AtuartigukEqqartuussivinnut qallunaat naalakkersuisui ukiunut arlalillunnut isumaqatigiissusiorsimapput
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Qallunaat naalakkersuisui aamma Folketingimi partiit tamarmik eqqartuussiviit aningaasaqarnerannut ukiunut arlalinnut, ukiunut 2024-imiit 2027 ilanngullugu atasussamik ullumikkut isumaqatigiissusiorsimapput. Isumaqatigiissummi Kalaallit Nunaanni eqqartuussiviit aamma ilaapput, taakkumi qallunaat akisussaaffigalugit suliassaqarfiisa ataanniipput.
Atlantikup avannaani eqqartuussiviit pillugit suliniutit arlallit isumaqatigiissutikkut aallartinniarneqarneqarput, taakkualu ilaatigut it-mik ikorfartorneqarnermut tunngatillugu suliassanik amerliartuinnartunik imaluunniit sulianik suliarinnittarnernik sivisuunik eqqartuussiviit unammilligassaqarnerisa qanoq iliuuseqarfiginissaannik ukiuni arlalinni suliniutit ikorfartussavaat. Kalaallit Nunaanni eqqartuussiveqarnerup patajaallisarneqarnissaa siunertaralugu, Kalaallit Nunaanni suliniutinut piffissami 2024-imiit 2027 ilanngullugu 50,1 mio. kr.-it immikkoortinneqarnissaat aallarnerniarneqarpoq.
Eqqartuussiviit iluini digitaliusumik kingulerunnerup qanoq iliuuseqarfigineqarnissaanut aningaasanik immikkoortitsisoqarnera Naalakkersuisut pitsaasutut isigaat. Tamanna sivisuumik utaqqineqarsimavoq. Sulianik suliarinninnermi killiffinnut digitaliusumik kingulerunnerup ullut tamaasa kigaallisitsisarnera, sulisut, eqqugaasut aamma pasisat naapittarpaat.
”Sulisussanut aamma piginnaasat ineriartortinneqarnissaannut aningaasanik immikkoortitsisoqarnera aamma pitsaalluinnartuuvoq. Taamaaliortoqarnerata annertunerusumik suliamut tunngasumik ilisimaarinninnermik aamma sulianik suliarinninnermi sukkassutsip annertusineqarneranik kinguneqarnissaa, Naalakkersuisut naatsorsuutigaat. Taassuma isumaa annertoorujussuuvoq, tassami eqqartuussiviit suliaat inunnut pissutsini navianartuniittunut aamma eqqartuussiveqarnermut tatiginninnermut tunngassuteqarput” Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq oqarpoq.
Malittarisassat piuminarsarneqarnissaasa isiginiarneqarnissaannut tunngatillugu, uagut isumaqatigiissummi ilaasutut, Inatsiseqarnermut ministereqarfimmit ilaatinneqartussaagatta, Naalakkersuisut maluginiarpaat. Eqqartuussiveqarfitta pitsaassusaa pillugu oqaloqatigiinnerit ingerlateqqinnissaannut Naalakkersuisut piareersimapput.
Attaveqarfissaq: Naalakkersuisup allattaa Jeanette L. Petersen