AtuartigukSapaatip akunnerani matumani: Meeqqat sakkortuumik nalaataqarsimasut pillugit isumasioqatigiinneq
Nassiussisuuvoq:
Ullumikkumiit meeqqat sakkortuumik nalaataqarsimasut pillugit Isumaginninnermut Aqutsisoqarfik isumasioqatigiinneq aallartippaat, taanna meeqqanut pitsaanerpaamik ikiuinissamik qulakkeerinnittussaq – nuna tamakkerlugu 126-inik peqataatitaqarluni aaqqissuussaq.
Isumasioqatigiinnermi ”Meeqqat sakkortuumik nalaataqarsimasut kingunerlutsitsisarneri aamma qanoq taakkununnga ikiuisinnaaneq pillugit Kalaallit Nunaanni isumasioqatigiinneq” meeqqanik sakkortuumik misigisaqarsimasunik qulaajaanerup pingaaruteqassusaa Isumaginninnermut Aqutsisoqarfiup ersarissassavaa.
- Meeqqanut inuusuttunullu tunngasuni suliaqartut ilisimasaqarnerulersinnissaat piginnaanngorsarnissaallu uannut pingaaruteqarpoq. Suliaqartut matumani isumasioqatigiissitsinermi aggersarneqassapput sakkussaannillu pingaarutilinnik aamma ilisimasanik atoruminartunik tuniorarneqassallutik, taamaasilluta meeqqat inuusuttullu sakkortuumik nalaataqarsimasut pitsaanerpaamik ikiorsinnaassavagut, Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede oqarpoq.
Ulluni sisamani isumasioqatigiissitsinermi peqataasussat sullissisuusut, meeqqat atuarfianni siunnersortaasut, tarnip pissusaanik ilisimasaqartuusut allallu meeqqat inuusuttullu pillugit suliaqartartut attuumassuteqartuusut, katsorsaasarneq qulaajaasarnerlu eqqarsaatigalugit suliniutit pitsanngorsaaviginiarlugit sungiusarneqassapput.
Tamanna Syddansk Universitetimik suleqateqarnikkut pissaaq, tassani Videnscenter for Psykotraumatologimiit tarnip pissusaanik ilisimasallit ilaatigut meeqqat sakkortuumik misigisaqarsimasut pillugit misissuutinik SDQ-mik, ITQ-CA-mik aamma Misissuut Miki-mik OCTS-imillu atuisarnermik ilisaritsitsissallutik.
- Meeqqat inuusuttuaqqallu ikiorserluassagutsigit ilisimasanik nutaanik aallerfeqartariaqarpugut, saniatigullu ilisimalikkagut aamma pingaaruteqarput siammarternissai. Sakkortuumik nalaataqartarneq eqqartorneqartarpoq, kisianni piffissanngorpoq sullissisorpassuit ataatsimoorluta iliuutsinik sakkussanik siammarterinissarput, meeqqat inuusuttuaqqallu artorsartut sukkanerusumik ikiorsernissaannut anguniassagutsigu. Imaanngitsoq psykologiusariaqartoq ikiorsiisussaq, sulisunik nunatsinni pikkorittorpassuaqarpoq aamma sunniuteqarluartunik – sulilu aamma sakkussaminnik noqqaasut, Isumaginninnermut Aqutsisoqarfiup Innuttaasunut Immikkoortortaqarfiani pisortaq aaqqissuusseqataasorlu, Naja Lund Kielsen oqarpoq.
Isumasioqatigiissitsineq Café Tamumi Nuummi pissaaq, oktoberillu 27-iata tungaanut ingerlanneqassalluni.
Sukumiisumik paasisaqarusukkuit naalakkersuisup allattaa Lars Salik H. Kielsen e-mailikkut salik@nanoq.gl imaluunniit oqarasuaatikkut: +299 34 50 00 aamma Isumaginninnermut Aqutsisoqarfik e-mailikkut borgerrettetafdeling@nanoq.gl attavigikkit.