KALAALLIT NUNAATA AVANNAARSUANI TUNUMILU NUNAMI ALLANNGUTSAALIUKKAMI ELLA Ø-P EQQAANI KANGERLOQARFINNILU TASSUNGA QANITTUNI ANGALAARNISSAMUT MIANERSOQQUSSUT

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik aamma Kalaallit Nunaanni politiit sinnerlugit Kalaallit Nunaata avannaarsuani Tunumilu Nunami Allanngutsaaliukkami Ella Ø-p eqqaani kangerloqarfinnilu tassunga qanittuni angalaarnissaq mianersoqqussutigineqarpoq. Pingaartumik umiarsuit sinersorlutik takornariartitsisartut, sumiiffinnut pilersaarutaasumik angalasussat matumani pineqarput.

Ella Ø-p qanittaani sumiiffimmi annikinnerusumik tassaarsuaqartoq malugineqarpoq, tamannalu arfininngornermi 16. septembarimi ullaap tungaani pisimasoq GEUS-imit paasineqarpoq. Nunap sajunneranut Richter-ip uuttutaa malillugu sajuppillanneq 3,4-nik sakkortussuseqartoq paasineqarpoq. GEUS-imiit aamma Aatsitassanut Inatsisillu Atuutsinneqarnerannut Naalakkersuisoqarfimmit tassaarnermut peqqutaasoq misissorneqaleruttorpoq. Ajoqusertoqarneranik nalunaaruteqartoqanngilaq.

Sajuppillannermi nunat eqqaaniittut sunnerneqarsimanissaat naatsorsuutigineqarpoq, taamaattumillu allanik pisoqassanngitsoq oqartoqarsinnaanngilaq. 

Takussutissat aallarniutaasut (pisumut) takutippaat, pisoqarfiusup qeqqata qanitaani mallit 30-niit 50 meterit tikillugit qaarsimasut, taamaalillunilu kangerloqarfiup ilaani nunani immap 50 meterit tikillugit qaffassimaneranut takussutissaqarpoq.

Aatsitassanut Inatsisillu Atuutsinneqarnerannut Naalakkersuisoqarfiup, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup kiisalu Kalaallit Nunaata Politiivisa akornanni oqaloqatigiittoqareernerani, umiarsuarnik sinersortitsillutik takornariartitsisartut sumiiffimmiinnerminni mianersussasut, aammalu umiarsuit angalaarfissaasa pilersaarusiornerani allanik pisoqarsinnaanera naatsorsuutigissagaat inassutigineqarpoq. Tamatumunnga ilassutigalugu inassutigineqarpoq, ilaasut inuttallu nunamut niussanngitsut. Taamatuttaaq Issittumi Sakkutooqarfik pisoq pillugu nalunaarfigineqarpoq, ilaatigullu sumiiffiup isikkuanik uppernarsaasiornermi ikiuussimalluni.

Annertunerusumik paasisaqarusunnermi: 
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoq. Natuk Lund Olsen  oqarasuaat.: +299 34 64 76 / 53 92 28-imut e-mail-it: natl@nanoq.gl imaluunniit pan@nanoq.gl aqqutigalugit attaveqarfigeqquneqarput. 

Kalaallit Nunaanni Politiit tlf. 70 14 48-mut attaveqarfigineqarsinnaapput. 

Pinngortitami qaqqanit sisoortoqarneratigut nunalluunniit sajuppillanneratigut allanngortoqarsimasoq takusinnaagukku, tamanna Aatsitassanut Inatsisillu Atuutsinneqarnerannut Naalakkersuisoqarfimmi geologinut nalunaarutigisinnaavat, ukuuna.