Vivian Motzfeldt qallunaat Nunat avannarliit suleqatigiinnermut ministeriannit Nuummi tikeraarneqarpoq

Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt, Ilageeqarnermut ministerimik, Nunami immikkoortortanut Nunanilu avannarlerni ministerimik Louise Schack Elholmimik Nuummi ulloq 18. september 2023 ataatsimeeqatigaa.

Vivian Motzfeldt Nunanut Allanut, Inuussutissarsiornermut Niuernermullu Naalakkersuisuunermi saniatigut aamma Nunani avannarlerni Kalaallit Nunaanni suleqatigiinnermut ministeriuvoq. Vivian Motzfeldtip Nunat avannarliit sinnerlugit qallunaat suleqatigiinnermut ministeriat ataasinngornermi septembarip 18-ani ataatsimeeqatiginiarlugu qaaqqusimavaa, tassani nunani avannarlerni suleqatigiinneq oqaloqatigiissutiginiarlugu.

Ataatsimeeqatigiinnermi Naalakkersuisup Vivian Motzfeldtip qallunaat Nunat avannarliit suleqatigiinnermi ministeriannut ilisimatitsissutigaa, pilersuinerup isumannaatsuunissaa qitiutillugu sulinerup siuarsarneqarnissaa Naalakkersuisunit pingaartinneqartoq. Tamanna pillugu Naalakkersuisoq oqarpoq:
”Kalaallit Nunaanni ikinngutitta iligisattalu niueqatiginerunissaat suleqatiginissaallu sulissutigaarput. Nunatta kitaani nunanut sanilerisatsinnut niuernikkut attaveqaatinik nutaanik ineriartortitsinissaq pisariaqartinneqarpoq, taamaalillutami isumannaatsumik pilersorneqarnerput pitsaanerusumik qulakkeersinnaagatsigu ”.

Tamatuma saniatigut 2025-mi Issittumi Siunnersuisoqatigiinni siulittaasuutitaqalernissaq ilaatigut oqaloqatigiissutigaat, tassungalu atatillugu Naalakkersuisup oqaatigaa: ”Danmark 2025-mi Issittumi Siunnersuisoqatigiinni siulittaasuuffeqalertussaavoq, suliassaq isumalluuterpassuarnik pisariaqartitsissaaq, tamannalu piareersarlugu aallartereerparput”.

Nunat Avannarliit Misinisteriisa Siunnersuisoqatigiiffiata Issittumi suleqatigiittoqarnissaanut suliniaqatigiiffia, Kalaallit Nunaannit 2021-mi siuttuuffigineqartoq ministerit aamma oqaluuseraat. Naalakkersuisup tamanna pillugu qallunaat suleqatigiinnermut ministeriannut oqaluttuaraa: ”Nunanik avannarlernik tamanik suleqateqarnitta ingerlalluarnera nuannaarutigaara, tamannalu Kalaallit Nunaanni Nunat Avannarliit illuannit, NAPA-mit Ilisimatusarfimmiillu ajunngitsumik ingerlanneqarpoq.
Naggasiullugu Kunngeqarfimmi Nunanilu Avannarlerni killeqarfitsigut aporfiusartut oqaluuserivaat.

Paasisaqarnerorusukkaanni ministerip allattaa Naasunnguaq Beck Kristensen e-mailimut uunga attavigineqarsinnaavoq: nabk@nanoq.gl