Ilaqutariit aamma suliassaqarfimmi suliallit sumiiffinnut erniffiusinnaasunut isiginninnerat pillugu misissuineq nutaaq

Ilaqutariit aamma suliassaqarfimmi suliallit sumiiffinnut erniffiusinnaasunut isiginninnerat pillugu misissuineq ullumikkut tamanut saqqummiunneqarpoq. Ineriartortitsinissamut periarfissat aamma suliniutit toqqissisimanermik pilersitsiffiusut assigiinngitsut misissuinermit ersersinneqarput. Erniartornermut atatillugu angalanermi toqqissisimanermik pilersitsiffiusumik ineriartortitsilluni aalajangersimasumik suliaqarnissaq ilaatigut qiviarneqassasut innersuussutigineqarpoq.

Ukiuni qulikkuutaani pingasuni kingullerni ernisarnerit aamma ernisussanik kiffartuussinermi ineriartornerit annertuumik ukkatarineqarsimapput. Misissuineq tamanna ernisussanik kiffartuussinermut tunngatillugu ilaqutariit naartusortallit aamma suliassaqarfimmi suliallit unammilligassanut periarfissanullu tunngatillugu paasisimasaannik ersersitsivoq. Misissuineq siunissami ernisussanik kiffartuussinerup  aaqqissuunneqarnissaa pillugu oqallinnermut tapersiissaaq. 

Toqqissisimaneq qitiutillugu 
Ilaqutariit naartusortallit toqqissisimanermik misigisimanissaannut pissutsit assigiinngitsut pingaarutillit misissuinermi ersersinneqarput. Taakkununnga ilaapput erniartorluni aallassagaanni erniffissaq pillugu ilisimasat, kiisalu angalanermi angalaqateqarsinnaaneq. Tamatumunnga ilaapput ilaqutariinnut naartusortalinnut angalanermi pissutsinut, atugassarititaasunut aamma inisimmavinnut tunngasut, kiisalu erniartorluni angalareernermi angerlarnermut tunngatillugu pissutsit pillugit eqqumaffigisassat. Peqqinnissaqarfiup erninermi upalungaarsimasussat, sulisussaqarniarneq aamma pissutsit taakku pillugit attaveqarneq toqqissisimanermik misiginissaannut aalajangiisuusut erseqqissarneqarpoq.

Ilaqutariinnut naartusortalinnut aallarlutik erniartortussanut, kiserliortutut misigisimaneq, erniartorluni aallarnermi aapparisamut ilaquttanullu maqaasineq aammalu inoorlaamik naalungiarsuuteqarluni kisimiilluni angalanissamik ernumanerit nassuiaatigineqarnerat aamma misissuinermit erserput. Ilaqutariit naartusortallit namminneq illoqarfigisaminni ernisussat  ernisussiortumik qanoq ilisarisimannitsiginerat pingaartumik qitiutinneqarpoq. Suliassaqarfimmi suliallit akornanni pingaartumik erseqqissarneqartut tassaapput sulisoqarnikkut pissutsit, ilaqutariit atugarissaarnissaat kiisalu erniartornermut atatillugu ilaqutariit avissaarsimanerisa kingunissaat. Aammali suliassaqarfimmi suliallit isiginninneranni suliassaqarfitsigut assigiinngissutit ersersinneqarput.

“Ilaqutariit naartusortallit aamma sulisut apersorneqarsimasut isumaqatigiissutigaat erninerit sapinngisamik annerpaamik isumannaatsumik ingerlassasut, taamaattorli isumannaassusermut toqqissisimanermullu tunngatillugu isumaliutiginninnerit assigiinngitsuupput. Taamaattumik isiginninnerit assigiinngitsut paasinissaannut eqqumaffiginnissaagut”, taama Kalaallit Nunaanni Peqqissusermik Ilisimatusarfimmi ilisimatusarnermik ataqatigiissaarisoq ernisussiortorlu, apersuinikkut misissuinermi siuttuusimasoq, Ingelise Olesen oqarpoq.

Ineriartortitsinissamut periarfissat aamma erniartornermut atatillugu angalanermut suliniutinik toqqissisimanermik pilersitsiffiusunik qitiutitsineq

Misissuineq ineriartortitsinissamut periarfissanik aalajangersimasunik assigiinngitsunik tapersiivoq aamma ernisussanik kiffartuussinerup aaqqissuunneqarnissaanut suleriaqqinnissamut innersuussuteqarpoq. 

Peqqissutsimut Naalakkersuisoq Mimi Karlsen misissuineq pillugu ima oqaaseqarpoq:

”Ernineq angisoorujussuuvoq ilaqutariinnik tamanik sunniisartoq. Taamaattumik ilaqutariit naartusortallit aamma sumiiffinni erniffiusinnaasuni sulisut peqataaffigisaannik misissuisitsinissaq pingaaruteqarsimavoq. Naartunermut erninermullu atatillugu naartusut ilaqutaasullu kissaataannut misigisaannullu tunngatillugu maanna paasisaqarluarneruvugut. Tamatuma peqatigisaanik peqqinnissaqarfimmi sulisut ernisussanik kiffartuussinermi periarfissanik qanoq isiginninnerat pillugu ilisimasanik pissarsivugut. Ineriartortitsinissamut periarfissanut aamma toqqissisimanermik pilersitsisunik neqeroorutinut tunngatillugu saqqummiunneqartunik maanna ataatsimut sulinerput nangissavarput”. 

Erniartornermut atatillugu angalaqataasup akiliunneqarsinnaaneranut, mittarfinni utaqqisarfiit pitsaasuunissaannut, angalalluni aqqusaarnerminni atugassanik ’nangernik poortanik’, nangernik, atisanik aamma naalungiarsuup nangilersorneranut atortussanik pisariaqartunik imalinnut, anaanaasup aamma naalungiarsuup inoorlaap nalunaaquttap akunnerinit arfinilinnit sivisunerusumik angalanerminni aqqusaarnerminni akunnittarfimmi ineeqqamik pissarsisinnaanerannut, napparsimmavissuarmiit timmisartumut ikinissap isumagineqarnissaanut aamma ullormusiaqartitsinerup imaluunniit nerisassanik pajunneqartarnerup / napparsimasunut akunnittarfinni kantiinani nerisaqarsinnaanerup atuutilerseqqinnissaanut periarfissat erniartornermut atatillugu angalanermi toqqissisimasumik pilersitsiffiusumik suliniummut siunnersuutini ilaapput.

Misissuinerup ingerlanneqarnerani suleqatigiissitaq suleriaatsinut, inernernut ineriartorfissatullu siunnersuutinut tunngatillugu isummersuutinik tunniussisarsimavoq. Suleqatigiissitaq Nunatta Nakorsaaneqarfianit, Peqqinnissaqarfimmi qullersanit, ernisarfimmi qullersanit, ernisussiortut peqatigiiffiannit, ernisussiortunit, meeraqerisunit, isumaginninnermi siunnersortinit aamma peqqissaasut ileqqorissaarnermut siunnersuisoqatigiivinit inuttaqartinneqarsimavoq.

Peqqissutsimut Naalakkersuisoq misissuineq aallaavigalugu suliassaqarfimmi soqutiginnittunut tamanut workshoppertitsissaaq. Tassani innersuussutit oqallisigineqassapput, taamaalilluni suliassaqarfimmik ineriartortitsinissamut ataatsimut pilersaarusiortoqarsinnaaniassammat.

Peqqissutsimut Naalakkersuisoqarfik sinnerlugu Kalaallit Nunaanni Peqqissusermik Ilisimatusarfik nalunaarusiamik suliarinnippoq aamma Naalakkersuisut.gl kiisalu www.folkesundhed.gl aqqutigalugit saqqummersinneqarluni.

Paasisaqarnerorusukkuit Naalakkersuisup allattaa Naja Lynge Petersen e-mail: nalp@nanoq.gl imaluunniit oqarasuaammut uunga +299 34 66 41 attaveqarfigisinnaavat.