Peqqinnissaqarfimmi sulisussat ilinniagaqarsimasut nunat allaneersut atorfinitsinnerannut atatillugu sukkasuumik atorfinitsitsisarneq pillugu pitsaanerusumik isumaqatigiissusiortoqartoq

Naalakkersuisut danskillu oqartussat peqatigiillutik sukkanerusumik atorfinitsitsisarneq pillugu isumaqatigiissut 11. februar 2021-meersoq nutarsarpaat, taamaalillutik siunissami Kalaallit Nunaanni sulisinnaanermut najugaqarsinnaanermullu akuersissut pillugu qinnuteqarnermi peqqinnissaqarfimmi sulisut ilinniagaqarsimasut immikkut sukkanerusumik eqaannerusumillu suliassanik suliarinnittoqartalerluni.

Peqqinnissaqarfimmi atorfininnissaq siunertaralugu peqqinnissaqarfimmi sulisussanik ilinniagaqarsimasunik Nunat Avannarliit avataanni nunat allaneersunik Kalaallit Nunaanni sulisinnaanermut najugaqarsinnaanermullu akuersissut pillugu qinnuteqarsinnaanerat isumaqatigiissutip nutartikkap maannakkut ajornannginnerulersippaa. Peqqinnissaqarfimmi sulisoq danskit akuersissutaannik pissarseqqaarnissaa piumasaqaataajunnaarpoq. Kalaallit oqartussat peqqinnissaqarfimmi sulisussat Nunat Avannarliit avataanni nunat allaneersut siunissami nakkutigilissavaat akuerisassallugillu.

Isumaqatigiissut 2021-meersoq nutartigaq ullumikkut ulloq 6. september 2023-mi Hans Egedep Illuani nalliuttorsiutigineqarluni atuutilersinneqarpoq, Jess Svane, Isumaginninnermut, Suliffeqarnermut Nunamullu Namminermut Naalakkersuisoq aamma Kaare Dybvad Bek, Nunat allamiunut Akuutitsinermullu Ministeri peqatigalugu isumaqatigiissut atsiussallugu.

”Peqqinnissaqarfimmut sulisussanik ilinniagaqarsimasunik sulisussarsiornermi unammilligassat annertuut pillugit aaqqiissutissaasinnaasut ujartorlugit piffissaq kingullermi Naalakkersuisut oqallisigivaat. Peqqinnissaqarfimmut sulisussanik, nutaanik atorfinitsinerit amerlavallaannginneri pissutigalugit, nunat allaneersunik sulisussarsiorneq pillugu isumaqatigiissut siulleq misissussallugu pingaartissimavarput. Maannakkut aporfik peqatigiilluta peerparput, aamma peqqinnissaqarfimmi sulisussanik ilinniagaqarsimasunik nunat allaneersunik sukkanerusumik eqaannerusumillu sulisussarsiornissaq qilanaaraarput”, Isumaginninnermut, Suliffeqarnermut Nunamullu Namminermut Naalakkersuisoq, Jess Svane, oqaaseqarpoq.

”Uagut peqqinnissaqarfitsinni suliniarlutik kissaateqartut, peqqinnissaqarfimmi sulisut nunat allaneersut qinnuteqarnerisa ingerlasarnerannik oqilisaataasoq isumaqatigiissut nuannaraarutigaarput. Nuna tamakkerlugu peqqinnissaq pillugu sullissinerup qulakkeerneqarnissaanut peqqinnissaqarfimmi sulisunik piukkunnartunik pisariaqartitsineq annertusiartuinnartoq naammassiniarlugu isumaqatigiissut tapertaassaaq”, Peqqissutsimut Naalakkersuisoq, Mimi Karlsen, oqaaseqarpoq.

SIRI – Nunat tamat akornanni Sulisussarsiornermut Akuutitsinermullu Aqutsisoqarfiup Nunat allamiunut Akuutitsinermullu Ministereqarfimmiittup Kalaallit Nunaanni sulisinnaanermut najugaqarsinnaanermullu akuersissutit pillugit qinnuteqaatinik suliaqarneq isumagisaraa.

Nunat allamiunut Akuutitsinermullu suliassaqarfik danskit akisussaaffigaat. Nunat allamiunut inatsit kunngip peqqussutaatigut Kalaallit Nunaannut Danmarkip atuutilersippaa, Kalaallit Nunaanni pissutsit immikkut ittut eqqarsaatigalugit.

Paasissutissanik ersarinnerusumik pissarsiniaruit attaveqarfigiuk naalakkersuisup allattaa Helene S. Pedersen e-mailikkut: hspd@nanoq.gl eller tlf. + 299 34 56 11