Imeruersaatit toqqagassat amerlanerusut eqqagassallu ikinnerusut

Imeruersaatit puui pillugit nalunaarut nutaaq utertitsisarnermilu aaqqissuussiineq nutaaq 1. januar 2024 atuutilersinneqassapput. Siunertaq tassaavoq atuisut Imeruersaatit puuinik periarfissaqarnerulernissaat utertinneqartussanik assigiinngitsunik arlalinnik qinigassaqalernerunissaat.

Naalakkersuisut nunatsinni atuisut pisiniartitsisullu pitsaasumik misigisaqarnissaat pingaartippaat. Naalakkersuisut ilisimaarilluarpaat aaqqissuussaq nutaajummat, taamaattumillu pisiniarfiit allallu susassaqartut ilaatinnissaat pingaartippaat, taamaalilluni ataavartumik suleqatigiilluni aaqqiissuteqartarnissaq ingerlanneqarniassammat.

Nalunaarut nutaaq
Imeruersaatit puui pillugit nalunaarutip tamanut tusarniutigineqarnera ulloq 28. august 2023 naammassivoq. Ersarippoq imeruersaatit puui aasiigiinngitsut sapinngisamik amerlanerpaat utertitsisarnermi ilaatinneqarnissaat tusarniaaffigineqartut kissaaatigigaat.

”Nuannaarutigaara utertitsisarnermik aaqqissuussinermi imeruersaatit puui assigiinngitsut sapinngisamik amerlanerpaat ilaatinneqarnissaat amerlaqisunit soqutigineqarmat. Tamassuma kingunerissavaa puiaasat puuisa ikinnerungaartut pinngortitamut iginneqartut eqqakkanillu ikuallaasarfimmi ikuallanneqartarnissaat. Nunatsinni puukunik utertitsisarneq aallartisarniarlugu pilersaarusiorneq siuarsimasorujussuvvoq, qilanaarivaralu pisiniarfinnut innuttaasunullu saqqummiunnissaa.” Nunalerinermut, Imminut Pilersornermut, Nukissiuuteqarnermut Avatangiisunullu Naalakkersuisoq Kalistat Lund oqarpoq.

Nalunaarutip nutaap kingusinnerpaamik 1. oktober 2023 naammassineqarnissaa Nunalerinermut, Imminut Pilersornermut, Nukissiuuteqarnermut Avatanngiisunullu Naalakkersuisoqarfiup naatsorsuutigivaa, tassanilu takuneqarsinnaassaaq imeruersaatit puui utertitsisarnermi sorliit ilaatinneqassanersut..

Utertitsisarnermi aaqqissuussineq nutaaq
Imeruersaatit puui pillugit nalunaarut 1. januar 2024 atuutilissaaq, nunatsinnilu utertitsisarnermik aaqqissuussineq atuutilissalluni. Aaqqissuussaq nutaaq atuisuni ullumikkumut nalunngisaannut assingussaaq, imeruersaatilli puui amerlanerujussuit ilaalissallutik.
Naatsorsuutigineqarpoq utertitsinermi atortorissaarutit atorneqartartut amerlasuut ukiortaareernerata kingorna atorneqaannarsinnaasut.

Illoqarfeqassappat sumiiffiilluunniit ilaanni aaqqissuussamut nutaamut ilanngussinnaanngitsoqarpat Nunalerinermut, Imminut pilersornermut, Nukissiutinut Avatangiisinullu naalakkersuisoqarfimmit ilisimatitsissutigineqarumaarpoq, utaqqiisaasumillu aaqqiisoqarluni.

Imeruersaatit puui pillugit utertitsisarnerup nutaap suliarinerani Nunalerinermut, imminut pilersornermut, nukissiutinut avatangiisinullu Brugseni, Pisiffik, KNI Pilersuisoq Sulisitsisullu ataatsimeeqatigisarpaat nutaamik utertitsisarnernermik aaqqissuussineq pillugu.

Naalakkersuisut naatsorsuutigivaat nunatsinni puukunik utertitsisarneq nutaaq pillugu 1. oktober 2023 saqqummiussinnaassallugu. Tassani imeruersaatit puui angissusaat, utertitsinermi akiliutit puukullu pisiniarfinni qanoq passunneqartarnissaat saqqummiutissavaat.

Pisiniarfiit annertuumik aningaasaliinissaat pinaveersaartinneqassaaq.
Pisiniarfiit utertitsisarnermik aaqqissuussinermut nutaamut ikaarsaarnermi annertuunik aningaasaliinnginnissaat Naalakkersuisut pinngitsoortinniarpaat. Taamaattumik Naalakkersuiut naatsersuutigaat utertitsisarnermik aaqqissuussinerup nutaap 2024-mi aallartilluarnissaa qulakkeerniarlugu maskiinanik nutaanik utertitanut katersuiffiusussanik pisiortornermut tapiliussamik aningaasaliinikkut 5,5 mio. kr-it ukiaq manna atorneqassasut. 2024-mut Aningaasanut inatsisissatut siunnersuummi utertitsisarnermik aaqqissuussinissap tapersernissaanut saniatigut 10 mio. kr-t immikkoortinneqarput.
Utertitsisarnermi aaqqiissuusinermik ingerlatsinermut imeruersaatit puuinut ataasiakkaanut pisiniarfinnit akilerneqartassapput. Pisiniarfiit aaqqissuussinermik ingerlatsinermi ingerlaavartumik aningaasartuutaannik taarsiissuteqartarnissaq pillugu Naalakkersuisut siunnersuuteqarniarput Taamaalilluni pisiniarfiit tamassumunnga aningaasartuuteqarnerussanngillat.

Akitsuutit qaffasissusiat ingerlatiinnarneqassaaq
Naalakkersuisut siunnersuutigaat akitsuutit qaffasissusiat atuuttoq 1. januar 2024-mit ingerlatiinnarneqassasoq. Naalakkersuisut taamatut aalajangiinerannut pingaartumik marluk pissutaapput.
Siullermik nalilerneqarpoq akitsuutit ingerlatiinnarneqarneranni atuisunut akit sunnerneqassanngitsut. Taamatut nalilinneq Nuuk Imiup 1.januarip kingorna unammillersinnaannginnerminnik naliliineranit taperserneqarpoq, naak immiaaqqamut ataatsimut akitsuutinik 3,5 kroninik akiliisanngikkarluarlutik. Tamassuma takutippaa akit puunut akitsuutit kinguneranik qaffannavianngitsut.

Aappassaanik aalakoornartut sodavandillu akitsuutaasa akileraartarnermik aaqqissuusseqinnermik isumaqatigiissuteqannginnermi appartinneqarnissaat Naalakkersuisut kissaatiginngilaat.

Naalakkersuisut aamma maluginiaqqussavaat peqqinneq pillugu politikkimi mianerisassaqarmat., Naalakkersuisut maluginiarsimavaat pisiniarfiit aalakoornartunik atuinerup annikillisinneqarnissaanik aamma akisussaaqataanertik isiginiaraat. Naalakkersuisut taamaammat isumaqarput, immiaaqqanik atuinerup annertuseriaannaaneranik kinguneqartussamik iliuuseqarnissap pinngitsoortinnissaa isumaqatigiissutaasoq.

Ersaripporli Nuuk Imeq A/S-ip matunissamik aalajangernera nunap karsiata isertitaanik annertusisitsissasoq. Aningaasanut Naligiissitaanermullu Naalakkersuisoqarfiup ilimagaa, Nuuk Imeq A/S-ip matunera kisimi nunap karsiata 90-120 mio. kr-nik annertusititsissasoq. Imeruersaatit puui pillugit nalunaarutip allanngortinnerani nunap karsiata isertitaasa annertusitinneqarnissaat siunertaanngimmat, aningaasat amerlanerusut innuttaasunut utertinneqarnissaat siunnersuuteqarnissaq Naalakkersuisut suliniutigaat. Tamanna kingusinnerpaamik septembarip naanerani pissaaq.

”Nunap karsiata isertitaasa amerlissutaat pisortat aningaasartuutaasa amerlissutaannut atorneqassanngillat. Taamaammaat Naalakkersuisut kissaatigaat aningaasat inuiaqatigiinnut utertinneqassasut. Naalakkersuisut isumaliutitik Inatsisartuni partiinut piffissami qaninnermi oqaloqatigiissutigissavaat.”
Aningaasaqarnermut, naligiisitaanermut, aatsitassanut inatsisillu atuutsinneqarnerannut Naalakkersuisoq Naaja H. Nathanielsen oqarpoq.

Pissutsit atuuttut:
Imeruersaatit puui pillugit nalunaarutip utertitsisarnermilu aaqqissuussinerup allanngortinneqarnissaannik Inatsisartut Naalakkersuisunut 2022-mi ukiakkut peqqusippuut. Allannguutit kinguneraat, immiaaqqat, sodavandit imeruersaatillu kulsyrinik akullit allat ullumikkumut sanillillugu annertuninngorlugit tunineqarsinnaassasut, puullu assiginngitsut amerlanerit ullumikkumut sanilliullugu atorneqarsinnaassasut. Peqatigitillugu aalajangerneqarpoq utertitsisarnermi aaqqissuussinermi gas-inut puiaasat puiaasallu plastikkit utertinneqartarnissaat isumagineqassasoq.

Paasissutissanik amerlanerusunik naalakkersuisumut allatsimut Nunalerinermit, Imminut Pilersornermi, Nukissiutinut Avataangiisinullu naalakkersuisoqarfimmi attavigineqarsinnaavoq Manasse Berthelsen på tlf.: +299 34 56 03 / 54 88 68 imlt. e-mail: mabr@nanoq.gl aamma pan@nanoq.gl, aammattaaq Naalakkersuisumut allatsi Jeanette Petersen Aningaasaqarnermut Naligiisitaanermut Naalakkersuisoqarfimmi tlf.: +299 26 54 76 imlt. e-mail: jelp@nanoq.gl.