailikkut salik@nanoq.gl imaluunniit oqarasuaatikkut: +299 34 50 00 attavigiuk.