Vivian Motzfelt Kinamut angalalerpoq

Ulloq 22. oktober Naalagaaffinngornissamut Nunanullu Allanut Naalakkersuisoq Vivian Motzfeldt Kinami pisortatigoortumik tikeraarnini aallarnerlugu Beijingiliarluni aallassaaq.

Ukiuni arlalinni siusinnerusukkut Naalakkersuisunut ilaasortaasartut inuussutissarsiortunik peqateqarlutik Kinami ataatsimeeqatiginnittarput, angalanerli una 2018-p kingorna Naalakkersuisut siullermeertumik pisortatigoortumik Kinamut tikeraarnerissavaat.

Beijingimi Kalaallit Nunaata Sinniisoqarfiata pisortatigoortumik politikikkut ammarneqarnera, ammaanerullu nalliuttorsiutigineqarnera angalanermi siunertaavoq. Tamatuma saniatigut Naalakkersuisoq Beijingimi politikikkut ataatsimeeqateqarnernik ingerlatsillunilu Qingdaomi China Seafood EXPO-mut Royal Greenlandimit Polar Seafoodtimillu sinniisunik peqateqarluni takuniaassaaq.

Beijingimi Sinniisoqarfiup pisortatigoortumik ammarneqarneranut atatillugu, sapaatip akunnerata ingerlanerani ilaatigut Airgreenlandimit Visit Greenlandimillu peqataaffigineqartumik takornariartitsinermik aaqqissuussinernik ingerlatsisoqassaaq.

Tassunga atatillugu Naalagaaffinngornissamut Nunanullu Allanut Naalakkersuisoq ima oqaaseqarpoq:

”Kinamut tikeraarnissara neriulluarfigeqaara, Naalakkersuisullu sinnerlugit Kalaallit Nunaata Sinniisoqarfiata pisortatigoortumik ammarnissaa, Kalaallillu Nunaata Kinallu aallartitatigut attaveqarnerata malunnartinniarnissaa immikkut nuannaarutigaara. Kinami niuerfik ukiorpassuarni aalisakkanik avammut niuernitsinnut atatillugu suliffeqarfitsinnut pingaaruteqartorujussuuvoq, tikeraarninnullu atatillugu takornariartitsinerup, nunatsinni takornariartitsinermik ingerlatsisunut iluaqutaasumik suli annertulernissamut periarfissaqarluartup aamma aallunneqarnissaa nuannaarutigaara”


Paasissutissat erseqqinnerusut Sinniisoqarfimi pisortaq Jacob Isbosethsen jsis@nanoq.gl Naalakkersuisulluunniit allattaa Naasunnguaq B. Kristensen nabk@nanoq.gl attaveqarfigalugit pissiarsiarineqarsinnaapput.