AtuartigukJoint Committeep Qaqortumi ataatsimiinneranut Kalaallit Nunaat USA-mut aaqqissuisuuvoq
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Ukiumoortumik Joint Committeep ataatsimiinnera Naalakkersuisut amerikamiullu naalakkersuisuisa akornanni ingerlanneqartoq aamma danskit naalakkersuisuinit peqataaffigineqartoq septemberip 28-ani ukioq 2023 ingerlanneqarpoq. Siorna ukiumoortumik ataatsimiinneq Mainemi ingerlanneqarnikuuvoq. Taamaalillunilu nunatta ukioq manna Qaqortumi ingerlanneqartumik ataatsimiinneq aaqqissuisuuffigaa.
Ukiumoortumik Joint Committeemi ataatsimiittarnerit siunertaraat Nunatta USA-llu akornanni ilisimatusarnikkut, ilinniartitaanikkut, kulturikkut, aatsitassaqarnikkut, nukissiuteqarnikkut, avatangiisitigut, niuernikkut aammalu aningaasalersuisarnikkut suleqatigiinnerup killiffissiornissaa.
Joint Committee aqqutigalugu USA-p nunattalu akornanni suleqatigiinnerup nukittorsartuarnissaa illuatungeriit soqutigisarigaat Naalagaaffinngornissamut Nunanullu Allanut Naalakkersuisup Vivian Motzfeldtip ammaalluni oqaatigaa.
Killiffissioqatigiinneq suleqatigiinnermilu tulleriiaarinissamik eqqartuinerit sioqqullugit peqqinnissaqarfik aamma silap pissusaanut tunngasut Joint Committeemi suleqatigiissutissatut ilanngunneqarsinnaaneri periarfissatut eqqartorneqarput.
“USA-mik suleqateqarnerput pitsaasumik tunngaveqarluartumillu ineriartortoq takusinnaallugu nuannaarutigeqaara. Nunatta USA-llu akornanni pingaartitaqaqatigiinneq suleqatigiinnermi matumani qulakkeerneqarpoq. Nuannaarutigaaralu tamanna periarfissaq iluatsillugu peqqinnissaqarfiup suliassaqarfiisigut silallu pissusianut tunngasutigut suleqatigiinnerunissamik kissaateqarnerup amerikamiunut suleqatitsinnut apuussinnaasimagakku. Itinerusumik qanoq imaqartissinnaanerivut piffissami tulliuttumi oqaluuserilissavagut, qilanaarpungalu aappaagu USA-mi ingerlanneqartumik ataatsimeeqqinnissamut” Naalakkersuisoq Vivian Motzfeldt taama oqaaseqaateqarpoq.
Nunatsinni mittarfinnik nutaanik pingasunik pilersitsinerup attaveqaqatigiinnikkut piumasaqaatit pisariaqartitallu allanngortittussaavai. Joint Committeemi ataatsimiinnerup kingorna Nunanut Allanut, Inuussutissarsiornermut Niuernermullu Naalakkersuisoqarfiup inuussutissarsiortut oqaloqatigiiffiat aaqqissuuppaa. Aningaasaliinerit nunatta avataaneersut nunatsinneersullu takornariartitsisarnerup iluani attassinnaassuseqartumik ineriartortitsinissamut nutaanik inissisimaffeqalersinnaanerat pissutsit taamaannerisa eqqartussallugu pissutissaqalersippaa. Tamanna sumiiffinni suliffeqarfinnut, najugaqartunut annertunerpaamik iluaqutaasussanngorlugu aammalu avatangiisinut innarliinnginnerpaatinniarlugu.
Mittarfiliortut, Campus Kujalleq, Qassiarsuk, Qajaq Brewhouse Inuililu Narsamiittoq ullut ingerlanerini pulaarneqarput.
Joint Committeep ataatsimiinneranit ataatsimut oqaaseqaat uani atuarneqarsinnaavoq
