AtuartigukVivian Motzfeldtip Qingdaomi China Seafood EXPO takuniaavigaa
Nassiussisuuvoq: Naalakkersuisut Siulittaasuata Naalakkersuisoqarfia
Ulloq 25. oktober Naalagaaffinngornissamut Nunanullu allanut Naalakkersuisoq Vivian Motzfeldt Qingdaomi China Seafood EXPO-mut takuniaavoq, tassanilu ilaatigut Royal Greenlandip nittarsaassivia takuniarpaa. Taanna ornigarneqarluarpoq, Royal Greenlandilu taakkulu tunisassiaat Kalaallillu Nunaat annertuumik soqutigineqarput. China Seafood EXPO ukiut tamaasa ingerlanneqartarpoq suliffeqarfinnullu nunatsinneersunut aalisakkanik tunisassianik nittarsaassiviit pingaarnersaralugulu annersaraat.
Coronap tunillaassuunnerata kingorna Kinap ammaqqinnerani suliffeqarfiutitta tapersersorneqarnissaat Naalakkersuisunut annertuumik pingaaruteqarpoq, aamma China Seafood EXPO-mi.
Qingdao umiarsualiveqarfissuuvoq Immamut Sungaartumut sineriaqartoq Tassanilu soorunami piffimmi aalisarneq annertuumik aallunneqarpoq. Illoqarfiup qanitaaniittut ilanngullugit illoqarfik 10 millionit missaannik innuttaqarpoq.
Qingdaomissaaq Royal Greenland Polar Seafoodilu suleqatigalugit nuimasortanut ilasseqatigiinnermik ingerlatsisoqarpoq, tassanilu oqartussat sinniisaat suliffeqarfissuillu niueqataat piffimmilu suleqatit peqataapput.
Matumanilu Vivian Motzfeldt oqalugiarpoq, ”Qingdao-imut sanilliullugu, uagullu 56.000-iinnarnik innuttaqarnerput eqqarsaatigalugu, suliffeqarfitta maani taamaa sivisutigisumik niuersinnaasimanerat angusaavoq pitsaasorujussuaq. Ukiut 20-t matuma siornatigut Royal Greenland Qingdao-imi tuniniaanermut allaffimmik ammaavoq, Polar Seafoodilu suliffeqarfiillu allat peqatigalugit suliat pitsaalluinnartut ingerlanneqarput, Kalaallillu Nunaata aningaasaqarneranut iluaqutaasumik aalisakkanik tunisassiat Qingdao-imut avammut niuerutigineqartarput. Maani suleqativut peqatigalugit nunarsuarmi qeqertat annersaanni 56.000-iinnarnik innuttaqarluta, Kinami suliffinnik aningaasaqarnikkullu siuariarnermut iluaqutaanerput tulluusimaarutigisinnaavarput. Kalaallit Nunaata suliffeqarfiutittalu pimoorussillutik ingerlatsinerat, suleqatitullu pikkorissuunerat tamatuma aamma takutippaa, tamannalu aamma Kinami oqartussat iluarisimaarpaat.”
”Naalakkersuisut sinnerlugit suliffeqarfitta Kinami pingaarutaat malunnartillugulu taakku pitsaasumik attaveqarnerminnik attassiinnarusunnerannik niuernermilu atugassarisaannik pitsannguiniarneranni tapersersorsinnaagakkit nuannaarutigaara. Sinerissatsinni tunisat pisallu annertuut Kinamut niuerutigineqartarput. Suliffeqarfitta ingammik Kinamut avammut niuerneranni siunnerfilimmik sulinerput nunatsinni inuiaqatigiinnut nunatsinnullu pingaaruteqartorujussuuvoq”, Naalagaaffinngornissamut Nunanullu Allanut Naalakkersuisoq Vivian Motzfeldt ilasseqatigiinnermi oqarpoq.
”Kina Royal Greenlandip niuerfiini annersaavoq, tassanilu kalaallit tunisassiaasa pitsaassusiat qaffasissoq, Kalaallillu Nunaannit nunarsuarmi immami minguinnersameersuunerat annertuumik iluarisimaarneqarpoq. Taamaammat tamatuma Naalakkersuisunit ikorfartorneqarnerat pingaaruteqarpoq, taamaaliornerannilu kalaallit tunisassiaasa aallunneqarnerat annertusarneqarpoq” Royal Greenlandip pisortaanera Susanne Arfelt Rajamand oqarpoq.
”Polar Seafoodimit Kinamik niueqateqarnitta politikikkut tapersersorneqarnera nuannaarutigisorujussuullugulu iluarisimaarparput, Naalakkersuisullu taamatut naliitsumik tapersersuinerannut qujassuteqarfigerusuppavut. Kalaallit Nunaata 1990-kkunnili Kinamik niueqateqarnermik aallartitsineranilli Polar Seafood peqataavoq. Pisisartorpassuavut, suleqatitsinnik taagukkavut aalajaatsut nuannarutigaavut. Ilaatigut immap nillertup raajaanik, qaleralinnik saarullinnillu Kinami niuerfiup ineriartortinneranut peqataaneq suleqatitsinnut uatsinnullu iluarisimaarnarpoq”, Polar Seafoodimi pisortaq Henrik Leth oqarpoq.
Attaveqarfissaq: Sinniisoqarfimmi pisortaq, Jacob Isbosethsen, jsis@nanoql.gl