Kalaallit Nunaat aalisarneq pillugu Norgemik 2024-mut isumaqatigiissuteqarpoq

Aalisarneq pillugu Norge 2024-mut isumaqatigiissuteqarfigineqarpoq. Isumaqatigiissummut tapiliussami 2023-meersumi isumaqatigiissutip imarisai allanngortinnagit 2024-mi attatiinnarnissaat illuatungeriit isumaqatigiissutigaat. Suleqatigiilluarnermik illuatungeriit tamarmik akornganni kiisalu inuussutissarsiornikkut immikkut pisariaqartitat aallaavigalugit, Barentsip imartaani aamma Kalaallit Nunaata imartaani aalisakkat pisarineqarsinnaasut pillugit siunnersuinerit takutippaat aalisakkat ikiliartortut, taamaattoq kissaatigineqarpoq ingerlatiinnarneqarneqassasoq. 

Kalaallit Nunaat taamaasilluni Barentsip Imartaani saarullinnik 4.000 tonsinik, misaqqer-nanik 750 tonsinik saarulliusaanillu 650 tonsinik 2024-mi aalisarsinnaalerpoq.

Kalaallit Nunaata Norgellu akornanni aalisarneq pillugu isumaqatigiissut siullerpaaq 1992-imi atuutilersinneqarpoq, taamaasillunilu aalisarneq pillugu isumaqatigiissute-qartarneq ukioq manna 30-nngortorsiorlugu nalliuttorsiutigineqarpoq. Norgemik aalisarneq pillugu isumaqatigiissuteqarnikkut nunat akunnerminni aalisarneq pillugu suleqatigiis¬sinnaanissaat aalisakkanillu paarlaasseqatigiittarsinnaanissat tunngavissinneqartarpoq. Aalisarneq pillugu isumaqatigiissut uani atuarneqarsinnaavoq: Nunat tamalaat - akornanni suleqatigiinneq aamma aalisarneq pillugu isumaqatigiissutit (naalakkersuisut.gl)

2024-mut isumaqatigiissummut tapiliussami kalaallit aalisartuisa Norgep imartaani aam-ma Norskit aalisartuisa Kalaallit Nunaanni aalisagartassaat aalajangersarneqarput. Kalaallit Nunaat Norgelu ilisimatusarnermut tunngatillugu qanimut suleqatigiittarputtaaq suliniutinillu arlalinnik ataatsimoorlutik ingerlatsillutik. Isumaqatigiissummut tapiliussaq kalaallisut nutserneqarsimalerpat Naalakkersuisut nittartagaatigut saqqummersinne¬qassaaq.

Isumaqatigiissutit nunanut taakkununnga naleqartorujussuusut Aalisarnermut, Piniar¬nermut Naalakkersuisoqarfimmit inuussutissarsiortullu aallartitaanit nalilerneqarpoq, taamaaliornikkummi illuatungeriit aalisariutaanni ukioq kaajallallugu suliassaqarnissaq qulakkeerneqartarmat. 

Isumaqatiginninniarneq ukiut tamaasa pisartoq ukioq manna Kalaallit Nunaata Sinniisoqarfiani Københavnimi aallartitaqarfiani atorfilittatigoortumik novembarip 28-anni 2023-mi ingerlanneqarpoq. Kalaallit allartitaat KANUAANA-meersut, Pinngortitaleriffimmeersut, Aningaasaqarnermut Akileraartarnermullu Naalakkersuisoqarfimmeersut kiisalu aalisarnermik inuussutissarsiuteqartut aallartitaat. 
Tullinnguuttumi 2024-mut pisassiissutit paarlaasseqatigiissutaasut pillugit takussutissiaq kiisalu ukiup siuliani amerlassutsit tonsinngortitat takuneqarsinnaapput.

Takussutissiaq 1: Piffissami 2014-2024 Kalaallit Nunaata aamma Norgep akornanni pisassanik paarlaasseqatigiinnerit

Paasissutissanik uani saqqummiunneqanngitsunik paasisaqarusuttoqaruni immikkoortortaqarfimmi pisortaq Katrine Kærgaard, katk@nanoq.gl, Aalisarnermut Piniarnermullu Naalakkersuisoqarfimmeersoq saaffigineqarsinnaavoq.