AtuartigukPeqqinnissaqarfik pillugu oqaloqatigiinneq pisariaqarpoq
Nassiussisuuvoq: Peqqissutsimut Naalakkersuisoqarfik
Piffissami kingullermi peqqinnissaqarfimmi pissutsit tusagassiutini assut initusimapput. Pingaartumik meeqqanut tunngasut pissutsit oqallitsitsisimapput. Tamatuma peqatigisaanik katsorsaaneq aamma napparsimasunik katsorsaanermut tunngatillugu nakkutilliinermi sulianik naammagittaalliuutinillu suliarinninnerit sivisussusaat isornartorsiorneqarsimapput.
Peqqinnissaqarfimmi pissutsit aamma peqqinnissaqarfimmik naammagittaalliortarfimmillu nakkutilliinermut tunngatillugu malittarisassat ukkatarineqassasut Peqqissutsimut Naalakkersuisup kissaatigaa, taamaattumillu suleqatigiiffiit attuumassuteqartut ataatsimiinnissamut aggersarneqassapput, tassani suliat oqallisigineqarsinnaammata.
Peqqissutsimut Naalakkersuisoq Agathe Fontain oqarpoq:
“Piffissami sivitsortumi peqqissutsimut tunngasut unammillernartut annertusiartorsimapput, taamaattumillu Naalakkersuisut susassaqarfik tamanna immikkut ittumik qitiutitsippaat ukkatarineqarnissaa. Ataatsimoorluni kivitsinikkut aamma pissutsit naatsorsuutillu pillugit ammasumik unneqqarissumillu oqaloqatigiinnikkut taamaallaat pitsanngorsaasoqarsinnaavoq. Taamaattumik ilaatigut MIO aamma inuit pisinnaatitaaffiinut suliniaqatigiiffiit allat oqaloqatiginiarlugit aggersassamaarpakka"
Paasisaqarnerorusukkuit Naalakkersuisup allattaa Naja Lynge- Petersen attaveqarfigisinnaavat, e-mail: nalp@nanoq.gl imaluunniit oqarasuaammut uunga +299 34 66 41 attaveqarfigisinnaavat.