AtuartigukSungiusarfik Ikinngut nutaamik illuutitaarpoq
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Ullumikkut inuusuttunut inersimasunullu ineriartornermikkut akornutilinnut ulloq unnuarlu paaqqinnittarfiup, Sungiusarfik Ikinngutip, illuutaa nutaaq atoqqaartinneqassaaq.
Inuit piginnaanikillisimasut innuttaasuni timikkut ersinngitsukkullu akimmiffeqarnerisigut killilersorneqannginnissaat Naalakkersuisut takorluugarivaat.
Ulloq 16. novembari Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede, aamma Isumaginninnermut Aqutsisoqarfik inuusuttunut inersimasunullu ineriartornermikkut akornutilinnut ulloq unnuarlu paaqqinnittarfiup, Sungiusarfik Ikinngutip, Ilulissaniittup, illuutaanik nutaamik atoqqaartitsiniarput, taanna matuminnga takorluukkamik eqquutstitsisussaq.
Illuut nutaaliaalluni Sungiusarfillu Ikinngummi najugaqartut ullut tamaasa pisariaqartitaannut tulluarsagaallutik aaqqissugaapput.
- Illuut najugaqartut atugarissaarnerinut pingaaruteqarpoq ineriartornissaannullu periarfissaannik tapersiissalluni. Sungiusarfik Ikinnguteqartillugu innuttaaqataasunut innarluutilinnut amerlanerusunik ininik pitsaasunik tikikkuminartunillu tulluartunik inuiaqatigiit tunniussisinnaanissaannut qaninnerulerput taannalu najugaqartunut sulisunullu ulluinnarni toqqissisimanermik pissarsititseqataassaaq, Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede taama oqarpoq.
Sungiusarfik Ikinngut najugaqarfittut immikkoortortamik najugaqartunut 20-nut inissalimmik nutaamik sananermik, illooreersumillu pingaarnermik allanngortiterinermik ilaqarpoq.
Attavissaq
Sukumiisumik paasisaqarusukkuit naalakkersuisup allattaa Lars Salik H. Kielsen e-mailikkut salik@nanoq.gl imaluunniit oqarasuaatikkut: +299 34 50 00 attavigiuk.