Atuartiguk2023/2024-p ukiuunerani Kujataani sillimmatitut qulimigooqartitsinissaq pillugu isumaqatigiissut
Nassiussisuuvoq: Ineqarnermut Attaveqaasersuutinuullu Naalakkersuisoqarfik
2023/2024-p ukiuunerani, ersarinnerusumik decembarip aallaqqaataanit februaarip 29-ata tungaanut Kujataani sillimmatitut qulimigooqartitsinissaq pillugu Ineqarnermut Attaveqaasersuutinullu Naalakkersuisoqarfik Air Greenlandimik isumaqatigiissusiornissaa Naalakkersuisut akuersissutigaat.
Ineqarnermut Attaveqaasersuutinullu Naalakkersuisoq, Hans Peter Poulsen, ima oqarpoq:
”Kiffartuussinissamik isumaqatigiissut malillugu imaatigut angallassinissamut sikuunera naammaginanngitsumik piffissami sivisuumi akimmiffinngorsinnaasartoq misigisareerparput. Ukioq kingulleq ukiuunerani umiatsiamik qulimiguulimmillu angalaniartut taamaatitsinernik, kinguaattoornernik, angalanissaasalu allanngortinneqarnerinik naleqqutinngitsumik nalaassipput. Taassumap saniatigut allakkat, poortukkallu nassiussat kinguaattoorput. Massakkut ukiuunerani Kujataani angallasseriaatsip attatiinnarneqarnissaanut isumaqatigiissut taanna tapertaassaaq.”
2022/2023-p ukiuunerani sikuunera patsisaalluni, kiffartuussinissamik isumaqatigiissut malillugu imaatigut angallassinissaq qaammatini pingasuni unitsikkallarneqarpoq. Taamaalilluni Air Greenlandip qulimiguua ataasiinnaq nunap immikkoortortaani angallassisussanngormat, angallasseriaaseq unammillernartumik inissisimanikuulluni.
Sikuneratigut kiffartuussinissamik isumaqatigiissut malillugu imaatigut angallassisoqarsinnaajunnaassappat, angallasseriaatsip tunngavissinneqarnissaa isumaqatigiissuteqarnermi siunertaavoq. Taamaattumik 2023-mi decembarip aallaqqaataata, 2024-milu februaarip 29-ata akornanni qumiliguullit AS-350-it marluk Narsarsuarmi aallaaveqartut, pisariaqalissappat angallassissutigineqalissapput. Qulimiguullit taakkua marluk tamarmik immikkut tallimanik ilaasoqarsinnaapput. Pisariaqarfiani qulimiguullit angallassissutigineqariaannaallutik aaqqiissuteqarneq, sillimmatitut isigineqarsinnaavoq. Taamaalilluni taamaatitsinerit, kinguaattoornerillu ikilissapput, ilutigisaanillu piffissaq eqqorlugu angallassineq pitsaanerulissalluni.
Air Greenlandimi pisortaq, Jacob Nitter Sørensen, ima oqarpoq:
“Isumaqatigiissut taanna pitsaasuullunilu pingaaruteqarpoq, ukiuni kingullerni sikuusarnera eqqarsaatigalugu Kujallermi angallassinermut qulakkeerutaammat. Angallatit atorsinnaannginnerini angallassinissamut timmisartoq ataaseq naammanngilaq taamaattumillu nuannaarutigaarput timmisartut pisariaqartitat qulakkeerneqarmata.”
Ukiuunerani sikunera Naalakkersuisut malinnaavigissavaat, isumaqatigiissutillu iluaqutissartaata nalinga naliliiffigalugu.
Bilitsit kiffartuussinissamik isumaqatigiissummi nalinginnaasumik piumasaqaataasut malillugit tuniniarneqassapput.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl