Mingutsitsinngitsumut allanngoriartortitsinerup tungaanut alloriaqqinneq

CO2-mik nunap iluanut toqqorsisarnissamut periusissiaq ulloq aggustip quliganni Naalakkersuisunit akuerineqarpoq.

CO2-mik nunap iluanut toqqorsisarnissaq nunarsuarmi silap pissusaani ajornartorsiornerup killilersimaarnissaanik suliaqarnermi sakkussaavoq pingaaruteqartoq, aammalu ilisimatusarfiulluni inuussutissarsiorfiullunilu sukkasuumik ineriartortoq.

CO2-mik imerpalasumik nunap iluanut imaarsaasarnerup ingerlasarnera tuluttut taaneqartarpoq, Carbon Capture and Storage imaluunniit CCS taaguutigineqaannarluni. CO2 imerpalasoq nunap iluani sumiiffimmut basaltiusumut imaarsarneqarpat, taanna aatsitassannguuttussaavoq aammalu manngertunngorluni ujaqqamut assingusumik iluseqalissalluni. Kalaallit Nunaanni nunap ilua sumiiffinni arlalinni basalteqarluartuuvoq. Suliassaq siulleq tassaassaaq sumiiffinnik CO2-nik imaarsaaviusinnaasunik naleqquttunik nassaarniarnissaq.

Aatsitassanut Inatsisillu Atuutsinneqarnerannut Naalakkersuisoq, Naaja H. Nathanielsen, oqarpoq:

”CCS-nut suliniut Naalakkersuisut silap pissusaani ajornartorsiornermut aaqqiissutissanik tapersiiniarnermik, peqatigisaanillu najukkani inuussutissarsiutinik ineriartortitsinissamik najukkamilu suliffissanik pilersitsinissamik ilungersuuteqarnerannut ilaatinneqartunut allanut ilaavoq. Aallaqqaammut nunap iluani CO2-mik nunap iluani toqqorsinissamut Kalaallit Nunaanni periarfissaqarfiusup paasiniassavagut. Tamatuma ingiaqatigisaanik nunatsinni inuussutissarsiornermi suliassaqarfimmut nutaamut piujuartussamullu tassunga qanoq sapinngisamik pitsaanerpaamik sinaakkutissiissanerluta paasinarsisissavarput.”

Aallaqqaammut misileraalluni suliniut aallarniutigineqassaaq, tassani CO2-mik nunap iluanut imaarsaanermut misileraavik sananeqassalluni misilerarneqassallunilu. Sumiiffiit pingasut nunap sannaani periarfissaqarfimminni aallaqqaammut misissuiffigineqartussat tassaapput:

A) Qeqertarsuup Kitaa

B) Niaqunngunaq/Nuup eqqaa

C) Kalaallit Nunaata kujataa

Periusissiaq nittartakkami uani takuneqarsinnaavoq

Assimi Islandimi CO2-nut stationi, CO2-mik nunap iluanut imaarsaaviusoq, takuneqarsinnaavoq.

Attaveqarfissaq: Naalakkersuisoqarfimmut pisortaaneq Jørgen T. Hammeken-Holm, joeh@nanoq.gl