Aalisarneq pillugu inatsit amerlasuunit patajaatsumik tunngavissiorneqarsimalluni tapersersorneqarlunilu salliutinneqassaaq

Nunatta aalisarneq inuussutissarsiutaasa pingaarnersaraat, taamaattumik Naalakkersuisut tamanna amerlasuunit tunngavissiorneqarsimalluni tapersersorneqarlunilu qulakkeerneqarsimanissaa pingaartilluinnarpaat, aalisarnermut inatsisissaq pitsaalluinnartumik tunuliaquteqarnissaa pingaartilluinnarlugu, nunatsinni aalisarnerup siunissamut aammali kinguaariinnut tulliuttunut qulakkeerneqarsimanissaa pingaaruteqarluinnarmat.

Tamanna tunngavigalugu Aalisarnermut Piniarnermullu Naalakkersuisup Karl Tobiassenip aalisarnermik aallussaqartut ataavartumik ataatsimeeqatigisarpai; KNAPK, SQAPK, QAK, Sulisitsisut GE, SIK aamma Grønlandsbanken, minnerunngitsumillu aalisartorpassuit innuttaasunik nunatta ilarujussuani ukiuni kingullerni ataatsimiitsitsinerni peqataasartut aamma ataatsimeeqatigisarlugit.

Naalakkersuisup aamma partiit Inatsisartuni ilaasortaatitaqartut ataasiakkaarlugit aallarniutaasumik ataatsimeeqatigisarpai, taakku siunissami aalisarnermut inatsisissamut kissaatiminnik saqqummiussaqarsinnaasarput. Taamaalilluni inatsisissaq amerlasuunit isumaqataaffigineqarlunilu tapersersornissaa qulakkeerneqarsinnaalluni, inatsisissaq pingaaruteqarluinnarmat nunatsinnullu pisariaqartinneqarluinnartussaammat.

Inerititalimmik pitsaasumik oqaloqatigiittarnerit naatsorsuutiginngisamik sivisunerusi-mapput. Partiinik suli oqaloqatiginnittoqarpoq, naatsorsuutigineqarporlu oqaloqatigiittarnerit qanittukkut naammassineqarumaartut. Partiinik oqaloqatigiittarnerup siunertaraa Aalisarnermut Piniarnermullu Naalakkersuisup aalisarneq pillugu inatsisissamut periusissanik isumaqatigiissuteqarnissaa, partiit kissaataat isumaqatigiissutip ilaattut tunngavigineqartassallutik.

Naalakkersuisut pilersaarutigigaluarpaat aalisarneq pillugu inatsisissaq Inatsisartut ukiakkut 2023-mi ataatsimiinnerisa nalaanni oqaluuserineqassasoq. Naalakkersuinilli pingaartinneqarneruvoq aalisarneq pillugu inatsisissaq amerlasuunit tunngavissiorneqarsimalluni patajaatsumillu qulakkeerneqarsimassasoq, minnerunngitsumik sivisuumik tusarniutigineqassalluni. Taamaalilluni aalisarnermut tunngasunik aallussaqartut inatsisissatut siunnersuummut sivisuumik piffissaqarlutik ilalersuinissaannut periarfissaqassapput, siunissami aalisarneq pillugu attanneqarsinnaasumik patajaatsumillu pineqarnissaa qulakkeerneqassalluni.

Aalisarnermut Piniarnermullu Naalakkersuisoq Karl Tobiassen tamatumunnga atatillugu ima oqarpoq: “Naalakkersuisut pingaartittorujussuuat inatsisip suliarineqarneranut atatillugu sapinngisaq, periarfissarlu naapertorlugu innuttaasut akuutinneqarnissaasa periarfissaqartitaanissaat, aalisarneq siunissamut qulakkeerumallugu politikikkut pitsaanerpaamik tunuliaquteqarnissaq pingaaruteqarlunilu qulakkiigassaavoq. Taamaattumik aalisarnermut tunngasunik aallussaqartut amerlasuut isumaqataaffigisinnaasaannik aamma partiit inatsisissap suliarineqarnerani oqaloqataanissaannut pingaartitsilluinnartuuvunga. Uggornarpoq Inatsisartut ukiakkut 2023-mi inatsisissatut siunnersuutip oqaluuserineqarnissaanut killiliussaq pilersaarutit naapertorlugit naammassineqarsinnaanngimmat. Taamaattorli inatsisissatut siunnersuut suliarineqarluarsimasoq aamma amerlasuunit tunngavilersorluarneqarsimalluni tapersersorneqarluartoq saqqummiunneqarsinnaalissaaq. Tamanna kingusinaarluni tunniussinerup pitsaaqutigalugu iluaqutigissavaa, Nunatta siunissaa matumani pineqarmat.”

Karl Tobiassen nangilluni tunngavilersorpoq: “Aalisarnermit aningaasarsiornerput illersortuaannartariaqarparput taamaammallu patajaatsumik isertitsiviunerata innarlinnginnissaa siunertamut suliarisatsinnut naleqqussartuartariaqarlutigu. Taamaammat aningaasarsiorneq isiginiaraanni aalisarneq pillugu inatsimmi suliaqarnitsinni partiit kissaatigisaattut suliarput torersumik naammassineqarnissaa siunertaajuartariaqarpoq, matumani pingaartumik sinerissap qanittuani aalisarnerup iluanaarnarnerulernissaanik naleqarnerulersitsinerulernissaanillu siunnerfeqaraanni, suliaq pitsaasumik tunngavissiorluarsimasumik suliarineqartariaqarpoq.”

Taamaalilluni maannakkut siunertaalerpoq inatsisissatut siunnersuut Inatsisartut 2024-mi upernaakkut ataatsimiinnerini oqaluuserineqarnissaa, inatsit januaarip aallaqqaataani 2025-mi atuutsilissalluni.

Politikikkut isumaqatiginninniarnerit naammasseriarpata inatsisissatut siunnersuut Aalisarnermut Piniarnermullu Naalakkersuisoqarfimmit inaarneqassaaq. Naammassineqariarpat siunnersuut sapaatip akunnerini arfineq pingasuni tusarniutigineqassaaq. Tusarniutigineqareerpat tamatumunnga nalunaarutit attuumassutillit nalilersorneqarlutik suliaralugit aallartinneqassapput.

Sukumiinerusumik paasisaqarusukkaanni immikkoortortaqarfimmi pisortaq Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl