Qalluilluni angalanermi Ilulissat, Uummannap Upernaviullu eqqaani aalisarnermi atortut annaasat katatallu piiarneqassapput

Ulloq 1. Oktobari 2023 Ilulissat, Uummannap, Upernaviup Nuullu eqqaani aalisarnermi atortunik annaasanik katatanillu qalluinissaq siunertaralugu saliilluni angalaneq aallartissaaq. Qalluilluni angalanissaq, Pinngortitaleriffik najukkanilu aalisartut peqatigiiffii suleqatigeeqqissaarlutik ingerlatassaat Pinngortitaleriffimmut 2.700.000 koruuninik aningaasaliissutit, Avatangiisinut Aningaasaateqarfimmiit tunniunneqartut tunngavigalugit aallartinneqarluni ingerlanneqassaaq.

Nunatsinni aalisarnermut atortut annaasat katatallu pisaqartarnerminnik ingerlatsiinnarlutik ukiumut aalisakkat 60 million koruuninik nalillit pisarisarpaat. Tamanna avatangiisinut aalisartunullu ajornartorsiutinik suli annertusiartortitsivoq, taamaattumillu Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik Avatangiisinut Aningaasaateqarfik aqqutigalugu Pinngortitaleriffiup ulluni 32-ni Ilulissani, Uummannami Upernavimmilu qalluilluni angalanissaanut aningaasaliinissamik neriorsuuteqarpoq. Tamatuma saniatigut Pinngortitaleriffik aamma Nuup kangerluani ulluni sisamani qalluilluni angalassaaq. Aningaasaliissutit aamma aalisartut najukkanik ilisimasallit, piffissami sivikinnerusumi sivisunerusumiluunniit ilisimatusartut umiarsuaannut Sanna-mut ilaallutik suleqataasussat akissarsiassaannut matussutigineqassapput.

”Aalisartut Pinngortitaleriffiullu pilersitsiviusussamik suleqatigalugit Ilulissani, Uummannami Upernavimmilu aalisarnermut atortut annaasat katatallu ajornartorsiutaaneri pillugit suliaqarsinnaanerput nuannerpoq. Ukiuni kingullerni Avatangiisinut Aningaasaateqarfik aqqutigalugu saliilluni suliniutissanut tapersersuinissarput annertuumik aallussimavarput. Aalisarnermut atortut annaasat katatallu – ilaanneeriarlunilu qimaannakkat – pinngortitap ataqatigiinnerinut imaanilu uumasunut sunnertiasunut unammisassat annertuut atuummata taamaaliorpugut. Qalluilluni angalanissaq aalisarnermi atortunik annaasanik piiaaniarnerinnaanngilaq, kisiannili aamma avatangiisitsinnik paarsinissatta pingaartinneqarnera siuarsarniarlugu suliniutaavoq”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Pinngortitaleriffimmi ilisimatooq Rasmus Nygaard ilisimatitsivoq, ukiuni kingullerni aalisarnermik atortunik annaasanik saliisarneq ilisimatusartut umiarsuaata Sannap misilittagaqarfiullualersimagaa.

”Ukiorpaaluit ingerlanerini ilisimatusartut umiarsuaat Sanna atorlugu aalisarnermi atortunik annaasanik qalluineq misilittagaqarfigilersimavarput. Suliaq taanna ilaatigut Pinngortitaleriffiup Youtube-kkut nittartagaatigut filmimi takuneqarsinnaavoq. Oktobarimi misilittakkat taakku teknikkikkut aaqqiissutissanik nutaanik assigiinngitsunik amerlanerusunik ilaartussavagut, neriunarporlu qalluinernik, eqqakkat avatangiisit eqqarsaatiginerullugit suliarineqartarnerinik aammalu inuttat sulinerminni avatangiisaannut pitsaanerulersitsiumaartut. Suli aalisartut ilisimasaat pingaarnerpaajupput, taamaattumillu neriuutigaara, sumi aalisarnermut atortunik annaasanik peqarnersoq ilisimannittut tamarmik ilisimasaminnik apuussivigisarumaaraatigut. Siornatigut misissuinerusarsimasuni tamani inerniliissutigineqarpoq, ukiuni qulikkaani arlalinni atortut annaaneqartarsimasut ullormut ningittakkanik nutaanik pisanillu annaasaqarnermik kinguneqartartut. Ajornartorsiutip tamatuma iluarsiiffiginissaa anguniagaraarput”,
Rasmus Nygaard Pinngortitaleriffimmeersoq oqarpoq.

Ilisimasatit pingaaruteqarput...
Aalisartuuguit aammalu sumi immap naqqani igitassarpassuarnik peqartoq ilisimagukku tusarfigerusuppatsigit. Ningittakkatit naatissimappata, GPS-ikkut sumiiffiup eqqortup nalunaarsornissaa pingaaruteqarpoq. Mobilit atorlugu kortplotterit, GPS-ikkut sumiiffik takuneqarsinnaasunngorlugu assiliuk.

Aalisariareerlutit angerlaruit QR-kode matumani saamiup tungaaniittoq mobilivit assiliiviatigut ersersikkukku asseq immiussinnaavat, imaluunniit linki una atorsinnaavat: https://arcg.is/0zC1SS.
Taanna aqqutigalugu aamma immami ningittakkavit naatsiffigisimasaata assilinera nassiussinnaavat imaluunniit tassani sumiiffik sumiinnersoq tikkuarsinnaallugu.

Annertunersumik paasisaqarusunnermi:
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaq Natuk Lund Olsen oqarasuaat: +299 34 64 76 / 53 92 28-mut, imaluunniit e-mail-it: natl@nanoq.gl eller pan@nanoq.gl aqqutigalugit attaveqarfigineqassaaq.