AtuartigukAssaat tamaasa pisariaqartippagut
Nassiussisuuvoq: Naalakkersuisut Siulittaasuata Naalakkersuisoqarfia
Naalakkersuinikkut Ataqatigiissaarisoqatigiit Qaqortumi ataatsimiinnerminni ataatsimoorussamik oqariartuuteqarput.
Naalakkersuisut, Avannaata kommuniani borgmesteri, Kommune Qeqertalimmi Kommune Kujallermilu borgmesterit, SIK, NPK tassaasut Nunatsinni Perorsaasut Kattuffiat kiisalu inunnik isumaginnermi siunnersortit ilinniarsimasut peqatigiiffiat NIISIP isumaqatigiissutigivaat qanimut suleqatigiinnerulertoqartariaqartoq.
“Nunatsinni innuttaasut 56.000-iinaavugut ilaatigullu aporfilersuilluta ingerlasarpugut. Ikioqatigiittariaqarpugut qanimullu suleqatigiittariaqarluta, aamma kattuffiit akornanni. Assaammi tamaasa pisariaqartippagut. Tamatta ataatsimik siunnerfeqarluta sulisariaqarpugut tassalu innuttaasunik isumaginninnikut pisariaqartitsisut ajunnginnerpaamik sullinnissaat”.
Marlunngornermi ataatsimiinnermi isumaginninnermut suliassaqarfiup iluani sulisussaqarniarnermik unammilligassat pillugit immikkut sammillugit isumasioqatigiittoqarpoq.
Ilaatigut aamma oqariartuutigineqarpoq inatsisiliorneq nunatsinnut naleqqussarneqartariaqartoq, ilinniarneq pisariillisarneqassasoq kiisalu allaffissornermi annikillisaaneq utoqqaallu illuisa siunissami pitsanngorsaavigineqarnissaat.