AtuartigukSulisussaaleqineq inuiaqatigiinni ataatsimoorullugu suliassaavoq
Nassiussisuuvoq: Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik
Naalakkersuisut suliffeqarnermut nalunaarusiaanni 2022-mi nassuiarneqarpoq sulisussaaleqineq siunissami ukiorpassuarni saqqumilaarumaartoq. Sulisussaqarnermik kivitsinissaq ataatsimoorussamik akisussaaffiuvoq tamannalu isumaqarpoq, suliffeqarnermi unammilligassat annertussusaat minnerpaaffianiitinniarlugu soqutigisaqaqatigiit najukkami, nunap immikkoortuani aamma nuna tamakkerlugu suleqatigiinnerisa ukkatarineqarnissaat suli annertunerusumik pingaaruteqassasoq.
Sanaartortut sulisussaaleqineq pissutigalugu suliassanut nutaanut itigartitsisariaqarneri piviusuuvoq. Sanaartornermi immikkoortoq sulisussanik piginnaasalinnik annertusiartuinnartumik piumasaqarpoq, pingaartumik sanasut, innaallagisserisut, ruujorilerisut il.il. annertuumik atorfissaqartinneqarmata.
Suliffeqarnerup ataatsimut isigalugu malugiumaarpaa, utoqqaat amerlanerulernerat, taamaattumik utoqqaanerusunut peqqissutsimik siuarsaaneq aamma sulisoqarnikkut atugassarititat pitsaasut sivisunerusumik suliffeqarnermiiginnarnissamut kajumissaataasinnaapput. Inuiaqatigiinnni ataatsimut suleqatigiinnikkut suliffeqarneq inissaqartitsisoq pilersinneqarsinnaavoq.
”Ilinniartitaanerup qaffasissusaanik pitsaanerulersitsineq siunissami inuussutissarsiortut sulisussaminnut piumasaqaataannik naammassinnissaaq. Siunissami suliffeqarnerup assaat piginnaasallit pikkorissullu pisariaqartippai. Sulisussat nukittorsarnerannik suliaqarneq inuiaqatigiinni suliassaavoq pingaaruteqartoq” Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane oqaaseqarpoq.
Unammilligassanut isumatusaartumik aallaaveqarnissaq inuiaqatigiinni pisariaqarpoq. Ullumikkut suliffeqarnermi kikkut tamaasa atorfissaqartippagut aamma suli amerlanerusut pisariaqartillugit. Sulisussat nukittorsarneqassapput aamma inuusuttut sapinngisaq tamaat atorlugu ilinniagaqarnissap salliutinneqarnissaanik kaammattorneqassapput.
Suliffeqarnermut nalunaarusiaq 2022 Naalakkersuisut nittartagaanni aaneqarsinnaavoq.
Attaveqarfissaq
Annertunerusumik paasisaqarniaruit attaveqarfigiuk naalakkersuisup allattaa Helene S. Pedersen e-mailikkut: hspd@nanoq.gl oqarasuaatikkulluunniit + 299 34 56 11