Takornariartaatip ajutoornissaa pinngitsoortinneqarpoq

Naalakkersuisuniit Pinngortitaleriffiup angallataani Tarajoq-mi, Issittumi Sakkutooqarfimmi, Kalaallit Nunaanni Politiini aamma Kommuneqarfik Sermersuup upalungaarsimasuini inuttat umiarsuup takornariartaatip Ocean Explorer-ip ikkarlinneranut atatillugu suliniutaat pillugit qutsavigerujussuarpagut. Suliami matumani pisimasut eqqarsaatigalugit Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik eqikkaanissamut, aammalu siunissami nunatsinni sinersorluni takornariartitsisarnermi isumannaallisaanermik qaffassaaffiusinnaasunik suliniutaasinnaasunik malittarisassaasinnaasunillu naliliinissamut aggersaassaaq.

Nunatsinnut, tassungalu ilanngullugu Kalaallit Nunaata avannaarsuani Tunumilu nunamut allanngutsaaliukkamut tikeraarluni angalanermi ulorianartorsiorfiusinnaasut amerlapput. Nunarput isorartoorsuummat silallu pissusii eqqarsaatigalugit upalungaarsimanermi iliuusissat tamatigut isiginiarneqartussaapput. Tamanna pingaartumik suliffissuarnut sinersorluni takornariartitsisartunut, inuilaarsuarmi annaassiniarnerit ingerlannissaannut periarfissanik killeqartitsiffiusuni angalasartunut atuuppoq.

Umiarsuaq sinersorluni takornariartitsisartup Ocean Explorer-ip ikkarlinnerani ersarissivoq, nunatsinni upalungaarsimanikkut suliniuteqarfissat iliuuseqarfiusinnaasussallu naliliiffigeqqinneqartariaqartut. Tassani pingaartumik malittarisassat, aqutsinerit inatsisitigullu suliniutissat, taamatut pisoqaqqinnissaanut pinaveersaartitsissutaasinnaasut pineqarput.

Immikkut ittumik suliniuteqartunut qujanaq
Pinngortitaleriffiup angallataa Tarajoq Ocean Explorer-ip ikkarleqqanerani umiarsuaq kaanngartinniarlugu immikkut ittunik suliniuteqarpoq.

”Tarajoq-mi inuttat suliniuteqarnerat pillugu annertuumik nersorneqartariaqarput. Pinngortitaleriffiup sulisuisa suliniutitik qujarunneqartorujussuusut paasisariaqarpaat. Tamatumani aamma pingaarluinnartumik Issittumi Sakkutooqarfiup aamma Kalaallit Nunaanni Politiit tunniusimallutik pisunik aqutsinerannut isumaginninnerannullu, kiisalu upalungaarsimasut tamarmik pineqarput. Aamma ilaatigut Sirius-ikkut sulilersinneqarsimasut politiiniillu sulisut paasiniaasartut eqqarsaatigineqarput. Aamma taakkunani sulisut qutsavigerujussuarpagut”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Oqaloqatigiilluarneq attaveqatigiilluarnerlu pingaaruteqarluinnarput
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik Issittumi Sakkutooqarfimmiit, Kalaallit Nunaanni Politiiniit aamma Kommuneqarfik Sermersuup upalungaarsimasuiniit suliaq pillugu ilisimatinneqartuartarpoq oqaloqatigineqarluarlunilu. Oqaloqatigiinneq attaveqatigiinnerlu taanna pinaveersaartitsinermi eqqortunik iliuuseqarnissamut, pisullu ajornerulersinniarnagit suliniutissanik – aamma qaffasinnerusumi Upalungaarsimanermut Ataatsimiititaliarsuup sulilersinneqarnissaa eqqarsaatigalugu – piareersaanissaq eqqarsaatigalugu pingaaruteqarluinnartuuvoq.

Pisuni aaqqiinissamik siunnerfeqarnissaq pinasuartumillu qisuariaateqarnissaq pisariaqarpoq
Kalaallit Nunaata Avannaarsuani Tunumilu angalasunut tamanut ersarissarneqassaaq, inuup inuuneranut ulorianartorsiortitsisunik pisoqartillugu pisunik aaqqiinissamik siunnerfeqarnissaq pinasuartumillu iliuuseqarnissaq pisariaqartoq. Umiarsuaatileqatigiiffiit sinersorlutik takornariartitsisartut taamatut pisoqartillugu periarfissanik saqqummiunneqartunik tamanik atuisarnissaat pingaaruteqarpoq. Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik allatut iliortoqarsinnaasimanersoq paasiniarlugu pisorpiaq pillugu nalilersuinermik aallartitsissaaq.

Tassunga ilanngullugu nunatsinni sullissisut tamarmik taamatut pisoqartillugu pingaarutilittut inissisimanissaasa pingaaruteqassusia erseqqissarneqassaaq.

Eqikkaaneq suliniutaasinnaasunillu naliliineq aammalu malittarisassat oqallisigineqassapput
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik suliaq manna tunngavigalugu eqikkaanissamut, aammalu siunissami nunatsinni sinersorluni takornariartitsisarnermi isumannaallisaanermik qaffassaaffiusinnaasunik suliniutaasinnaasunik malittarisassaasinnaasunillu naliliinissamut aggersaassaaq. Tamatumani upalungaarsimanermi suliniutissat, Kalaallit Nunaata imartaani angalanermi sumiissusersiortarnernut suliniutissat aamma Kalaallit Nunaata Avannaarsuani Tunumilu sumiiffinni inuilaani allani angalasinnaanissamut suliniutissat sammineqassapput. Aggersaanermi Naalagaaffimmi oqartussaasut aamma Naalakkersuisut Namminneerlutik naalakkersuisoqarfii ilaatinneqassapput.


Annertunerusumik paasisaqarusunnermi:
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Natuk Lund Olsen tlf.: +299 34 64 76 / 53 92 28-mut, imaluunniit e-mail-it: natl@nanoq.gl eller pan@nanoq.gl aqqutigalugit attaveqarfigineqassaaq.