AtuartigukSpiralilersuisimaneq pillugu suliap killiffia
"Spiralilersuisimanerup" qulaajarneqarneranut peqataanissamut taarsiiffigitinnissamullu periarfissat pillugit paasissutissat
Nassiussisuuvoq: Peqqissutsimut Naalakkersuisoqarfik
Aallaqqaasiut
Tusagassiorfinnut nalunaarummi uani "spiralilersuisimanerup" killiffiata aamma "spiralilersuisimanermit" arnat eqqugaasimasut qulaajaanermi peqataanissamut qanoq periarfissaqarnersut kiisalu taarsiiffigitinnissamut qinnuteqarnissamut maannakkut qanoq periarfissaqarnersut pillugit paasissutissat nassuiarnissaat anguniagaavoq.
Sumut saaffiginnittoqassava?
1. "1960-1991-imi Spiralilersuisoqarsimaneranik" qulaajaanermut ilanngussineq (Ilisimatusarfimmit misissuinermik suliaqartut): Oqaluttuassat suli maannamut Nunatsinni Nakorsaaneqarfimmut sullissivik.gl aaqqutigalugu - imaluunniit Nunatsinni Nakorsaaneqarfimmut toqqaannartumik saaffiginninnikkut nalunaarutigineqassapput.
2. Arnat eqqugaasut taarsiiffigitinnissamut danskit naalagaaffiannut piumasaqarusuttut: Arnat eqqugaasimasut Facebookimi gruppe pilersinneqarsimasoq eqqartuussissuserisulluunniit suliamik isumaginnittut attavigissavaat.
3. Kalaallit Nunaata peqqinnissamut suliassaqarfiup 1992-imi tigunerata kingorna akuersinertaqanngitsumik naartunaveersaatinik ikkussiffigineqarsimasut pillugit suliat: Suliat taakku Nunatsinni Nakorsaaneqarfimmut suli maannamut nalunaarutigineqarsinnaapput.
Suliani assigiinngitsuni ataasiakkaani periutsit ataani sukumiinerusumik nassuiarneqarput.
Tunuliaqutaasut
Naalakkersuisut danskillu naalagaaffiat 2023-mi majimi "spiralilersuisimanerup" oqaluttuarisaanikkut qulaajarneqarnissaa pillugu isumaqatigiissuteqarput. Qulaajaanermi Kalaallit Nunaanni 1960-1991-ikkunni, tassa imaappoq Kalaallit Nunaata peqqinnissaq pillugu suliassaqarfiup tigunissaata tungaanut naartunaveersaatilersuinerni suleriaatsit atorneqarsimasut misissorneqassapput. Ilisimatusartunit ilaatigut Ilisimatusarfimmi, Københavns Universitetimi Syddansk Universitetimilu ilisimatusartunit suliarineqassaaq.
2022-mi majimi arnat Nunatsinni Nakorsaaneqarfimmut oqaluttuaminnik nassiussisinnaanissaat ammaanneqarsimavoq, taamaalillutik taakku qulaajaanermi ilanngunneqarsinnaaniassammata. Maannamut arnat "spiralilersuisoqarsimaneranit" eqqugaasimasut oqaluttuaat 100-ngajaat tiguneqarsimalerput.
Arnat "spiralilersuisoqarsimaneranit" eqqugaasimasut, inuttut pisinnaatitaaffiiagaasimanertik pissutigalugu qanittumi taarsiiffigitinnissamut piumasaqaammik danskit naalagaaffiannut nassiussisimapput.
Arnat pineqartut iliuusissatut periarfissaat
Arnat "spiralilersuisoqarneranit" eqqugaasimasut suliniutinut ingerlasunut peqataanissamut imatut periarfissaqarput.
1. "Spiralilersuisoqarsimaneq" pillugu qulaajaasoqareranut ilanngussaqarneq: Ilisimatusarfimmiit ilisimatusartut misissuitinneqartut maanna qulaajaaleruttorput arnallu eqqugaasimasut oqaluttuaannik tigusaqarnissaminnut piareersimallutik. Paasissutissat sukumiinerusut misissuinermik suliaqartut nittartagaanni takuneqarsinnaapput
Misissuinermik suliaqartut oqaluttuanik namminneerlutik tigusaqarsinnaalernissaasa tungaanut Nunatsinni Nakorsaaneqarfimmut sullissivik.gl aqqutigalugu nassiussisoqarsinnaavoq - imaluunniit Nunatsinni Nakorsaaneqarfik toqqaannartumik emailikkut nun@nanoq.gl attavigineratigut nalinginnaasumilluunniit allakkatigut uunga:
Nunatsinni Nakorsaaneqarfik
Postbox 120, 3900 Nuuk
Arnat 100 sinnerlugit oqaluttuaat Nunatsinni Nakorsaaneqarfimmut nassiunneqarsimasut pilersaarut malillugu misissuinermik suliaqartunut tunniunneqassapput. Tunniussinermili arnat oqaluttuaminnik nassiussisimasut ataasiakkaarlutik akuersisimanissaat piumasaqaataavoq. Oqaluttuanik nassiussisimasut tamarmik oqaluttuaasa ilisimatusartoqatigiinnut tunniunneqarnissaannik akuersinissaannik qinnuiginiarlugit qanittumi Nunatsinni Nakorsaaneqarfimmit saaffigineqassapput.
2. Arnat eqqugaasut taarsiiffigitinnissamut danskit naalagaaffiannut piumasaqarusuttut: Facebookimi gruppe ilaasortanuinnaq ammasoq pineqarpoq . Gruppe taanna aqqutigalugu, aammali Ehmer Pramming Advokater-imi eqqartuussissuserisunut, pineqartunik ikiuisunut toqqaannartumik saaffiginninnikkut taarsiiffigineqarnissamut piumasaqaateqartoqarsinnaavoq.
Arnat Nunatsinni Nakorsaaneqarfimmut nalunaarutiminnik nassiussereersimasut nassiussartik pigiunnaarsimagunikku Nunatsinni Nakorsaaneqarfiup nalunaarut eqqartuussissuserisumut ingerlateqqissagaa piumaffigisinnaavaat. Arnat gruppemi matoqqasumi immersugassaq suliarineqarsimasoq atorlugu taarsiiffigineqarnissamut piumasaqaammik namminneerlutik tunniussaqartariaqassapput.
Nunatsinni Nakorsaaneqarfik nammineerluni eqqartuussissuserisumut allanulluunniit ingerlatitseqqiisanngilaq. Arnat oqaluttuaminni taarsiiffigitinnissamut piumasaqaammik Nunatsinni Nakorsaaneqarfimmut nassiussisimasut danskit naalagaaffiat illuatungiliullugu suliami peqataaniarunik namminneerlutik Facebookimi gruppemut eqqartuussissuserisunulluunniit saaffiginnittariaqassapput.
Nunatsinni Nakorsaaneqarfik peqqinnissaqarfik suleqatigalugu, arnat peqqinnissaqarfimmi journalitik qanganisaanerusut ajornannginnerusumik pissarsiarisinnaanissaannut aaqqissuussissapput.
Peqqinnissamut suliassaqarfiup 1992-imi Kalaallit Nunaannit tiguneqarnerata kingorna akuersinertaqanngitsumik naartunaveersaatinik ikkussiffigineqarsimasut pillugit suliat
Peqqinnissamut suliassaqarfiup 1992-imi tiguneqarnerata kingorna arnat piffissami tassani akuersinertaqanngitsumik naartunaveersaatinik, tassunga ilanngullugu spiralinik, P-stavinik ikkussivigitissimanerminnik kapitissimanerminnillu 2022-mi decemberimi nalunaaruteqarsimapput.
Taamanikkut Peqqinnissamut Naalakkersuisup Mimi Karlsenip suliat taakku Nunatsinni Nakorsaaneqarfiup misissussagai piumaffigisimavaa. Arnat 1. januar 1992-ip kingorna akuersitinneqaratik spiralimik naartunaveersaatinilluunniit allanik pilerneqarsimasut suliat sukumiinerusumik misissorneqarsinnaaniassammata naammagittaalliuteqarnissaat kaammattuutigineqarpoq.
Piffissap sivikitsup iluani maannamut misissuinerit inerneri Peqqinnissamut Naalakkersuisumut Agathe Fontainimut saqqummiunneqassapput.
Suliat kingulliit naammagittaalliortarnermut malittarisassat atuuttut, Nunatsinni Nakorsaaneqarfiup nittartagaani sukumiinerusumik nassuiarneqartut malillugit suliarineqartarput .
Suliat pisoqalisimasut nakkutilliinermik sulianik Nunatsinni Nakorsaaneqarfiup suliaqartarnera pillugu malittarisassat atuuttut malillugit suliarineqassapput. Tamakku pisoqalineq ajorput.
Taarsiiffigitinnissamik qinnuteqaatit peqqinnissaqarfimmi taarsiiffigitinnissamut sulianik suliarinnittarnermut malittarisassat atuuttut malillugit suliarineqassapput. Suliaq Peqqinnissamut Naalakkersuisoqarfimmit isumagineqarpoq.
Nunatsinni Nakorsaaneqarfik, 18. oktober 2023
------------------------
1Misissuinermik suliaqartunut linki: https://www.uni.gl/ilisimatuututmisissuinerit/qulaajaaneq/
2Facebook-gruppemut linki: https://www.facebook.com/search/groups/?q=Isumaqataanatik%20spiralilertissimasunut&sde=Abo6mQGTwumSH8ghiQqAvvjPX7NFviMO4wSBhxr6grIQwUayjg5k0ye5FNdIS2HCiLkkJOB-TfP5YV29lVJ9zt3H
3Naammagittaalliuutinik suliaqarneq: https://nun.gl/emner/borgere?sc_lang=kl-gl