Neqi A/S aamma KNI A/S pillugit malitseqartitsineq

Neqi A/S-ip siunissaa pillugu ilanngutassiaq ”Toqoraaviup aaqqissuussaanera piginnittaalu annertuumik allanngortinneqassapput”, Sermitsiaq.AG-ip 2023-mi oktobarip aappaani saqqumiuppaa.

Pisimasunik, massakkut killiffimmik, siunissamilu iliuusissat pillugit innuttaasut eqqortumik paasissutissikkumallugit, naatsorsuutit kusassarneqarnerinik uppernarsakkat kiisalu Neqi A/S-imi akiitsunik isumakkeerinninneq pillugit, ilanngutassiap kingunerisaanik ataasiakkaatigut erseqqissaasoqartariaqalersitsivoq.

Naatsorsuutinik kusassaaneq
KNI ingerlatseqatigiiffittut Neqi-p naatsorsuutaannik kusassaanngilaq. Taamaattorli KNI-mi Neqi-milu siornatigut atorfeqarsimasut ataasiakkaat KNI-p, Neqi-llu naatsorsuutaannik 2013-imit 2020 tikillugu naatsorsuutinik kusassaasimapput.

Siornatigut qitiusumik atorfillit naatsorsuutinik kusassaasimanerisa qulaajarneqarnissaa KNI-p suliffeqarfittut akisussaasutut suliffeqarfik kukkunersiuisartoq PwC, eqqartuussissuserisullu qanimut suleqatigalugit annertuumik ukkatarisimavaa, pisimasullu inatsisilerituunit nalilersoqqissaarneqarsimallutik. Sulianik qulaajaanerup kingunerisaanik, naatsorsuutinik kusassaasimanerit politiinit paasiniagassanngorlugit KNI unnerluutiginnippoq.

Qanoq pisoqarsimanersoq siornaakkunni paasineqarmalli, Neqi-mi pissutsit pillugit KNI Naalakkersuisunik qanimut oqaloqateqartarpoq. Pisoq paasineqarsimatsiaannartoq Naalakkersuisut tapersersuinerisigut isumaqatigiissutigineqarpoq, KNI-p Neqi nammineq aningaasaateqalerseqqissagaa. Akileraartarnermut oqartussaasut oqaloqatiginerisigut, 2023-mi marsip qaammataani nammineq aningaasaateqalerseqqinneqarpoq. Taassumap saniatigut Neqi-p siunissaa paasinarsarumallugu, Naalakkersuisoqarfinnit attuumassuteqartunit KNI-miillu inuttalerlugu ataatsimoorussamik suleqatigiissitaq pilersinneqarpoq.

Akiitsunik isumakkeerinninneq
Neqi-p nammineq aningaasaateqaqqilernissaanut pilersaarutit KNI-p kingullertigut ukiumoortumik naatsorsuutaanni atuarneqarsinnaapput, ingerlatseqatigiiffiullu ataatsimeersuarnerini tamanut saqqummiunneqartarlutik. Toqoraaviup 2013-imi nutarsarneqarneranut aningaasaliissutaasimasut, 2013-imit 2020 tikillugu naatsorsuutit kusassarneqarsimanerat, ukiunilu kingullerni amigartoorutit matussuserlugit akiitsunik katillugit 142,5 mio. koruuniusunik KNI-p isumakkeerinnissuteqarneratigut, ingerlatseqatigiiffik nammineq aningaasaateqaqqilerpoq.
Kusassaasimanerup kingunerisaanik, suliffeqarfiup ingerlatsineranut pisariaqartumik allannguutissat siusinnerusukkut allanngortinneqarsinnaasimanngillat.

Paasissutissanik annertunerusunik pisariaqartitsiguit, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik pan@nanoq.gl-imut attavigiuk.

Paasissutissat:

Suliaq naatsumik pillugu:
Neqi-p akiitsuisa 142,5 mio. koruuniusut isumakkeerinnissutiginerisigut, KNI A/S-ip 2023-mi marsip 28-ani Neqi nammineq aningaasaateqarsileqqippaa.

Tamanna 2021-mi aalajangerneqarpoq, namminerlu aningaasaateqaqqilernissaa ukiuni kingullerni pingasuni KNI-mut ukiumoortumik nalunaarusiani tamanit atuarneqarsinnaasuni ataavartumik nassuiaatigineqarluni: 2020/21-mi, 2021/22-mi kingullermillu 2022/23-mi.

Pissutsit assigiinngitsut patsisaallutik akiitsut pilersimapput:

• 2012-mit 2014 tikillugu toqoraavimmik nutarsaaneq, Namminersorlutik Oqartussat isumaqatigiissuteqarfiginerisigut KNI-mit taarsigassarsinikkut aningaasalersorneqartoq (60 mio. koruunit missaat)
• Neqi-p amigartoorutaasa 2022/2023 tikillugu amerliartorneri
• Piffissami 2013/14-imit 2019/20 tikillugu amigartoorutit naatsorsuutinik kusassaanikkut qullersaqarfimmut, KNI-milu siulersuisunut isertuunneqarput. Tamanna 2022-p qiteqqunnerani inaarutaasumik erseqqissivoq
• Ikaartaatinik pisineq
  
  

Naatsorsuutinik kusassaasimaneq pillugu kikkut ilisimatinneqarsimappat?

• Suliaq pillugu Namminersorlutik Oqartussat, innuttaasullu ataavartumik ilisimatinneqarnikuupput.
• Inatsisartut Aningaasaqarnermut Akileraartarnermullu Ataatsimiititaliaa, 2021-mi oktobarip 29-ani KNI-mik ataatsimeeqateqarnerani ilisimatinneqarpoq.
  
  

2013-imit 2022 tikillugu ukiut kusassaaffiusut:

• Piffissami tassani aningaasartuutit arlallit naatsorsuutini pissusissamisut inngillat. Taassumap kingunerisaanik angusat qaffasippallaarujussuartut nalunaarutigineqartarnerinik tamanna Neqi A/S-imut kinguneqarpoq.
• 2020/21-p naaneranit Neqi A/S-imi naatsorsuutitigut inernerit:
  
  • Neqi A/S-ip 2020-2021-mi naatsorsuutai: -21.906 mio. kr.
  • Neqi A/S 2021-2022-mi naatsorsuutai: -10.687 mio. kr.
  • Neqi A/S 2022-2023-mi naatsorsuutai: -2,461 mio. kr.
    
    

Siunissami Neqi-p aningaasaqarnissaa:
Ingerlatseqatigiiffik 1995-imi pilersinneqarnerminiilli ukiuni naatsorsuusiorfiusuni 30-usunit 20-ni amigartooruteqartarsimavoq.

Massakkut ingerlatat attatiinnarumallugit kiffartuussinissamik isumaqatigiissummut akiliutigineqartartut ukiuni kingullerni 5 mio. koruuninit, 13 mio. koruuninut qaffanneqarnikuupput. Neqi A/S-imut periarfissaasinnaasunik, periaasiusinnaasunillu misissuisumik suleqatigiissitamik pilersitsisoqarnikuuvoq. Naalakkersuisoqarfinnit attuumassuteqartunit KNI-miillu inuttalerneqarluni ataatsimoorussamik suleqatigiissitap naatsorsuutigaa, periaasissaq 2023/2024-p ingerlanerani naammassisimassallugu.