AtuartigukNunanit tamalaaneersut ilisimasallit aanngajaarniutit pillugit pinaveersaartitsinerup ineriartortinnissaanut ikiuissapput
Nassiussisuuvoq: Peqqissutsimut Naalakkersuisoqarfik
Peqqissutsimut Naalakkersuisoq Agathe Fontain Nunarsuarmi Peqqissutsimut Kattuffimmit WHO/Europe aanngajaarniutit pillugit pinaveersaartitsinermi immikkut ilisimasalinnit nunanit tamalaaneersunit sapaatip akunnerani 47-mi pulaartoqarpoq. Ukioq manna juunimi WHO/Europep aamma Peqqissutsimut Naalakkersuisuusimasup Mimi Karlsenip akornanni suleqatigiinnissamut isumaqatigiissuteqarsimanerat malitseqartinniarlugu pulaartoqarpoq. Inuit peqqissusiisa pitsanngorsarnissaat aamma suliassaqarfinnut assigiinngitsunut tunngatillugu uppernarsaatinik tunngavilinnik sulinerit pitsanngorsaaviginissaat suleqatigiinnermi siunertarineqarput.
Ilisimasallit aanngajaarniutinik suliaqartut tikeraarnerminni Peqqissutsimut Naalakkersuisoq Agathe Fontain naapippaat.
”Siunissami inuiaqatigiinnut iluaqutaasussamik Naalakkersuisut aamma WHO/Europe suleqatigiinnissamik isumaqatigiimmata nuannaarutigivara. Aanngajaarniutinik pinaveersaartitsinerup saniatigut peqqinnissamut tunngatillugu suliniutit arlallit pingaarnersiukkat aamma suleqatigiissutigineqarput, taakkulu suliarinerisa nanginnissaannut assut qilanaarpunga”, taama oqarpoq Peqqissutsimut Naalakkersuisoq, Agathe Fontain.
“Naalakkersuisut tatiginninnerat WHO-mit assut qujamasuutigineqarpoq. Qularinngilarput suleqatigiinnitsigut innuttaasut nukittuffippassuisa ineriartorteqqissinnaallutigit aamma Kalaallit Nunaanni unammilligassanut tulluarsakkanik aaqqiissusiorsinnaalluta. Ilisimasallit nunani tamalaani attaveqaatigisatta saniatigut Canadami Issittup ilaanittunik suleqatissarsiorluta aallartereerpugut. Taamaaliorpugut Canadami Issittup ilaanit misilittakkatta ineriartorteqqinnissaat qulakkeerusukkatsigu”, taama oqarpoq Siunnersortaaneq Dr. Martin Krayer von Krauss, WHO/Europemeersoq. Taannalu nangilluni oqarpoq: “Imigassamut tunngatillugu massakkut erseqqissumik inissisimasut tassaapput imigassaq kingunerlutsitsinernut attuumassuteqanngitsoorsinnaanngimmat aammalu kingunerlutsitsinerit imigassamut attuumassuteqanngitsoorsinnaanatik – Kalaallit Nunaanni inuiaqatigiinni piviusumik ataatsimut iliuuseqartoqarnissaa pisariaqarpoq.”
Naalakkersuisuni pulaarnerup saniatigut maani nunatsinni suliassaqarfimmut tunngatillugu ilisimasanik katersiniarlutik aallartitat suliffeqarfinnik suliniaqatigiiffinnillu attuumassuteqartunik ataatsimeeqateqarput.
WHO/Europe tassaavoq Nunarsuarmi Peqqissutsimut Kattuffik (World Health Organisation) Europami peqqissutsikkut apeqqutinik aallussisoq nunarsuarmi WHO immikkoortuani immikkoortuusoq.
WHO/Europe Europami nunat akornanni Innuttaasut peqqissusaannik siuarsaaniarluni, nappaatinik pinaveersaartitsineq nunamilu peqqissutsikkut peqqinnissamilu aaqqissuussinernik suliaqartuuvoq.
Paasisaqarnerorusukkuit Naalakkersuisup allattaa Naja Lynge-Petersen e-mailimut: nalp@nanoq.gl imaluunniit oqarasuaammut uunga +299 34 66 41 attaveqarsinnaavutit.