Parisimi isumaqatigiissut Kalaallit Nunaanni periarfissanik pilersitsissaaq

Kalaallit Nunaat Parisimi isumaqatigiissummut ilaalissaaq

Inatsisartut ullumikkut aalajangerput, Kalaallit Nunaat Parisimi isumaqatigiissummut ilaalissasoq. 

”Naalakkersuisut sinnerlugit oqaatigissavara, ullumikkut ulloq nuannaarfiummat. Inatsisartut taamatut aalajangiinermikkut nunatsinnut nunarsuatsinnullu iliuuseqarusussusertik, aalajangiisinnaanertik mianerinninnertillu takutippaat. Akisussaaffimmik tiguseqataanerput aammalu silap pissusianik ajornartorsiornermut iliuuseqarnerput tulluusimaarutigaara. Kalaallit Nunaanni Parisimi isumaqatigiissummut ilaalernitsigut, nunatsinnut kinguaassatsinnullu iluaqutaasunik ineriartortitsinissaq qulakkiissavarput”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq nangillunilu:

”Tunngavissatut piareersaataasuni suliarineqartuni takutinneqarpoq, Parisimi isumaqatigiissut Kalaallit Nunaata ineriartornissaanut akornutaasussaanngilluinnarpoq, killormuuanilli. Parisimi isumaqatigiissumut ilaalernerput Namminersornermut inatsit tunngaviussaaq. Nunap inoqqaaviusutut nammineerluta aalajangiisinnaanerput akuersaarlugu ilaalissaagut. Silap pissusianut politikkimut akisussaasuuvugut, atugassarititaasullu taakku tunngavigalugit Parisimi isumaqatigiissummut ilaalissaagut”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq. 

Tunngavigisaq
Inatsisartut ullumikkut, 14. novembari 2023-mi, 2023-mi ukiakkut ataatsimiinnermi immikkoortoq 60 aappassaanneerpaat. Inatsisartuniit Inatsisartut Eqqissisimatitsinermut Avatangiisinullu Ataatsimiititaliap allannguutissatut siunnersuutaa akuersaarlugu taasissutigaat. Allannguutissatut siunnersuut tunngavigalugu Naalakkersuisut Kalaallit Nunaata Parisimi isumaqatigiissummut ilaalernissaa pillugu United Nations Framework Convention on Climate Change-mut (UNFCCC) nalunaaruteqarnissamut pisussaaffilerneqarput. 

Taamaattumik ukiuni tulliuttuni imatut pisoqassaaq: 

Naalakkersuisut Kalaallit Nunaata Parisimut ilaalernissaa FN-imi Silap Pissusianut Isumaqatigiissummut nalunaarutigissavaat.

Naalakkersuisut nunami namminermi silap pissusianut periusissiamik suliaqassapput. Tamatumani innuttaasut, inuussutissarsiortut inuinnarnilu inuiaqatigiit akuutinneqassapput. Periusissiaq silap pissusianut tunngatillugu anguniagassanik imaqassaaq, aammalu Kalaallit Nunaanni qanoq iliorluni mingutsitsinngitsunut nuutitsiartornermut aningaasaqarnikkullu ineriartortitsisoqarnissaanut siunnerfilersuisoqassalluni.

Silap pissusianut periusissiaq aallaavigalugu nunamit namminermit ilanngussassat – NDC-nik taaneqartut – immikkoortuni tamani silap pissusianut anguniagassanik imaqartut aalajangersimasut aalajangersarneqassapput. Kalaallit Nunaanniit immikkoortut ilaat, soorlu aatsitassarsiorneq aamma/imaluunniit aalisarneq ilaatinneqassanngitsut aalajangiisoqarsinnaavoq. 

Kalaallit Nunaata NDC-vi UNFCCC-mut tunniunneqarnissaat, taamaalillunilu 2030-miit sunniuteqalernissaat naatsorsuutigineqarpoq. NDC ataaseq ukiut tallimakkaarlugit atuutsinneqartassaaq.

Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Naalakkersuisup allattaa Manasse Berthelsen tlf.: +299 34 56 03 / 54 88 68-imut, imaluunniit e-mail-it: mabr@nanoq.gl imaluunniit pan@nanoq.gl aqqutigalugit attaveqarfigineqarsinnaavoq.