Akileraartarnermik aaqqissuusseqqinnermi isumaqatiginninniarnermut tunngasumik paasissutissanut eqqunngitsunut naqqiut

Nittartakkakkut aviisip Sermitsiap ullumikkut akileraartarnermik aaqqissuusseqqinneq pillugu politikikkut isumaqatiginninniarnernik allaaserisamik, politikimut tunngasortaasigut akileraarusersueriaatsikkullu naqqinneqartariaqartumik saqqummiussivoq.

Allaaserisami Naalakkersuisut tunngavissaqanngitsumik tutsuiginanngitsumik marloqiusamillu akileraartarnermi isumaqatiginninniarnernut pissusilersornerarlugit pisuutinniarneqarput. Pisuutitsiniarnerit Naalakkersuisut naalakkersuisooqatigiinnermi isumaqatigiissutiminni kingullermi nunatsinni momsimik (VAT) eqqussinissamik periarfissanik kissaateqarnermik saqqummiussinerannik tunuliaqutaqarput. Pisuutitsiniarnerilli taakku tunngavissaqanngivinnerat matumuuna erseqqissarumavara.

Aallaqqaasiullugu eqqussuinermi akitsuutit momsillu (VAT) annertoorujussuarmik assigiinngissuteqarnerat erse qqissarlara. Eqqussuinermi akitsuut nioqqutissat nunamut maanga eqqunneqarneranni akilersinneqartarpoq. Ilaatigut imigassamut aalakoornartulimmut tupanullu eqqussuinermi akitsuuteqartitsereerpugut. Moms (VAT) tassaavoq qallunaat oqaasiat atorlugu kaaviiaartitsinerunermi akitsuut. Suliffeqarfiit nioqqutissanik sullississutinilluunniit pisisartuminnut tunisinerminni momsimik akiliisitsisarnerisigut, momsillu akileraaruseriffimmut akilerneratigut moms atuuppoq. Peqatigisaanik momsimut namminneq pisinerminni akiliutiminnik ilanngaasinnaapput. Maani nunatsinni momseqanngilagut.

2024-mut aningaasanut inatsisissatut siunnersuutip siullermeerneqarnerani, Naalakkersuisut akileraarusiisarnermik aaqqissuusseqqinneq pillugu isumaqatiginninniarnernik ingerlatatik naammassinissaanut ingerlatissagaat, momseqalernissarlu isumaqatiginninniarnernut taakkununnga ilaanngitsoq oqaatigaara. Tamanna kialluunniit tupaallaatigisinnaanngilaa, momsimummi apeqqut isumaqatiginninniarnerni taakkunani sumilluunniit oqallisigineqarsimanngilaq. Taamaammat partiimi oqaaseqartartup momsip (VAT) Naalakkersuisut akileraartarnermik aaqqissuusseqqinnissamik siunnersuutaani pingaarutilimmik aningaasalersuutaaneranik oqarnera eqqunngilaq, nammineerlunilu tamanna aamma nalunngilaa. Taamaalillunilu aamma Naalakkersuisut allaaserisami momsimik (VAT) isumaqatiginninniarnerni ilaatitsiunnaarsimanerat ersarilluinnartumik kukkuneruvoq. Sunaluunniit isumaqatiginninniarnernut ilaatinneqarsimanngitsoq peerneqarsinnaanngilaq!

Naalakkersuisut akileraartarnermik aaqqissuusseqqinnissamik partiinik isumaqatiginninniaqateqarput, isumaqatiginninniarnernilu taakkunani eqqussuinermut akitsuutinik nutaanik periusissaq ilaatigut saqqummiunneqarpoq. Siunnersuutitut saqqummiunneqartoq taanna tunngavigalugu partiit assigiinngitsunik akissuteqarput, maannalu partiit akissutaat tunuliaqutaralugit annertunerusumik naatsorsuilluta suliaqaleruttorpugut. Taamaalilluta suli suliaq ingerlapparput, naammassinissaalu upperaara.

Naalakkersuisooqatigiit naalakkersuisooqatigiinnissamik isumaqatigiissummi VAT-imik (moms) erseqqinnerusumik misissorneqarnissaanik kissaateqarput. Taamaaliorpugut pissutigalugu nunatsinni tamani politikikkut oqallinnerni momsimik eqqussinissamik apeqqutip akuttunngitsumik saqqummiunneqartarnera pissutigalugu. Momsimilli atulersitsinissaq pisariusorujussuuvoq, Kalaallit Nunatsinnilu momsimik aaqqissuussinermik atulersitsinissaq pisortani namminersorlutillu inuussutissarsiortuni ukiuni amerlasuuni sukumiisumik piareersartoqarnissaanik pisariaqartitsissaaq. Taamaammallu maanna akileraartarnermik aaqqissuusseqqinnissamik isumaqatiginninniarnerni ingerlasuni taassuma ilaatinnissaa sukkulluunniit eqqarsaatersuutigisimanngikkipput. Taamattaaq aamma kingusinnerusukkut momsimik eqqussinissaq pillugu politikikkut aalajangiisoqarsimanngilaq. Taamaallaat momsimik apeqqutip misissornissaanik kissaateqarnerput oqaatigaarput – allamik naamik.

Taamaammat allat tutsuiginanngitsumik marloqiusamillu ingerlatsinerarlugit pisuutitsiniarnerat siunnerfilimmik politikikkut oqallinnermik takutitsinngitsoq isumaqarpunga. Taamaammat taama oqarneq akileraartarnermik politikikkut oqallinnermut tutsuiginartumik ilapittuutaasutut oqaaseqartup apersorneqartup isigineraa apererusuppara. Taamaalillunga allaaserisami oqaaseqartartut taaneqartut politikikkut pitsaasumik tutsuiginartumillu oqalliseriaatsimut uteqqinnissaannik kaammattorumavakka. Tassunga ilaavoq akileraartarnermik aaqqissuusseqqinnermik politikikkut isumaqatiginninniarnerit inimi isumaqatiginninniarfimmi pinissaat. Tamat saavanni oqallinnitsinni paasissutissanik piviusunik aallaaveqarluta oqalunnissarput matumanissaaq ilaavoq.


Inussiarnersumik inuulluaqqusillunga

Erik Jensen





Attaveqarfissaq:

Nikolai S. Christensen
Toqq/direkte 346675
nsch@nanoq.gl